«កំពូលអ្នកប្រដាល់ស្រាបៀរលីអូ» រដូវកាលទី៥ ខុសឆ្នាំមុនៗ ដណ្ដើមខ្សែក្រវាត់អន្តរជាតិកម្ពុជា-ថៃ

2017-01-25 07:38:53
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃអាទិត្យ ទី២២ សប្ដាហ៍មុន ស្រាបៀរលីអូ បានប្រកាសឧបត្ថម្ភកម្មវិធី «កំពូលអ្នកប្រដាល់ ស្រាបៀរលីអូ» រដូវកាលទី៥ នៅស្ថានីយទូរទស្សន៍បាយ័ន។

ថ្លែងក្នុងសន្និសីទកាសែតនៅសង្វៀនទូរទស្សន៍បាយ័នបឹងស្នោ លោក ព្រាប សុវណ្ណ តំណាងស្រាបៀរលីអូ ថ្លែងថា៖ "កម្មវិធី «កំពូលអ្នកប្រដាល់ស្រាបៀរលីអូ» រដូវកាលទី៥ នេះមិនមែនជាការប្រដាល់លក្ខណៈថ្នាក់ជាតិដូចរដូវកាលមុនៗទេ តែជាការប្រកួតដណ្តើមខ្សែក្រវាត់អន្តរជាតិ។

លោកណែនាំជើងខ្លាំងប្រដាល់កម្ពុជា ៤ រូប៖ ឌុន រដ្ឋា, ឯម វុត្ថា, នន ជំនិត និង រ៉ែន សុវត្ថិ និងកំពូលអ្នកប្រដាល់មកពីថៃ ២ រូបទៀត៖ ឡាយ ផាយាក់ និង ហា ឈៀងសៀន ដែលនឹងឡើងមកអង្រួនសង្វៀនក្នុងរដូវកាលថ្មីនេះ។

តំណាងស្រាបៀរលីអូរូបនេះបន្តថា៖ «យើងជឿជាក់ថា កីឡាករកម្ពុជាទាំងអស់សុទ្ធតែខ្លាំង មានការតស៊ូ និងពូកែទាំងការប្រកួតថ្នាក់ជាតិ និងអន្តរជាតិ។ នេះជាមោទនភាពមួយសម្រាប់ប្រជាជនកម្ពុជាទូទាំងប្រទេស ដើម្បីចូលរួមទស្សនាការប្រកួតរបស់កំពូលកីឡាករកម្ពុជា និងកីឡាករអន្តរជាតិល្បីៗ និងខ្លាំងៗជាច្រើនរូប។ ស្រាបៀរលីអូ នឹងនៅទីនេះដើម្បីលើកទឹកចិត្ត និងអបអររាល់ជ័យជម្នះរបស់កីឡាករកម្ពុជាទាំងអស់"។

អ្នកអាចចូលរួមទស្សនាការប្រកួត "កំពូលអ្នកប្រដាល់ស្រាបៀរលីអូ" ចាប់ពីថ្ងៃទី២២ មករា ២០១៧ តទៅ ខណៈការប្រកួត ធ្វើឡើងរៀងរាល់ថ្ងៃអាទិត្យ ចាប់ពីម៉ោង ៤ រសៀល ដល់ម៉ោង ៦ ល្ងាច នៅសង្វៀនស្ថានីយទូរទស្សន៍បាយ័នបឹងស្នោ និងផ្សាយបន្តផ្ទាល់លើកញ្ចក់ទូរស្សន៍បាយ័ន៕