ដួង សុខគា រំភើបខ្លាំងព្រោះចាប៉ីដងវែងបានដាក់បញ្ចូលជាសម្បត្តិបេតិកភណ្ឌពិភពលោក

2016-12-02 03:02:34
ចំនួនមតិ 0 | ចំនួនចែករំលែក 0

ចន្លោះមិនឃើញ

"ខ្ញុំពិតជារំភើបចិត្តខ្លាំងណាស់ ដែលចាប៉ីដងវែងត្រូវបានដាក់បញ្ចូលជាសម្បត្តិបេតិកភណ្ឌពិភពលោកដូចនេះ"។ លោក ដួង សុខគា បានថ្លែងដូច្នេះក្នុងបទសម្ភាសជាមួយ Sabay។ លោកបានបន្តទៀតថា នេះជាក្ដីស្រម៉ៃរបស់លោកយូរណាស់មកហើយដែលចង់ឃើញ ឧបករណ៍ភ្លេងបុរាណខ្មែរមួយនេះមានឈ្មោះក្នុងបញ្ជីសម្បត្តិបេតិកភណ្ឌពិភពលោក ឥលូវនេះក្ដីស្រម៉ៃមួយនេះបានក្លាយជាការពិត ដែលលោករំភើបចិត្តខ្លាំងមិនដឹងថា គួរនិយាយពាក្យអ្វី។

កូនសិស្សរបស់លោកតា នេត ប៉េ រូបនេះបន្តទៀតថា នៅពេលដែលចាប៉ីដងវែងបានដាក់បញ្ចូលជាសម្បិត្តិបេតិកភណ្ឌពិភពលោកធ្វើឱ្យ គេស្គាល់កាន់តែច្បាស់ ពីសម្បត្តិវប្បធម៌ដ៏សម្បូរបែបរបស់ប្រទេសកម្ពុជា ហើយក៏ជាមោទកភាពរបស់កូនខ្មែរគ្រប់រូបផងដែរ។ ក្នុងនាមជាអ្នកស្រឡាញ់តន្រ្តីបុរាណខ្មែរមួយរូបលោកពិតជាមានមោទកភាព ដែលដូនតាខ្មែរបានបន្សល់ទុកនូវកេរ្តិ៍មរតកដ៏ល្អផូរផង់ មិនអាចកាត់ថ្លៃបាន។ ហើយលោកក៏ថ្លែងអំណរគុណយ៉ាងជ្រាលជ្រៅដែល រដ្ឋាភិបាល ក្រសួងវប្បធម៌និងវិចិត្រសិល្បៈ ជាពិសេសមន្រ្តីគ្រប់ជាន់ថ្នាក់ដែលខិតខំយ៉ាងខ្នះខ្នែងក្នុងការស្នើសុំ ឱ្យដាក់ចាប៉ីដងវែងជាសម្បត្តិវប្បធម៌ពិភពលោក។

លោក សុខគា ដែលជាអ្នកកំប្លែងផង និង ចេះលេងចាប៉ីដងវែងផងនោះ បន្តទៀតថា បច្ចុប្បន្ននេះលោកមានការព្រួយបារម្ភខ្លាច កូនខ្មែរលែងស្គាល់ចាប៉ីដងវែងនេះ ព្រោះលោកសង្កេតឃើញថា ចាប៉ីដងវែងហាក់វិលចុះ មានន័យថា អ្នករៀនចាប៉ីនានា មិនសូវមានទីផ្សារ មិនសូវមានអ្នកអញ្ជើញពួកគាត់ក៏គ្មានឱកាសក្នុងការហ្វឹកហាត់ យូរៗទៅធ្វើឱ្យពួកគាត់ខ្ជិលហាត់រៀន ព្រោះមិនដឹងទៅសម្ដែងឱ្យអ្នកណាស្ដាប់។

ដូចនេះលោកមិនចង់ឃើញចាប៉ីដងវែងវិលចុះនោះទេ លោកចង់ឃើញចាប៉ីដងវែងវិលឡើងមានន័យថា សូមឱ្យបងប្អូនខ្មែរ យុវជនខ្មែរ ឱ្យតម្លៃចាប៉ីដងវែង ចូលរួមគាំទ្រផ្ដល់កម្លាំងចិត្តដល់អ្នករៀនចាប៉ីដងវែង តាមរយៈការអញ្ជើញទៅលេងតាមកម្មវិធីនានា នោះអ្នករៀនចាប៉ីមានឱកាសហាត់រៀន សាកល្បងសមត្ថភាព មានទឹកចិត្តក្នុងការហ្វឹកហាត់បន្តទៀត នោះចាប៉ីដងវែងនឹងវិលឡើង គឺមានការរីកចម្រើន។

លោកក៏សំណូមពរផងដែរអ្នកដែលមាននិស្ស័យស្រឡាញ់ចាប៉ីដងវែង សូមកុំបោះបង់ ត្រូវខិតខំរៀនសូត្រ ដើម្បីបន្តវេនពីដូនតាខ្មែរយើងកុំឱ្យបាត់បង់។ ប៉ុន្តែទន្ទឹមនឹងនោះសូមបងប្អូន មេត្តាផ្ដល់តម្លៃ និងចូលរួមថែរក្សាការពារ បណ្ដុះចិត្តស្រឡាញ់ និងលើកទឹកចិត្តផងទើបចាប៉ីដងវែងអាចមានជីវិតបន្តទៀតបាន។

សូមស្ដាប់លោក ដួង សុខគា ចាប៉ី តាមរយៈវីដេអូខាងក្រោមនេះ