ស្វែងយល់កាន់តែច្បាស់ពីខ្សែជីវិតពិតរបស់ក្រុមក្មេងខ្មែរ

2016-12-25 03:46:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពល្បីល្បាញនៃបទចម្រៀងរបស់ ក្មេងខ្មែរ បានធ្វើឲ្យមនុស្សជាច្រើនចាប់ផ្ដើមចង់ដឹងពីខ្សែជីវិតតស៊ូរបស់ពួកគេ ដែលមានទេពកោសល្យអាចនិពន្ធ និងច្រៀងរួមគ្នាបានយ៉ាងល្អ។ ជឿថា អ្នកគាំទ្រប្រាកដជាចង់ដឹងឈ្មោះពិត ប្រវត្តិពិតរបស់អ្នកទាំងពីរ ថាតើពួកគេរៀនបានកម្រិតណា ស្រុកកំណើតនៅខេត្តណា ចេះនិពន្ធ និងច្រៀងតាំងពីពេលណា ជួបឧបសគ្គឆ្លងកាត់ភាពលំបាកបែបណាខ្លះ ទើបអាចក្លាយជាតារាចម្រៀងវ័យក្មេងដូចបច្ចុប្បន្ន?

សមាជិកក្រុម "ក្មេងខ្មែរ" មានឈ្មោះពិត គឺ កៅ ពន្លឺ និង ជា សុជាតិ។

ពន្លឺ មានជំនាញខាង រ៉េប និពន្ធ និងមានអាយុ ២៤ ឆ្នាំ និងស្រុកកំណើតនៅខេត្តត្បូងឃ្មុំ បញ្ចប់ការសិក្សាថ្នាក់បរិញ្ញាបត្រអក្សរសាស្ត្រអង់គ្លេស ឯកទេសគ្រូបង្រៀននៅ IFL ជាក្មេងយកចិត្តទុកដាក់នឹងការរៀនសូត្រ ទំនេរពីការសិក្សាច្រៀងលេងកម្សាន្ត និងស្រមៃថាខ្លួននឹងក្លាយជាអ្នកចម្រៀងយុវវ័យម្នាក់។

កៅ ពន្លឺ (ខាងឆ្វេង)

- សុជាតិ ដែលមានជំនាញខាងច្រៀង និពន្ធ លេងហ្គីតា មានអាយុ ២១ ឆ្នាំ ស្រុកកំណើតនៅខេត្តកំពង់ស្ពឺ ជាយុវជនស្វះស្វែងរៀនសូត្រ រហូតត្រូវគេទទួលស្គាល់ជាសិស្សពូកែ និងមានក្តីស្រមៃចង់ក្លាយជាអ្នកចម្រៀង និងអ្នកនិពន្ធចម្រៀងម្នាក់។ ភាពជឿជាក់ និងឆន្ទៈដ៏មោះមុតរបស់អ្នកទាំងពីរបានធ្វើឲ្យក្តីស្រមៃរបស់ពួកគេបានក្លាយជាការពិត។

សូមស្វែងយល់ជីវិតពិតរបស់ក្មេងខ្មែរឲ្យកាន់តែច្បាស់តាមរយៈកិច្ចសម្ភាសតាមទូរសព្ទរវាងក្រុមក្មេងខ្មែរ និងក្រុមការងារម៉េកណូលា គីងកុ ភ្លឹស រយៈពេល ១៥ នាទី៖

សំណួរ៖ ប្អូនមានចិត្ដស្រឡាញ់តន្ត្រីចម្រៀងនេះតាំងពីតូចមកឬមែន?

ពន្លឺ៖ ខ្ញុំចូលចិត្តច្រៀងបែបរ៉េបខ្លាំងណាស់ តាំងពីតូចដល់ធំ ដើរទៅណាមកណា ខ្ញុំតែងរ៉េបរហូត ហើយឥឡូវនេះ ក្រៅពីច្រៀងរ៉េប ខ្ញុំក៏ខិតខំហ្វឹកហាត់ច្រៀងឲ្យកាន់តែល្អបន្ថែមទៀត។
សុជាតិ៖ ចំណែកខ្ញុំវិញ ចូលចិត្តហាត់រៀនលេងហ្គីតា តាំងពីអាយុ ៨ ឆ្នាំ ហើយបច្ចុប្បន្នខ្ញុំក៏បានពង្រឹងបន្ថែមលើជំនាញច្រៀង និងរាំរបស់ខ្ញុំជាបន្តបន្ទាប់ដែរ។

សំណួរ៖ ប្អូនគិតថា ប្អូនជាសិស្សល្អម្នាក់ដែរឬទេ? ការសិក្សាសំខាន់យ៉ាងដូចម្ដេចចំពោះប្អូន?

