ឯកឧត្តមរដ្ឋមន្ត្រីព័ត៌មានប្រាប់ពីតម្លៃទិញដីធ្វើទីលានជូនយុវជនកោះសូទិន

2017-02-15 03:48:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានទិញដីមួយកន្លែងដើម្បីធ្វើទីលានបាល់ទាត់ជូនភូមិ១៣ ឃុំកោះសូទិន ស្រុកកោះសូទិន ខេត្តកំពង់ចាមសម្រាប់ឲ្យយុវជននៅទីនោះមានទីលានលេងបាល់ទាត់ទៀងទាត់។

ឯកឧត្តម ខៀវ កាញ៉ារិទ្ធ

- ប្រគល់ដីទីលានតម្លៃជាង៧ពាន់ដុល្លារ

ជូនប្រាក់លើកទឹកចិត្តដល់ក្រុមទាំងពីរ
ចែកសម្ភារៈកីឡា
ចែកនំប័ង Tour les Jour ដល់អ្នកចូលរួមទស្សនា

កាលពីព្រឹកថ្ងៃទី១៤ ខែកុម្ភៈម្សិលមិញ ឯកឧត្តម ខៀវ កាញារីទ្ធ បានចុះទៅផ្តល់ទីលានបាល់ទាត់ជាផ្លូវការដល់អាជ្ញាធរឃុំកោះសូទិន និងមានទាំងការប្រកួតបាល់ទាត់មិត្តភាពរវាងក្រុមយុវជនកោះសូទិន និងក្រុមយុវជនក្រសួងព័ត៌មាន។ ឯកឧត្តមមានប្រសាសន៍ថា ៖«យើងចង់ឲ្យមន្ត្រីក្រសួងជាយុវជនបានចងសម្ព័ន្ធភាពជាមួយនឹងយុវជននៅតាមមូលដ្ឋាន ដូច្នេះក្រសួងបានរួមគ្នាដើម្បីទិញទីលានបាល់ទាត់នេះមួយសម្រាប់ជូនយុវជននៅកោះសូទិនដើម្បីហាត់ទាត់បាល់។ ទន្ទឹមជាមួយគ្នានេះ យើងក៏រៀបចំការប្រកួតមិត្តភាពដើម្បីរឹតចំណងមិត្តភាពដែរ។ ចំពោះតម្លៃនៃការទិញដីគឺអស់៧៥០០ដុល្លារអាមេរិក »។

ឯកឧត្តម ខៀវ កាញ៉ារិទ្ធ និងលោកជំទាវ

ជាមួយគ្នានេះ លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានបានបញ្ជាក់បន្ថែមថា កាលពីឆ្នាំមុនយុវជននៅទីនោះបានសំណូមពរសុំតារាងបាល់ទាត់មួយដល់ក្រសួងព័ត៌មាន ដោយសារនៅទីនោះគ្មានកន្លែងលេងពិតប្រាកដ។ ពួកគាត់ក៏បានប្រាប់ពីតម្លៃដីដែលមានគេលក់។ ក្រុមការងារក្រសួងបានជម្រាបជូនបញ្ហានេះដល់ ឯកឧត្តមរដ្ឋមន្ត្រី ខៀវ កាញារីទ្ធ ហើយឯកឧត្តមបានសម្រេចឲ្យទិញដីនេះជូនយុវជននៅកោះសូទិនតែម្តង។

លោកអគ្គនាយកបានបន្ថែមថា ក្រោយពេលមានទីលានពិតប្រាកដហើយ ក្រុមការងារក្រសួងបានពិភាក្សាជាមួយអាជ្ញាធរភូមិឃុំដើម្បីរៀបចំទីលាននេះឲ្យកាន់តែស្អាត និងគ្រោងរៀបចំការប្រកួតមិត្តភាព ឬពានមិត្តភាពប្រចាំឆ្នាំតែម្តងនាពេលខាងមុខ។

លោក ផុស សុវណ្ណ

នៅភូមិ១៣ ឃុំកោះសូទិន ស្រុកកោះសូទិន ខេត្តកំពង់ចាមជាតំបន់ខ្មែរ-ឥស្លាមដែលមានយុវជនច្រើនចូលចិត្តលេងបាល់ទាត់រាល់ថ្ងៃ ប៉ុន្តែពួកគាត់អាចលេងបានលើទីវាលស្រែអ្នកភូមិនៅពេលណាដែលមិនទាន់ដាំដំណាំ។ ប៉ុន្តែនៅពេលដីស្រែទាំងនោះត្រូវបានដាំដំណាំ ពួកគាត់គ្មានទីកន្លែងលេង ដូច្នេះហើយទើបបានជារដ្ឋមន្ត្រីក្រសួងព័ត៌មានសម្រេចទិញដីនេះជូនយុវជននៅទីនោះតែម្តង។

ក្នុងពិធីប្រគល់ទីលានកាលពីម្សិលមិញ ឯកឧត្តមរដ្ឋមន្ត្រីក៏បានផ្តល់ប្រាក់លើកទឹកចិត្តដល់ក្រុមបាល់ទាត់ទាំងពីរដែលមួយៗក្រុមទទួលបាន១លានរៀល បាល់ចំនួន៤០គ្រាប់ សំណាញ់ទីលាន១ឈុត សំណាញ់បាល់ទះ២ ចែកនំប័ង Tour les Jour ដល់សិក្សានុសិស្ស និងអ្នកភូមិដែលបានចូលរួមកម្មវិធីនេះដែរ៕

សូមទស្សនាប្រសាសន៍របស់ឯកឧត្តម ខៀវ កាញ៉ារីទ្ធ និង ផុស សុវណ្ណ