មានរឿងអ្វីសុខៗ Jay Chou សម្រេចចិត្តលុបចោលការប្រគំតន្ត្រីធំរបស់ខ្លួន

2017-03-24 07:08:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងល្បីរបស់តៃវ៉ាន់ Jay Chou បានធ្វើឲ្យអ្នកគាំទ្រខកចិត្ត បន្ទាប់លោកបានសម្រេចចិត្តរំសាយការប្រគំតន្ត្រីរបស់ខ្លួននៅក្នុងក្រុងមួយនៃប្រទេសចិន។

Jay Chou ត្រូវបានគេចាត់ទុកថាជាបុរសដ៏រវល់ម្នាក់ បន្ទាប់ពីបញ្ចប់ការប្រគំតន្ត្រី "The Invicible World Tour” របស់លោកកាលពីឆ្នាំ ២០១៦មក ហើយក៏គ្រោងធ្វើការប្រគំតន្ត្រីទេសចរណ៍របស់ខ្លួននៅក្នុង ទីក្រុងមួយចំនួនទៀតក្នុងប្រទេសចិនដែរ ដូចជា៖ ទីក្រុង Qingdao, Fuzhou និង Changsha ជាដើម។

ប៉ុន្តែក្នុងនោះ អ្នកគាំទ្រមួយចំនួនក្នុងទីក្រុង Chengdu មានការអាក់អន់ចិត្ត នៅពេលដឹងថា ការប្រគំតន្ត្រីរបស់ Jay Chou ត្រូវរំសាយចោល ។

ដោយសារបញ្ហានេះ អ្នកប្រើប្រាស់ប្រព័ន្ធអ៊ីនធឺណិតក៏បានព្យាយាមស្វែងរកនូវ មូលហេតុ នៅពីក្រោយការរំសាយការប្រគំតន្ត្រីនោះ ។ រាល់ចម្ងល់ត្រូវបានស្រាយចេញ គឺដោយសារ ពហុកីឡាដ្ឋាន "Chengdu Sports Centre Stadium” ដែលជារឿយត្រូវបានប្រើប្រាស់ធ្វើជាកន្លែងប្រគំតន្ត្រីនោះ មានការជីករណ្ដៅ នាំឲ្យអាក់ខានព្រឹត្តិការណ៍ដ៏ធំ។

តាមសេចក្ដីរាយការណ៍បាននិយាយថា វត្ថុសិល្បៈជាច្រើនក្នុងសម័យរាជវង្ស “Ming” ត្រូវបានកប់នៅក្រោមពហុកីឡដ្ឋាននោះ ដែលនាំឲ្យអាជ្ញាធរសម្រេចចិត្ត ជីកកកាយឡើងវិញ។

ខាងផលិតកម្ម "JVR Music" របស់ Jay Chou ក៏បានចេញមុខបកស្រាយ ចំពោះបញ្ហាអាក់ខានការប្រគំតន្ត្រីនេះដែរថា ពួកគេមិនអាចស្វែងរកទីតាំងមួយផ្សេង សម្រាប់ការសម្ដែងបានទេ បន្ទាប់ពីទទួលដំណឹងថា ពហុកីឡដ្ឋាននោះស្ថិតក្រោម ការកែសម្រួល។

មួយវិញទៀតខាងផលិតកម្មដដែល ក៏បានសំណូមពរទៅដល់អ្នកគាំទ្រទាំងអស់ សូមទៅទស្សនាការប្រគំតន្ត្រីនៅទីក្រុងក្បែរៗនោះវីញ ដូចជា ទីក្រុង Chongqing និង Kungming ជាដើម៕

ប្រភព៖ entertainment.toggle ប្រែសម្រួល៖ យី សុធារី