អាជ្ញាធរខេត្តព្រះសីហនុ ជំរុញការអភិវឌ្ឍសេវាស្នាក់នៅបន្ថែម ត្រៀមទទួលកំណើនភ្ញៀវទេសចរ

2016-12-01 07:49:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ការកើនឡើងយ៉ាងគំហុកចំនួនភ្ញៀវទេសចរមកកម្សាន្តខេត្តព្រះសីហនុ បានធ្វើឲ្យអាជ្ញាធរខេត្តព្រះសីហនុកំពុងស្វែងរកការអភិវឌ្ឍទីកន្លែងស្នាក់នៅបន្ថែម ដើម្បីឆ្លើយតបកំណើនភ្ញៀវទេសចរ។

លោក តាំង សុចិត្រគ្រីស្នា ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា ភ្ញៀវទេសចរមកកម្សាន្តខេត្តព្រះសីហនុមានការកើនឡើងខ្លាំងមួយរយៈចុងក្រោយនេះ ជាពិសេសលំហូរភ្ញៀវទេសចរចិនដែលធ្វើឲ្យអាជ្ញាធរមានការបារម្ភពីការផ្គត់ផ្គង់ទីកន្លែងស្នាក់នៅ ដែលមិនអាចឆ្លើយតបទៅកំណើនភ្ញៀវទេសចរ។

លោកថា អាជ្ញាធរកំពុងជំរុញដល់ក្រុមហ៊ុនឯកជន ក្នុងការអភិវឌ្ឍទីកន្លែងស្នាក់នៅបន្ថែមដូចជាផ្ទះសំណាក់ និងសណ្ឋាគារ ដើម្បីសម្រួលដល់ការមកដល់របស់ភ្ញៀវទេសចរមកខេត្តព្រះសីហនុ។

ខេត្តព្រះសីហនុមានភាពទាក់ទាញដោយសារមានឆ្នេរស្រស់ស្អាត រួមទាំងមានកោះដ៏ទាក់ទាញជាច្រើនដែលក្លាយជាគោលដៅទេសចរណ៍ទាំងភ្ញៀវជាតិនិងអន្តរជាតិ។

ប្រធានមន្ទីរទេសចរខេត្តព្រះសីហនុបានបញ្ជាក់ថា ការតភ្ជាប់សេវាកម្មហោះហើរមកខេត្តព្រះសីហនុ បានជួយជំរុញកំណើនភ្ញៀវទេសចរអន្តរជាតិមកកម្សាន្តខេត្តឆ្នេរសមុទ្រមួយនេះ។

លោកថា ភ្ញៀវទេសចរចិនបានសម្រុកមកកម្សាន្តខេត្តព្រះសីហនុច្រើនប៉ុន្មានឆ្នាំចុងក្រោយ ដោយសារមានការហោះហើរត្រង់ពីប្រទេសចិនមកព្រលានយន្តហោះខេត្តព្រះសីហនុ ដែលផ្តល់ភាពងាយស្រួលសម្រាប់ភ្ញៀវដែលចង់មកកម្សាន្តខេត្តដែលមានឆ្នេរសមុទ្រស្រស់ស្អាតបំផុតនេះ។

បច្ចុប្បន្នខេត្តព្រះសីហនុមានសណ្ឋាគារចំនួន ៩៣ កន្លែង និងផ្ទះសំណាក់ ២៩១ កន្លែង ដែលចំនួននេះមិនទាន់អាចបំពេញតាមតម្រូវការគ្រប់គ្រាន់លំហូរភ្ញៀវទេសចរ ដែលរំពឹងថានឹងមានកើនឡើងខ្លាំងនៅពេលខាងមុខ៕