ចូលទីផ្សារក្រោយគេ តែIsuzu មានមហិច្ឆតាកប់

2017-03-10 03:33:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ទើបតែបោះជំហានផ្លូវការចូលទីផ្សារពាក់កណ្ដាលឆ្នាំ ២០១៦ ប៉ុន្តែIsuzu បានបង្ហាញជំហរ និងពង្រីកវិសាលភាពលក់ខ្លាំងសម្បើម ឬធ្វើយ៉ាងណាដណ្ដើមឲ្យបាន ៣០% នៃចំណែកទីផ្សារសរុបពីបណ្ដាក្រុមហ៊ុនខ្លាំងៗដទៃ។

កាលពីឆ្នាំកន្លងទៅ Isuzu លក់រថយន្តខ្លួនបាន ១៣០គ្រឿងទាំងម៉ូដែល Pick-up (ជិត៥%) និង SUV Mu-X ។ជុំវិញផែនការពន្លូតខ្លួនចូលទីផ្សារ ឲ្យឆាប់ និងធំធាត់ តាមរយៈបង្កើនតួលេខក្នុងកម្រិតតិចតួចឲ្យបាន ៣០% នៃទីផ្សារសរុប ឬ ១ពាន់គ្រឿងក្នុងមួយឆ្នាំ (តែ Pick-up) នាយកគ្រប់គ្រងទូទៅ ការិយាល័យតំណាងប្រចាំរាជធានីភ្នំពេញ លោក អាគីរ៉ា អូដាហ្គាគិ លើកឡើងថា ពិតជាអាចទៅរួច ប៉ុន្តែមិនមែនមួយថ្ងៃធ្វើបានទេ។

លោកថា "២០១៧ យើងសង្ឃឹមខ្ពស់ថានឹងលក់ឲ្យបាន ២០០គ្រឿង ហើយ៥ឆ្នាំខាងមុខ យើងដាក់ផែនការដល់ ១ពាន់គ្រឿងទាំងPick-up និងSUV។ ហើយប្រាំឆ្នាំខាងមុខនេះ យើងនឹងធ្វើឲ្យPick-up យើងរីកពី៥% ទៅ ៣០%”។

និយាយដល់រឿងដៃគូប្រកួតប្រជែង (រថយន្តថ្មី) អូដាហ្គាគិថា ក្រុមហ៊ុនលោកមកក្រោយគេជាបញ្ហាចម្បង ក្រៅពីនេះទីផ្សាររថយន្តជជុះក៏មិនបានធ្វើឲ្យIsuzu បារម្ភដែរ។

Pick-up ត្រកូល D-max របស់ក្រុមហ៊ុនជប៉ុនដែលតម្លើងរោងចក្រផលិតចំនួន២នៅថៃ ជាPick-up ដែលលក់ដាច់បំផុតនៅទឹកដីថៃ។

បច្ចុប្បន្នការិយាល័យតំណាងក្រុមហ៊ុនខាងលើបានសម្រេចចិត្តប្រកាសផ្លូវការកាលពីពាក់កណ្ដាលឆ្នាំ២០១៦ ហើយយករថយន្តតែ ២ម៉ូដែលប៉ុណ្ណោះផ្គត់ផ្គង់ទីផ្សារកម្ពុជា គឺ៖ ១/ ប្រភេទPick-up៖ D-Max ម៉ាស៊ីន2.5L/3.0L មានជម្រើសទាំងលេខដៃ ឬអូតូ។ តម្លៃចាប់ពី ២៨ ០០០ ទៅ ៤៥ ៩០០ដុល្លារអាមេរិក។ ២/ ប្រភេទSUV៖ Mu-X ម៉ាស៊ីន3.0Lដែលមានតម្លៃ ៤៧ ០០០ ឬ៥៦ ០០០ដុល្លារអាមេរិក។

អត្ថបទ៖ ខ្លាឃ្មុំតូច