ភាគថៃល្បីៗ ២ រឿង នឹងបញ្ចាំងដើមខែកុម្ភៈ នៅភីអិនអិន

2017-01-30 08:49:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈខ្សែភាពយន្តភាគថៃ ២ រឿង គឺ «ភ្លើងស្នេហ៍ភ្លើងគំនុំ» និង «សុភាពបុរសបវររុត» ដែលកំពុងចាក់បញ្ចាំងក្នុងម៉ោង ៩:០០-១០:០០ យប់ កាន់តែជិតដល់ភាគបញ្ចប់ រឿងភាគថៃថ្មី ២ រឿងផ្សេងទៀត គឺរឿង «សុភាពបុរសភុតធិផាត់» និងរឿង «ផ្ការីកក្រោមពពក» នឹងមកអង្រួនបេះដូងប្រិយមិត្តទស្សនិកជន ដោយនាំមកជាមួយរសជាតិគ្រប់បែបក្នុងសាច់រឿងទាំងពីរនេះ។

«ផ្ការីកក្រោមពពក» នឹងមកជំនួសរឿង «ភ្លើងស្នេហ៍ភ្លើងគំនុំ» ដែលនឹងចប់នៅថ្ងៃទី១ កុម្ភៈ នេះ។ ភាពយន្តនេះចូលរួមសម្តែងដោយស្រីស្រស់ប្រុសសង្ហា ដូចជា Denkhun Ngamnet (Prince Tawinnaron) ចាប់ដៃគូជាមួយ Tisha Tantiprasut (Mei/Meya) រួមទាំងតារាឆ្នើមៗជាច្រើនដួងទៀត។

«ផ្ការីកក្រោមពពក» ជាខ្សែភាពយន្តបែបថ្មីមួយទៀត តម្រូវឲ្យព្រះអង្គម្ចាស់ ថាវីន រាជទាយាទនៃវាំងថនឺន ត្រូវរត់គេចពីការតាមសម្លាប់របស់ឧត្ដមសេនីយ៍ ៣ នាក់។ ការរត់គេចនេះធ្វើឲ្យព្រះអង្គទៅដល់ប្រទេសថៃ ហើយក៏បានជួបជាមួយនារីម្នាក់គឺនាង ចម្ប៉ា។ បន្ទាប់ពីបានជួបគ្នា នាងចម្ប៉ា ក៏សម្រេចចិត្តរត់គេចជាមួយព្រះអង្គម្ចាស់ ថាវីន រហូតដល់ក្រុងបាងកក និងលាក់ខ្លួននៅកន្លែងលោតម៉ុងសាយ របស់ហ៊ាឆូតណាំឆ័យ ដោយលាក់ពីប្រវត្តិខ្លួន និងហាត់លោតម៉ុងសាយរហូតធ្វើឲ្យគេក្លាយជាអ្នកជំនាញលោតម៉ុងសាយ។ ប៉ុន្តែការរស់នៅរបស់ព្រះអង្គម្ចាស់មិនបានសុខស្រួលរហូតទេ ដោយសារតែឧត្ដមសេនីយ៍ទាំង៣នាក់នោះ នៅតែស៊ើបអង្កេត និងព្យាយាមតាមសម្លាប់ព្រះអង្គ។

អ្វីជាមូលហេតុពិតបណ្ដាលឲ្យឧត្ដមសេនីយ៍ទាំង៣នាក់នោះតាមសម្លាប់ព្រះអង្គបែបនេះ? តើខ្សែជីវិតព្រះអង្គអាចរត់គេចពីការតាមសម្លាប់នេះដោយរបៀបណា? បើចង់ដឹងច្បាស់ សូមកុំភ្លេចរង់ចាំតាមដានទស្សនារឿង «ផ្ការីកក្រោមពពក» ដែលនឹងផ្សាយជូនទស្សនាចាប់ពីថ្ងៃទី១ កុម្ភៈ រាល់ថ្ងៃចន្ទ ដល់ ពុធ វេលាម៉ោង ៩:០០ យប់តទៅ។

ដោយឡែក ភាគថៃមួយ «សុភាពបុរសភុតធិផាត់» នឹងមកបម្រើអារម្មណ៍ប្រិយមិត្តបន្ទាប់ពីរឿង «សុភាពបុរសបវររុត»។

«សុភាពបុរសភុតធិផាត់» ជាសុភាពបុរសទី៣នៃសុភាពបុរសទាំង៥។ ប្រិយមិត្តប្រាកដជាមិនខកបំណងឡើយជាមួយភាពយន្តមួយនេះ ដោយសារតែតារាដែលគ្រងដំណែងក្នុងរឿងនេះ គឺលោក James Jirayu (Khun Chai Puttipat) និងកញ្ញា Bella Ranee (Krongkaew) រួមនឹងតារាសម្តែងល្បីៗជាច្រើនទៀត។

តួអង្គ ភុតធិផាត់ សម្តែងដោយ James Ji ក្នុងរឿងនេះ គឺជាគ្រូពេទ្យកំលោះដ៏សង្ហា និងជាកូនអ្នកជំនួញចិនដ៏មានទ្រព្យម្នាក់។ វាសនាបានតម្រូវឲ្យគ្រូពេទ្យកំលោះម្នាក់នេះជួបនារីធម្មតាម្នាក់ (Krongkaew) ហើយក៏មានចិត្តស្រលាញ់ និងបានជួយនាងឲ្យរួចផុតពីស្រីស្នំរបស់ស្តេច ដោយរៀបគម្រោងរៀបការក្លែងក្លាយ ទាំងលាក់អារម្មណ៍ពិតរៀងៗខ្លួន ព្រោះតែមិនយល់ពីចិត្តគ្នា។

«សុភាពបុរសភុតធិផាត់» នឹងបញ្ចាំងនៅថ្ងៃទី២ កុម្ភៈ រាល់ថ្ងៃព្រហស្បតិ៍ ដល់ សៅរ៍ វេលាម៉ោង ៩:០០ យប់ បន្ទាប់ពីរឿង «សុភាពបុរសបវររុត»៕

ដោយ៖ សុផាត