ហម ឈរ៉ា បន្តអំពាវនាវអ្នកលេងហ្វេសប៊ុក កុំសរសេរពាក្យអង់គ្លេសជាសំនៀងខ្មែរ

2017-04-04 05:01:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿយៗ ដែលតារាសម្ដែងជើងចាស់ ហម ឈរ៉ា តែងតែមានប្រតិកម្មលើបញ្ហាដែលអ្នកប្រើប្រាស់បណ្ដាញសង្គមហ្វេសប៊ុកសរសេរអក្សរឡាតាំងជាសំនៀងខ្មែរ ក្នុងនោះមានប្រិយមិត្តខ្លះគាំទ្រ ខ្លះមិនពេញចិត្ត តែលោកថានៅតែបន្តធ្វើបែបនេះដើម្បីប្រយោជន៍អក្សរជាតិខ្មែរ។

លោកធ្វើនេះមិនមែនជាប្រយោជន៍បុគ្គល ឬជោរដើម្បីទាក់ទាញចំណាប់អារម្មណ៍ទេ តែដើម្បីប្រយោជន៍រួម ដើម្បីឲ្យបរទេសដឹងថាយើងក៏មានអក្សរជាតិយើងដែរ។ ហើយការដែលសរសេរឡាតាំងជាសំនៀងខ្មែរនេះវាធ្វើឲ្យលោកមានការបារម្ភយ៉ាងខ្លាំង ទី១វាអាចក្លាយជាទម្លាប់អាក្រក់ដែលអ្នកប្រើប្រាស់បណ្ដាញសង្គមចេះតែប្រើវិធីនេះ ទី២វាអាចធ្វើកូនខ្មែរសរសេរអក្សរខ្មែរលែងត្រូវ។

តារាប្រុសប្រចាំទសវត្ស៨០រូបនេះបញ្ជាក់ថា សូមកុំយល់ច្រឡំថានេះជាការហាមប្រាមមិនឲ្យសរសេរអង់គ្លេស តែនេះលោកគ្រាន់តែសំណូមពរ កុំឲ្យមានការសរសេរឡាតាំងជាសំនៀងខ្មែរ យ៉ាងណាមិញលោកក៏មិនមែនជាបណ្ឌិត ឬអ្នកចេះខ្លាំងអីដែរ ពេលខ្លះលោកក៏មានកំហុសក្នុងការសរសេរអក្សរខ្មែរដូចគ្នាតែលោកតែងមានការប្រុងប្រយ័ត្នក្នុងការសរសេរ ព្រោះលោកមានឆន្ទៈក្នុងការលើកស្ទួយអក្សរជាតិ។

ក្រៅពីការប្រតិកម្មលើបណ្ដាញសង្គមបែបនេះលោកក៏មានគម្រោងអំពាវនាវតាមរូបភាពផ្សេងមួយទៀតគឺតាមធ្វើស្ពតពាណិជ្ជកម្ម។ "ពីមុនបងក៏ធ្លាប់និយាយជាមួយប្អូន សុខ ជំនោរ ថានឹងធ្វើស្ពតអប់រំមួយស្ដីពីការប្រើប្រាស់អក្សរខ្មែរនេះដែរ ប៉ុន្តែក្រោយមកប្អូន សុខ ជំនោរ មានការរវល់ច្រើនក៏មិនបានធ្វើ ប៉ុន្ដែនៅពេលក្រោយបងជួបគាត់បងនឹងរុញគាត់ម្ដងទៀតទាក់ទងនឹងបញ្ហានេះ"។ ហម ឈរ៉ា ថ្លែង៕

អត្ថបទ៖ សុខណា