ចំណុចពិសេស ៣ របស់ល្បែងទាញព្រ័ត្រផ្ដៅនៅសង្ក្រាន្តភូមិខ្ញុំ

2016-12-02 12:19:23
ចំនួនមតិ 0 | ចំនួនចែករំលែក 0

ចន្លោះមិនឃើញ

"ល្បែងទាញព្រ័ត្រ" ត្រូវបានចុះបញ្ជីបេតិកភណ្ឌវប្បធម៌ អរូបិយ នៃមនុស្សជាតិ របស់អង្គការយូណេស្កូ កាលពីថ្ងៃទី ២ ធ្នូ ឆ្នាំ ២០១៥ កន្លងទៅ ដូច្នេះ ថ្ងៃនេះគឺជាខួប១ឆ្នាំ នៃការបញ្ចូលល្បែងប្រជាប្រិយរបស់ខ្មែរខាងលើចូលជាសម្បត្តិបេតិកភណ្ឌពិភពលោក។ មិននិយាយអំពីការប្រារព្ធខួប តែ Sabay សូមរំលឹកអំពីល្បែងទាញព្រ័ត្រមួយនៅស្រុកកោះធំ ខេត្តកណ្ដាល ដែលរៀបចំពិធី "សង្ក្រាន្តភូមិខ្ញុំ" កាលពីអំឡុងចូលឆ្នាំកន្លងទៅនេះ។

ល្បែងទាញព្រ័ត្រនៅក្នុងកម្មវិធីបុណ្យចូលឆ្នាំមួយ ដែលប្រជាជនបានដាក់ឈ្មោះថា "សង្ក្រាន្តភូមិខ្ញុំ" ស្ថិតនៅភូមិត្របែកពកព្រែកឬស្សី ឃុំកំពង់កុង ស្រុកកោះធំ ខេត្តកណ្ដាល បានក្លាយចំណាប់អារម្មណ៍របស់ក្រសួងវប្បធម៌ និងវិចិត្រសិល្បៈ រហូតចុះធ្វើការស្រាវជ្រាវដល់ទីនោះផ្ទាល់ និងចងក្រងជាឯកសារទុក។ សង្ក្រាន្តភូមិខ្ញុំ គឺជាពិធីបុណ្យចូលឆ្នាំរួមគ្នារបស់អ្នកភូមិ ដែលតែងប្រារព្ធធ្វើឡើងជារៀងរាល់ឆ្នាំតាំងពីយូរយារណាស់មកហើយ ប៉ុន្តែឈ្មោះ សង្ក្រាន្តភូមិខ្ញុំ អ្នកស្រុកទើបតែដាក់ កាលពីរដូវចូលឆ្នាំខ្មែរ ២០១៦ នេះទេ ។

ចំណុចពិសេស ៣ របស់ល្បែងទាញព្រ័ត្រនៅបុណ្យសង្ក្រាន្តភូមិមានដូចជា ៖

១.ព្រ័ត្រធ្វើអំពីដើមផ្ដៅ

ផ្ដៅជារុក្ខជាតិវល្លិមួយប្រភេទ ដែលនៅសង្ក្រាន្តភូមិខ្ញុំចាត់ទុកផ្ដៅជាវត្ថុធាតុដើមចម្បងមួយ ដោយយកវាទៅធ្វើព្រ័ត្រទាញលេងជារៀងរាល់ឆ្នាំ។ ដើម្បីធ្វើបានព្រ័ត្រមួយត្រូវប្រើផ្ដៅមិនតិចជាង ១០០ ដើមទេ ឬប្រហែល ៥ ទៅ ៦ចន្ទាស ក្នុងមួយចន្ទាសផ្ដៅស្មើចំនួន ២០ ដើមផ្ដៅ ។

លោក ជា វ៉ាត ជាអ្នកធានារ៉ាប់រងក្នុងការបោចផ្ដៅ បានប្រាប់ថា ដើម្បីធ្វើបានព្រ័ត្រផ្ដៅនេះមួយ ត្រូវចំណាយពេលវេលាយ៉ាងតិច ១៥ថ្ងៃ ឬកន្លះខែ។ ដំបូងគឺគាត់ទៅបោចផ្ដៅពីព្រៃរនាម ដែលមានចម្ងាយ ១ គីឡូម៉ែត្រពីភូមិ ហើយត្រូវប្រើពេលប្រហែលមួយអាទិត្យ ដើម្បីបោចឲ្យបានដើមផ្ដៅគ្រប់ចំនួន និងប្រើរយៈពេលមួយអាទិត្យទៀត ដើម្បីហាលដើមផ្ដៅទាំងនោះ ឲ្យស្ងួតស្វិតជាប់បានល្អ ។

បន្ទាប់មកអ្នកភូមិគាត់នាំគ្នាជួយអូសជញ្ជូនដើមផ្ដៅទាំងនោះមកទីតាំងបុណ្យសង្ក្រាន្តភូមិខ្ញុំ ។ គាត់បានបញ្ជាក់បន្ថែមថា ការធ្វើព្រ័ត្រផ្ដៅនេះមានក្បួនខ្នាតច្បាស់លាស់ ត្រូវការមនុស្សចំនួន ៧ ទៅ ១០នាក់ ដើម្បីវេញផ្ដៅបញ្ចូលឲ្យត្រូវតាមធ្លុងរបស់វា ។ ផ្ដៅ១ដើមប្រវែងពី ១០ទៅ ២០ម៉ែត្រ ដោយយកផ្ដៅ ២ ឬ ៣ដើមមកចងស្រាក់តគ្នាបានវែង ដើម្បីវេញបញ្ចូលធ្លុងតែមួយ។ ពួកគាត់ប្រើកាំបិតបន្ទោះបិតដើមផ្ដៅជាសរសៃខ្សែតូចៗ យកមកចងធ្លុងព្រ័ត្រកុំឲ្យរលាចេញពីគ្នា ។

