ក្នុង​គម្រប់​ខួប​មួយឆ្នាំ​​ ម៉ូតូ​ប្រេន​លំដាប់​កំពូល​របស់​អ៊ីតាលី Ducati បាន​បង្ហាញ​ម៉ូតូ​ស៊េរី​ថ្មី​ ៥ ម៉ូដែល​ទៀត ជា​ការ​បន្ថែម​សម្រាប់​អតិថិជន​​កម្ពុជា​ដែល​គាំទ្រ​ម៉ូតូ​ស៊ី​ម៉ាក​របស់​អ៊ីតាលី​នេះ​។

ម៉ូដែល​ដំបូង​គឺ Scrambler Ducati Full Throttle។ ម៉ូដែល​នេះ​ បាន​រចនា​សន្ទះ​កង់​ខ្លី​ជាង​មុន និង​ដៃ​ចង្កូត​ងាយស្រួល​​សម្រាប់​បើកបរ​លើ​ផ្លូវ​ប្រណាំង​។ នៅ​លើ​ធុងសាំង​រំលេច​ពណ៌​ខ្មៅ​គ្រិប​បង្កប់​នូវ​ភាព​ទាក់ទាញ​ រួម​ទាំង​កែប​អង្គុយ​យ៉ាងផាសុកភាព​សម្រាប់​អ្នក​បើកបរ។

វា​ក៏​ត្រូវ​បាន​បំពាក់​ជាមួយ​ប្រព័ន្ធ​ស៊ីម៉ាំង Termignoni រួម​ទាំង​របាំង​ការពារ​ភក់​ខាង​មុខ​ដែល​ជា​លក្ខណៈ​ពិសេស​របស់ Scrambler Ducati Full Throttle។ Scrambler Ducati Full Throttle តម្លៃ ១៦ ៣៨៨ ដុល្លារ។

ចំណែក​ម៉ូដែល​ថ្មី​មួយ​ទៀត​គឺ Ducati Hypermotard 939។ វា​ដំណើរការ​​ជាមួយ​​ម៉ាស៊ីន Testastretta ១១៣ សេសេ និង​មាន​បំពាក់​បច្ចេកវិទ្យា Riding Mode, Power Modes។ ក្រៅ​ពី​នេះ​ក៏​មាន​បំពាក់​ប្រព័ន្ធ​ហ្រ្វាំង ABS និង Traction Control ដែល​ផ្តល់​សុវត្ថិភាព​សម្រាប់​ការធ្វេីដំណេីរ។

តម្លៃ​របស់ Ducati Hypermotard 939 ២០ ១៨៨ ដុល្លារ។

រី​ឯ Ducati Superbike 959 Panigale ក៏​ជា​ម៉ូដែលថ្មីសន្លាងមួយទៀត​របស់ Ducati។ Ducati Superbike 959 Panigale ការ​ផលិតផ្តោត​សំខាន់​លើ​ម៉ាស៊ីន​និង​ការ​ឌីហ្សាញ​រូបរាង។ វា​​បាន​កែ​ប្រែ​ការ​រចនា​លើ​សាក់ស៊ី និង​ឈ្នាន់​ថ្មី​ រួមទាំង​ការ​អភិវឌ្ឍ​​លើ​ម៉ាស៊ីន​រហូត​ដល់ ៩៥៩ សេសេ។ តួ​​​ត្រូវ​បាន​កែ​លម្អ​បញ្ចូល​ជាមួយ​ស៊ុម monocoque រួម​ជាមួយ​បូម​ម៉ូតូ​ដែល​អាច​សារ៉េបាន។ ក្រៅ​ពី​នោះផ្នែក​ខាង​មុខ​​ក៏​មាន​​ឌីហ្សាញ​មាន​ភាព​ទាក់ទាញ​បើ​ធៀប​ម៉ូដែល​ដទៃ​ទៀត។

Ducati Superbike 959 Panigale តម្លៃ​ ២៥ ៩៨៨ ដុល្លារ។

Ducati Xdiavel S ក៏​ជា​ម៉ូតូ​ស៊េរី​ថ្មី​មួយ​ទៀត​ដែល Ducati យក​ទៅ​បង្ហាញ​កាល​ពី​រសៀល​ម្សិលមិញ​នេះ។ Ducati Xdiavel S ប្រើប្រាស់​ខ្សែពាន​សម្រាប់​ដំណើរការ។ វា​បាន​បង្កើត​កម្លាំង​ម៉ាស៊ីន​ដល់ ១២០០ សេស និង​កម្លាំង​រង្វិល​ជុំ 5000 RPM។ ឈ្នាន់​ជើង​របស់​វា​អាច​ផ្លាស់ប្ដូរ​បាន ៤ ទីតាំង និង​កៅអី​​អ្នក​បើកបរ​ក៏​អាច​ផ្លាស់ប្ដូរ​បាន ៥ ទីតាំង រួម​ដៃ​ចង្កូត​អាច​សឺរ៉េ​បាន ៣ ដង ដែល​​ការ​ផ្សំ​បញ្ចូល​គ្នា​អាច​ផ្លាស់ប្ដូរ​រហូត​ដល់ ៦០ ទម្រង់។

លក្ខណៈ​ពិសេស​របស់​ម៉ូតូ​នេះ​អាច​ជ្រេ​រហូត​មុំ ៤០ ដឺក្រេ​ដែល​ជា​ចំណុច​ទាក់ទាញ​ការ​ចាប់​អារម្មណ៍​​អតិថិជន។

Xdiavel S ត្រូវ​បាន​គេ​ហៅ​ថា​ជា​ស្តេច​ម៉ូតូ​របស់ Ducati។ តម្លៃ​របស់ Xdiavel S ៣៨ ២៨៨ ដុល្លារ។

ចំណែក​ម៉ូដែល​ចុងក្រោយ​គឺ​ Ducati Multistrada 1200 Enduro។ វា​ជា​ម៉ូតូ​សម្រាប់​អ្នក​ចូលចិត្ត​ធ្វើ​ដំណើរ​ផ្សងព្រេង​ឆ្លង​ទ្វីប។ វា​អាច​​ជិះ​ធ្វើ​ដំណើរ​​បានឆ្ងាយ​​​ជាង ៥០០ គីឡូម៉ែត្រ​​ជាមួយ​​ចំណុះ​ធុង​សាំង ៣០ លីត្រ។ ម៉ូតូ​នេះ​ប្រើ​ប្រាស់​យ៉ាន់​កង់​មុខ​ទំហំ ១៩ អ៊ីង និង​កាំរាយ​និង​ជុំកង់​ប្រវែង ២០០ មីលីម៉ែត្រ​ បើ​ទោះ​បី​ធ្វើ​ចម្ងាយ​ឆ្ងាយ​យ៉ាង​ណា​ក៏​គ្មាន​ការ​បារម្ភ។

Ducati Multistrada 1200 Enduro តម្លៃ ៣៤ ៩៨៨ ដុល្លារ៕

អត្ថបទ៖ ប៊ុណ្ណារ៉ា