ពន្លឺ៖ ការសិក្សាមានតម្លៃខ្លាំងណាស់សម្រាប់ពួកខ្ញុំ។ កាលនៅរៀន ពួកយើងបានប្រឹងប្រែងរៀនយ៉ាងខ្លាំង រហូតបានក្លាយជាសិស្សពូកែ។

សំណួរ៖ ចំណេះដឹងអ្វីខ្លះដែលអ្នកទាំងពីរទទួលបានពីការសិក្សា ហើយបានយកទៅអនុវត្តជាប្រយោជន៍សម្រាប់អាជីពចម្រៀងរបស់ប្អូនសព្វថ្ងៃ?

សុជាតិ៖ បាទ បង! គឺការយកចិត្តទុកដាក់ និងការចងចាំខ្ពស់។ ក្នុងនាមជាអ្នកនិពន្ធចម្រៀងដោយខ្លួនឯង ពួកខ្ញុំចាំបាច់ត្រូវយល់អត្ថន័យនៃពាក្យ និងឃ្លាជួនរណ្តំ ដើម្បីនិពន្ធចម្រៀងមួយបទឲ្យស្តាប់ទៅពីរោះ មានអត្ថន័យគ្រប់គ្រាន់ និងច្បាស់លាស់ ទោះបីជាឃ្លារ៉េបក៏ដោយ។

សំណួរ៖ ដើម្បីក្លាយជាគូចម្រៀងដ៏ស័ក្តិសម ប្អូនសហការគ្នាយ៉ាងដូចម្ដេច?

ពន្លឺ៖ ពួកយើងបានប្រឹងប្រែងខ្លាំងណាស់ក្នុងការធ្វើការងារឲ្យស៊ីសង្វាក់គ្នា។ ពេលខ្លះពួកយើងក៏មានបញ្ហាទាស់យោបល់គ្នាដែរ តែពួកយើងមិនបានបោះបង់ចោលឆន្ទៈរួមរបស់យើងនោះឡើយ ពួកយើងព្យាយាមស្វែងយល់ពីគ្នា យោគយល់គ្នា និងគោរពស្រលាញ់គ្នា ព្រោះការសាមគ្គីជាធ្លុងមួយ ពិតជាកម្លាំងសំខាន់ដើម្បីក្ដីស្រមៃរួមរបស់យើងទាំងពីរ។

សំណួរ៖ អ្វីដែលជំរុញទឹកចិត្តអ្នកទាំងពីរ នៅពីក្រោយការផលិតបទចម្រៀងថ្មីមួយដែលអាចទទួលបានការគាំទ្រ និងមានប្រជាប្រិយខ្ពស់ ដូចជាបទ បុណ្យភូមិ នេះ?

ពន្លឺ៖ អ្វីដែលអស្ចារ្យនៅពីក្រោយបទ បុណ្យភូមិ នេះ គឺពួកយើងបាននិពន្ធចម្រៀងនេះឡើងដោយមានការចូលរួមពីមិត្តភ័ក្តិ យើងធ្វើចម្រៀងនេះឡើងទាំងអស់គ្នា ដើម្បីកែលម្អបទចម្រៀង "បុណ្យភូមិ" នេះឲ្យកាន់តែល្អដូចអ្វីដែលបងប្អូនគ្រប់គ្នាបានស្តាប់ និងស្រឡាញ់ចូលចិត្ត។ ទាំងនេះគឺជាលទ្ធផលឆ្លុះបញ្ចាំងពីសាមគ្គីភាពរបស់ពួកយើង ព្រោះពួកយើងបានចំណាយទាំងពេលវេលា ទាំងកម្លាំងកាយ និងកម្លាំងចិត្តយ៉ាងច្រើន ទម្រាំបានចេញជាផ្លែផ្កាដូចនេះ។

សំណួរ៖ ប្អូនធ្លាប់គិតថាបទចម្រៀងនេះ នឹងទទួលបានការពេញនិយមខ្លាំងពីអ្នកគាំទ្រដូចសព្វថ្ងៃនេះដែរឬទេ?

ពន្លឺ៖ ពួកខ្ញុំសង្ឃឹមថា បទចម្រៀងនេះនឹងទទួលការពេញនិយម ប៉ុន្តែពួកខ្ញុំមិនបានគិតថាបទនេះនឹងល្បីខ្លាំងយ៉ាងនេះឡើយ។ ពួកខ្ញុំមានមោទនភាព និងសប្បាយចិត្តខ្លាំងណាស់នៅពេលអ្នកទាំងអស់គ្នាគាំទ្រស្នាដៃរបស់ពួកខ្ញុំ។ សព្វថ្ងៃនេះនៅតាមពិធីមង្គលការ បងប្អូននិយមយកបទ "បុណ្យភូមិ" មករាំ ច្រៀងយ៉ាងសប្បាយរីករាយ ហើយនេះធ្វើឲ្យខ្ញុំមានអារម្មណ៍ថា រំភើប និងពិសេសខ្លាំងមែនទែន។

សំណួរ៖ ប្អូនមានដំបូន្មានអ្វីខ្លះដល់សិស្សឯទៀតនៅពេលបច្ចុប្បន្ននេះ?