ព្រ័ត្រផ្ដៅដែលសង្ក្រាន្តភូមិខ្ញុំប្រើសម្រាប់ទាញលេងកាលពីចូលឆ្នាំខ្មែរ ២០១៦ ទំហំប៉ុនកំភួនដៃមនុស្សចាស់ មានប្រវែង ៤១ម៉ែត្រកន្លះ អាចដាក់ចំណុះមនុស្សទាញបានខ្ទង់ជាង ៣០០នាក់។ ព្រ័ត្រផ្ដៅមានទំហំធំ ទាញមិនសូវឈឺដៃ ដូចព្រ័ត្រខ្សែពួរតូចៗ ឡើយ និងមិនងាយដាច់ផ្តេសផ្ដាសទេ ។

២.ល្បែងទាញព្រ័ត្រផ្ដៅនេះ មានអាយុកាលមិនតិចជាង ១០០ឆ្នាំ រយៈពេលជាងមួយសតវត្សទៅហើយដែល អ្នកភូមិត្របែកពក ភូមិព្រែកឬស្សី បាននាំគ្នាលេងទាញព្រ័ត្រផ្ដៅនេះបន្តមកហូរហែមិនដែលខានមួយឆ្នាំណាឡើយ លើកលែងតែសម័យសង្គ្រាមក្នុងរបបកម្ពុជាប្រជាធិបតេយ្យ ។

តាមសាក្សីយាយតាចាស់ ៗ ដែលមានអាយុច្រើននៅក្នុងភូមិនោះ ពួកគាត់ថា ពេលរស់រានដឹងក្ដីមកពួកគាត់ឃើញតែនាំគ្នាលេងអ៊ីចឹង មិនដឹងថា ការលេងទាញព្រ័ត្រផ្ដៅហ្នឹង ចាប់កកើតតាំង ពីឆ្នាំណាដំបូងមកប្រាកដទេ ។ ការលេងទាញព្រ័ត្រផ្ដៅនេះ គឺលេងតាំងអំពីជំនាន់ឪពុកម្ដាយ និងជីដូនជីតារបស់គាត់មកម្ល៉េះ មិនតិចជាង៣ទៅ៤ ជំនាន់មនុស្សឡើយ ។ ហេតុដូច្នេះទើបសន្និដ្ឋានថា ល្បែងទាញព្រ័ត្រផ្ដៅនៅសង្ក្រាន្តភូមិខ្ញុំ មានអាយុកាលខ្ទង់រយឆ្នាំមកហើយ រហូតវាក្លាយទំនៀមទម្លាប់ប្រពៃណីដ៏ល្អមួយនៅក្នុងភូមិរបស់ពួកគាត់។

៣.ល្បែងទាញព្រ័ត្រផ្ដៅនេះជាកិច្ចពិធីអបិយជំនឿរបស់អ្នកភូមិ ដោយមានបង្កប់អត្ថន័យជាច្រើន

បុណ្យសង្ក្រាន្តភូមិខ្ញុំ ឬបុណ្យអ្នកតាដើមសំរោងស្ថិតនៅត្រង់ព្រំប្រទល់ភូមិព្រែកឫស្សី និងភូមិត្របែកពក ។ អ្នកភូមិទាំងពីរនេះតែងតែសាមគ្គីគ្នារៀបចំពិធីបុណ្យនៅរោងអ្នកតានោះអមនឹងការលេងទាញព្រ័ត្រផ្ដៅជារៀងរាល់ឆ្នាំ ។

លោកជុំ សុខ ជាប្រធានគណៈកម្មការបុណ្យនោះបានបញ្ជាក់ថា ភ្នំខ្សាច់ដែលបានពូន និងបំបួសត្រូវផ្សឹកវិញជាដាច់ខាត ចំណែកឯព្រ័ត្រដាច់ខាតក៏ត្រូវទាញផ្ដាច់ចោលដែរ។ បើពុំដូច្នោះទេ នឹងមិនបានលាភជ័យសេចក្ដីសុខមកដល់ភូមិស្រុកឡើយ ហើយប្រៀបដូចជាមិនបានផ្ដាច់ឆ្នាំចាស់ ផ្លាស់ចូលឆ្នាំថ្មីអញ្ចឹងដែរ ។ មជ្ឈមណ្ឌលស្រាវជា្រវវប្បធម៌ វិទ្យាសាស្ត្រនៃសាកលវិទ្យាល័យភូមិន្ទវិចិត្រសិល្បៈបានបញ្ជាក់ថា ទាញព្រ័ត្រដែលខ្មែរនាំគ្នាលេងមានន័យសំខាន់ពីរយ៉ាង៖

ទី១ លេងជាល្បែងកម្សាន្ត និងទី២ គេលេងដើម្បីជាកិច្ចជំនឿអ្វីមួយ គឺក្នុងន័យទាំងពីរនេះហើយដែលធ្វើឲ្យអង្គការយូណេស្កូពិចារណា និងសម្រេចចុះបញ្ជីល្បែងទាញព្រ័ត្រខ្មែរក្នុងបេតិកភណ្ឌវប្បធម៌អរូបិយនៃមនុស្សជាតិកាលពីថ្ងៃទី ២ ខែធ្នូ ឆ្នាំ ២០១៥ នៅប្រទេស Namibia៕