Duterte នឹងលាលែងតំណែងភ្លាម បើរកភស្តុតាងបញ្ជាក់រឿងមួយនេះបាន

2017-02-17 09:18:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីហ្វីលីពីន លោក Rodrigo Duterte បាននិយាយថា លោកត្រៀមខ្លួនរួចជាស្រេចក្នុងការលាលែងតំណែង ប្រសិនបើគូប្រឆាំងអាចរកភស្តុតាងបញ្ជាក់ ពីការចោទប្រកាន់ថា លោកបានទទួលលុយ ចំនួន៤០លានដុល្លារដោយខុសច្បាប់។

ប្រធានាធិបតីហ្វីលីពីន លោក Rodrigo Duterte

សមាជិកព្រឹទ្ធសភា លោក Antonio Trillanes ដែលបាននាំពាក្យបណ្ដឹងប្រឆាំងលើ លោក Duterte ក្នុងអំឡុងពេលយុទ្ធនាការបោះឆ្នោត កាលពីឆ្នាំមុន បានបន្ថែមថា ប្រធានាធិបតីហ្វីលីពីនរូបនេះ ក៏មិនបានបង្ហាញប្រតិបត្តិការធនាគារ នៃទឹកប្រាក់ចំនួន១៥លានដុល្លារ ផ្សេងទៀត របស់ភរិយា និងកូនស្រីរបស់លោកផងដែរ។

«ប្រសិនបើ លោក Trillanes អាចបញ្ជាក់ពីការចោទប្រកាន់របស់លោក ថាខ្ញុំទទួលយកលុយដោយខុសច្បាប់ ឬគណនីធនាគារ ដែលស្ថិតក្រោមឈ្មោះរបស់ខ្ញុំ បានដកប្រាក់លើសពីកន្លះលាន ខ្ញុំនឹងលាលែងពីតំណែងជាប្រធានាធិបតីភ្លាម»។ នេះបើតាមសាររបស់ លោក Duterte បង្ហោះលើទំព័រហ្វេសប៊ុក។

ជាមួយគ្នានេះដែរ លោក Duterte បានហៅការចោទប្រកាន់នេះថា ជារឿងចាស់គំរឹល និងបង្កឡើងដដែលៗ៕

ប្រភព៖ Bloomberg ប្រែសម្រួល៖ សេង ឡុង