សុជាតិ៖ ការសិក្សា ជាទ្រព្យធនដ៏មានតម្លៃសម្រាប់មនុស្សយើងម្នាក់ៗ ហើយវាក៏ជាធនធាន នឹងអាចជួយសម្រេចក្ដីស្រមៃឲ្យក្លាយជាការពិត ដូច្នេះសូមប្អូនៗទាំងអស់គ្នាប្រឹងប្រែងរៀនសូត្រឲ្យបានច្រើន ចេះច្រើនចម្រើនអនាគត។

សំណួរ៖ ប្អូនមានផែនការអ្វីខ្លះសម្រាប់អនាគត? និងគម្រោងចេញបទចម្រៀងថ្មីដែរទេ?

ពន្លឺ៖ មានបង! គឺយើងខិតខំរកគំនិតច្នៃប្រឌិតថ្មីៗ ដើម្បីនិពន្ធបទភ្លេង និងចម្រៀងពីរោះៗ ត្រូវនឹងស្ថានភាពយុវជន និងចំណូលចិត្តរបស់ពួកគាត់ឲ្យកាន់តែខ្លាំងបន្ថែមទៀត។ ឆ្នាំថ្មី២០១៧ នេះ ពួកយើងនឹងចេញបទចម្រៀងថ្មីៗ ហើយសង្ឃឹមថាបងប្អូន មិត្តយុវវ័យទាំងអស់នឹងចូលចិត្ត ហើយគាំទ្រពួកយើងដូចបទ បុណ្យភូមិ ផងដែរ។

សំណួរ៖ ប្អូនធ្វើយ៉ាងណាដើម្បីថែរក្សាសុខភាពឲ្យបានល្អ?

សុជាតិ៖ តាមធម្មតា ខ្ញុំចូលចិត្តលេងកីឡា គេងឲ្យបានគ្រប់គ្រាន់ និងញ៉ាំទឹកដោះគោ គីងកុ ព្រោះខ្ញុំត្រូវការថែទាំសុខភាព និងខួរក្បាលឲ្យបានល្អ ដើម្បីខិតខំរៀនសូត្រ និងធ្វើការ។
ពន្លឺ៖ សម្រាប់ខ្ញុំ គឺខ្ញុំផ្ដោតលើការញ៉ាំអាហារឲ្យបានទៀងទាត់ និងហាត់ប្រាណ មិនប៉ះពាល់គ្រឿងស្រវឹង ឬក៏គ្រឿងញៀនដែលនាំឲ្យប៉ះពាល់ដល់សុខភាព។

សំណួរ៖ ជាចុងក្រោយ មានពាក្យពេចន៍អ្វីផ្ញើជូនអ្នកគាំទ្ររបស់ប្អូនដែរឬទេ?

ពន្លឺ៖ ខ្ញុំសូមផ្តាំផ្ញើទៅមិត្តយុវវ័យទាំងអស់គ្នា ខ្ញុំក៏ជាយុវជនម្នាក់ដែរ ខ្ញុំដឹងថាយុវវ័យចូលចិត្តធ្វើអ្វីសប្បាយៗ តែកុំសប្បាយភ្លេចខ្លួន កុំលលេងជាមួយគ្រឿងញៀន វាបំផ្លាញអនាគតរបស់អ្នក "យុវជនល្អ ត្រូវចៀសឱ្យឆ្ងាយពីគ្រឿងញៀន" បើអ្នកអផ្សុកចង់កម្សាន្ត សូមយកពេលវេលានោះមកស្តាប់បទចម្រៀងវិញ។
សុជាតិ៖ ចំណែកខ្ញុំសូមឲ្យមិត្តយុវវ័យយកចិត្តទុកដាក់ខំរៀនសូត្រ ទាន់ខ្លួននៅក្មេង ចំណេះវិជ្ជាគឺជាស្ពានចម្លងយើងទៅរកភាពជោគជ័យ និងក្តីស្រមៃរបស់ខ្លួន ពុំមានអ្នកណាម្នាក់អាចជួយយើងបានឡើយ បើយើងមិនអាចជួយខ្លួនឯងនោះ។ ហើយបើធុញថប់ អ្នកអាចសម្រាក ទៅលេងកីឡាដើម្បីសុខភាព៕