អាលែកហ្សី ច្រមុះ ជាជំងឺតពូជ?

2017-04-07 07:43:01
ចំនួនមតិ 0 | ចំនួនចែករំលែក 0

ចន្លោះមិនឃើញ

វេជ្ជបណ្ឌិត សុខ គួង បានថ្លែងក្នុងសន្និសីទទិវាប្រឆាំងជំងឺអាល្លែកហ្សីពិភពលោក ២០១៧ នៅសណ្ឋាគារ ភ្នំពេញ ថ្ងៃទី៦ មេសានេះថា អាល្លែកហ្សីអាចជាជំងឺតពូជ។

លោកសុខ គួង បន្ថែមថា ក្មេងអាចកើតអាល្លែកហ្សី ៣០% ទៅ ៥០% ប្រសិនបើគាត់មានឪពុក ឬម្ដាយកើតអាល្លែកហ្សី ហើយបើសិនមានជំងឺនេះទាំង ២នាក់ កូនមានឱកាសកើតពី ៥០% ទៅ ៧០%។

វេជ្ជបណ្ឌិត សុខ គួង

ក្នុងកម្មវិធីខាងលើនេះ និយាយពីជំងឺអាល្លែកហ្សីច្រមុះ ដោយមានវាគ្មិន ៣រូប ជាអ្នកឯកទេសត្រចៀក ច្រមុះ បំពង់ក នៃមន្ទីរពេទ្យអង្គឌួង គឺវេជ្ជបណ្ឌិត សុខ គួង, វេជ្ជបណ្ឌិត ឃុន ឃាង, និងលោកសាស្ត្រាចារ្យ សុក សំអាត ដែលរៀបចំដោយក្រុមហ៊ុន GSK ដើម្បីប្រឆាំងនឹងជំងឺអាល្លែកហ្សីច្រមុះក្នុងទិវាជំងឺអាល្លែកហ្សីពិភពលោកដែលធ្វើចាប់ពីថ្ងៃទី២ ដល់ ៨ មេសា ២០១៧។

លោកឃុន ឃាង បានប្រាប់ពីមូលហេតុនាំឲ្យកើតជំងឺនេះថា បរិស្ថានខាងក្រៅដូចជាដីហុយ បរិយាកាសអាប់អួជាដើមដែលនាំឲ្យកើតជំងឺនេះ ដែលហៅថាកត្តាខាងក្រៅ។ មួយទៀតគឺកត្តាខាងក្នុងដូចជាបន្ទប់ មុង ភួយជាដើម ដែលយើងមិនបានសំអាតឲ្យបានត្រឹមត្រូវ។

លោកក៏បានឲ្យគន្លឹះពីវិធីការពារថា៖ "ប្អូនជាវេជ្ជបណ្ឌិតព្យាបាលអាល្លែកហ្សីដោយខ្លួនឯង"។ មានន័យថា យើងត្រូវកត់សម្គាល់ដោយខ្លួនឯងថា មានប្រតិកម្មនឹងអី ក្រោយពីដឹងហើយ យើងត្រូវការពារវា។