កោះកុង អ្នកផងមើលរំលង មានឆ្នេរស្អាតវែងអន្លាយមិនចាញ់កោះរ៉ុង

2017-01-01 02:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កោះកុងជាកោះដ៏ធំមួយស្ថិតនៅចម្ងាយជាង ២៥ គីឡូម៉ែត្រពីខេត្តកោះកុង។ នៅលើកោះមានទេសភាពស្រស់ស្អាតប្រកបដោយភាពទាក់ទាញ ជាមួយឆ្នេរវែងអន្លាយ ប៉ុន្តែដោយសារមិនទាន់មានការអភិវឌ្ឍរួមទាំងការផ្សព្វផ្សាយច្រើន ទើបធ្វើឲ្យកោះឋានសួគ៌នេះហាក់ស្ថិតនៅសែនឆ្ងាយពីក្រសែភ្នែកភ្ញៀវទេសចរទាំងឡាយ។

លោក ប៊ុន បៀវ ប្រធានមន្ទីរទេសចរណ៍ខេត្តកោះកុងបានឲ្យដឹងថា កោះកុងជាកោះធំបំផុតក្នុងចំណោមកោះទាំង ២៣ របស់ខេត្តកោះកុង។ កោះកុងមានឆ្នេរស្អាតមិនចាញ់កោះរ៉ុងដ៏ល្បីក្នុងខេត្តព្រះសីហនុឬស្អាតជាងផង ប៉ុន្តែដោយសារខ្វះការអភិវឌ្ឍ និងការផ្សព្វផ្សាយច្រើន ទើបធ្វើឲ្យកោះដែលលោកហៅជាកោះឋានសួគ៌នេះ នៅមិនទាន់អាចទាក់ទាញភ្ញៀវទេសចរណ៍មកកម្សាន្តបានច្រើន។

ស្ថិតនៅលើផ្ទៃទឹកធំល្វឹងល្វើយ នៅលេីកោះកុងសំបូរធនធានធម្មជាតិ សត្វព្រៃ មច្ឆា ផ្កាថ្ម និងជីវៈចម្រុះបាតសមុទ្ររួមទាំងឆ្នេរកម្សាន្ត ៥ កន្លែង។ ភ្ញៀវដែលចង់មកលេង អាចធ្វើដំណើរតាមទូកចំណាយពេលប្រហែល ៤០ នាទីចេញពីក្រុងខេមរភូមិន្ទ។

លោកប្រធានមន្ទីរបានឲ្យដឹងបន្តថា មានក្រុមហ៊ុនឯកជនមួយបានអភិវឌ្ឍរមណីយដ្ឋានបណ្តោះអាសន្ននៅលើកោះកុង ជាមួយការផ្តល់សេវាកម្មហូបចុកនិងស្នាក់នៅដល់ភ្ញៀវដែលមកកម្សាន្ត។