ចន ច័ន្ទលក្ខិណា នាំថវិកាដែលប្រមូលបាន ទៅជួយភរិយា រិន សាវ៉េត រសៀលនេះ!

2017-01-24 08:55:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ថវិកាជាង ៨០០ ដុល្លារត្រូវបានអ្នកនាង ចន ច័ន្ទលក្ខិណា ប្រធានសមាគមសិល្បៈស្ម័គ្រចិត្តជួយសង្គម ប្រមូលពីសប្បុរសជននានា យកទៅជូន តារាចម្រៀង រិន សាវ៉េត ដើម្បីបង់ថ្លៃការព្យាបាលភរិយាដែលកំពុងសម្រាកព្យាបាលជំងឺមហារីកសុដន់យ៉ាងធ្ងន់ធ្ងរ នៅមន្ទីរពេទ្យមិត្តភាពខ្មែរសូវៀត ។

ប្រធានសមាគមខាងលើបានប្រកាសភ្លាមៗតាមរយៈមិត្តភ័ក្ដិក៏ដូចជាសប្បុរសជនផ្សេងទៀត តាមរយៈសមាគមរបស់ខ្លួនបន្ទាប់ពីបានដឹងថា លោក រិន សាវ៉េត តារាចម្រៀងចាស់វស្សា នៅក្នុងផលិតកម្មរស្មីហង្សមាសបានជួបទុក្ខដោយសារតែប្រពន្ធមានជំងឺមហារីកសុដន់យ៉ាងធ្ងន់ធ្ងរ មិនមានប្រាក់ព្យាបាល។

អ្នកនាង ចន ច័ន្ទលក្ខិណា ប្រាប់ថា ការប្រកាសស្វែងរកសប្បុរសជនខាងលើធ្វើឡើង ២ថ្ងៃប៉ុណ្ណោះ ក្នុងនោះមានសប្បុរសជនបានចូលមកជាមួយសមាគមជាបន្តបន្ទាប់ ដោយសរុបទាំងអស់ទទួលបានជាង ៨០០ ដុល្លារ។

ទោះបីជាថវិកាទាំងអស់ខាងលើ មិនអាចបង់ថ្លៃបង្គ្រប់ថ្លៃព្យាបាលទាំងអស់ក៏ពិតមែន ប៉ុន្តែប្រធានសមាគមប្រាប់ថា វាគឺជាទឹកចិត្តមួយក្នុងនាមជាអ្នកសិល្បៈដូចគ្នា។ ភរិយាលោក រិន សាវ៉េត មានជំងឺមហារីកសុដន់ ទើបតែជាងមួយខែនេះទេ ក្នុងនោះអ្នកស្រីបានមកសម្រាកនៅមន្ទីរពេទ្យមិត្តភាពខ្មែរសូវៀតបានមួយអាទិត្យហើយ។

ក្រៅពីការជួយពីសប្បុរសជនខាងលើ កន្លងមកឃើញមានកាកបាទក្រហម និងអ្នកសិល្បៈមួយចំនួនទៀតបានចូលរួមជួយផងដែរមានដូចជា ក្រុមលោក នេនទុំ ក្រុមអ្នកនាង ញឹម ចាន់ថន ក្រុមលោក ម៉ារ៉ា ប៉ុណ្ណា ក្រុមលោក គង់ សុធារិទ្ធ លោក G-Devith ជាដើម ៕