ចូលរួមកុំខាន! ព្រឹត្តិការណ៍សប្បុរសធម៌ «Run & Ride» ប្រមូលថវិកាជួយសាលាតាមខេត្ត

2017-04-11 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍សប្បុរសធម៌ដ៏ធំមួយ គឺ«Run & Ride សប្បុរសធម៌ដើម្បីកម្ពុជា ២០១៧ » រៀបចំឡើងដោយក្រុមហ៊ុនខ្មែរប៊ែវើរីជីស បានប្រកាសគ្រោងនឹងធ្វើនៅភ្នំពេញ ថ្ងៃទី ២៩ និង ៣០ ខែមេសា ២០១៧ នេះដើម្បីប្រមូលថវិកាជួយកែលម្អហេដ្ឋារចនាសម្ព័ន្ធ និងឧបត្ថម្ភសម្ភារៈសិក្សាដល់សាលាខ្វះខាតនៅតាមខេត្តមួយចំនួននៅកម្ពុជា។ ការប្រកាសនេះបានធ្វើឡើងនៅ ក្នុងសន្និសីតសារព័ត៌មានផ្លូវការមួយដែលរៀបចំឡើងនៅទីតាំងរោងចក្រផលិតស្រាបៀរកម្ពុជារបស់ក្រុមហ៊ុនខ្មែរប៊ែវើរីជីសកាលពីព្រឹកម្សិលមិញនេះ។

នេះជាកម្មវិធីប្រកួតរត់ពាក់កណ្តាលម៉ារ៉ាតុង និងការប្រណាំងកង់ សរុបប្រាំវិញ្ញាសារ ដែលអ្នកឈ្នះនឹងទទួលបានរង្វាន់ជាទឹកប្រាក់រង្វាន់ធំបំផុត គឺ ១៥០០ដុល្លារ និងមានជាច្រើនរង្វាន់ទៀត។ ដើម្បីចូលរួមប្រកួត បេក្ខជននីមួយៗ ត្រូវទិញសំបុត្រតម្លៃចាប់ពី ៥ដុល្លារឡើងទៅអាស្រ័យតាមវិញ្ញាសារ។ ចំនុចចាប់ផ្តើមនៃការប្រកួតទាំងអស់ គឺនៅមុខសាលមហោស្រពកោះពេជ្រ ដោយចេញដំណើរចាប់ពីម៉ោង ៦ព្រឹកតទៅ។

ថ្លែងក្នុងឱកាសនោះ លោក លាង ពៅ អគ្គនាយកក្រុមហ៊ុនខ្មែរប៊ែវើរីជីស បានឲ្យដឹងថា ៖

« ក្រុមហ៊ុននឹងទទួលរ៉ាប់រងរាល់ការចំណាយទាំងអស់ក្នុងការរៀបចំកម្មវិធីសប្បុរសធម៌នេះ ដូច្នេះថវិការដែលទទួលបានពីការលក់សំបុត្រទាំងស្រុងនឹងយកទៅជួយសាលាខ្វះខាតទាំងអស់ »

លោកបន្ថែមថា ៖ «យើងរំពឹងទុកថានឹងមានអ្នកចុះឈ្មោះប្រហែល ២ពាន់នាក់ ចូលរួមក្នុងកម្មវិធីរយៈពេលពីរថ្ងៃនេះដែលអាចឲ្យយើងប្រមូលថវិកាបានប្រមាណ ៧ម៉ឺនដុល្លារយកទៅជួយសាលាដែលកំពុងខ្វះខាត»។

កន្លងមកក្រុមហ៊ុនខ្មែរប៊ែវើរីជីស បានជួយកែលម្អហេដ្ឋារចនាស័ម្ពន្ធសាលាចំនួនបីនៅភ្នំពេញ រួមមាន ៖ វិទ្យាល័យជាស៊ីមសាមគ្គី វិទ្យាល័យទួលអំពិល និង បឋមសិក្សា-អនុវិទ្យាល័យដង្កោ ។

លោក លាង ពៅ បានមានប្រសាសន៍ថា ៖ « យើងពិតជាមានមោទនៈភាពចំពោះក្រុមហ៊ុនដែលវិនិយោគដោយកូនខ្មែរ១០០% អាចរួមចំណែកលើកស្ទួយវិស័យអប់រំសម្រាប់កូនខ្មែរដែលជាវិស័យស្នូលមួយរបស់ប្រទេសកម្ពុជាយើង»