U-15 សាលាបាទីទៅប្រកួតពានមួយនៅថៃ ខណៈ U-17 ទៅហាត់នៅជប៉ុន ១០ថ្ងៃ

2017-02-22 02:20:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់យុវជនសាលាបាល់ទាត់ជាតិបាទីខេត្តតាកែវក្រោមអាយុ១៧ ឆ្នាំ នឹងទៅហ្វឹកហាត់នៅជប៉ុនចំនួន ១០ថ្ងៃគ្រោងចេញដំណើរថ្ងៃទី១៧ ខែមីនា ឆ្នាំ២០១៧ ខណៈយុវជនក្រោមអាយុ ១៥ឆ្នាំសាលាបាល់ទាត់បាទី នឹងទៅចូលរួមប្រកួតពានរង្វាន់យុវជន Asian Dream នៅទីក្រុងបាងកកប្រទេសថៃនាថ្ងៃទី១៩ ខែមីនា ឆ្នាំ២០១៧។

U-16 កាលពីឆ្នាំមុន ដែលឆ្នាំនេះជា U-17

តាមប្រភពច្បាស់ការបានឲ្យដឹងថា ក្រុមយុវជនក្រោមអាយុ ១៧ ឆ្នាំរបស់សាលាបាល់ទាត់ជាតិបាទីខេត្តតាកែវចំនួន ២០រូបរួមទាំងគ្រូបង្វឹកចំនួន៥រូប នឹងធ្វើការហ្វឹកហាត់នៅទីក្រុង កាស៊ីម៉ា ប្រទេសជប៉ុនចំនួន១០ថ្ងៃ។ ក្រោយបញ្ចប់ភារកិច្ចហ្វឹកហាត់ នឹងត្រឡប់មកវិញនាថ្ងៃទី២៨ ខែមីនា ឆ្នាំ២០១៧។

ចំណែកក្រុមបាល់ទាត់យុវជនក្រោមអាយុ ១៥ ឆ្នាំរបស់សាលាបាល់ទាត់បាទីខេត្តតាកែវ នឹងទៅចូលរួមប្រកួតក្នុងពានរង្វាន់ខាងលើ ដោយមានកីឡាករចំនួន ២០រូប និងគ្រូបង្វឹកចំនួន៥ រូប។ បញ្ចប់ភារកិច្ចក្រុមកីឡាករ នឹងត្រឡប់មកវិញនាថ្ងៃទី២៧ ខែមីនា ឆ្នាំ២០១៧។

កាលពីពេលថ្មីៗនេះក្រុមយុវជនសាលាបាល់ទាត់បាទី U17 បានលត់ក្រុមបាល់ទាត់យុវជន U16 ជម្រើសជាតិឆៃនីសតៃប៉ិ ១០-០ ខណៈក្រុមសាលាបាល់ទាត់បាទី U15 យកឈ្នះក្រុមបាល់ទាត់ U15 ឆៃនីសតៃប៉ិ២-១ ក្នុងជំនួបមិត្តភាពអន្តរជាតិ។ U-17 ជាយុវជន U-16 របស់សាលាបាល់ទាត់បាទីកាលពីឆ្នាំមុន ខណៈ U-15 ជាយុវជន U-14 របស់សាលាបាទីកាលពីឆ្នាំមុន៕

អត្ថបទ៖ ស្រី សុវណ្ណដារ៉ា