មកដឹងប្រវត្តិ គីម ជុងអ៊ុន មុនពេលក្លាយជាមេដឹកនាំកូរ៉េខាងជើង

2017-04-19 08:36:07
ចំនួនមតិ 0 | ចំនួនចែករំលែក 0

ចន្លោះមិនឃើញ

កូរ៉េខាងជើង បានបាញ់សាកល្បងនុយក្លេអ៊ែរ ជាច្រើនដងរួចមកហើយ ស្ថិតក្រោមការគ្រប់គ្រងរបស់មេដឹកនាំផ្ដាច់ការ គីម ជុងអ៊ុន ខណៈមនុស្សមិនច្រើនឡើយ បានស្គាល់ពីប្រវត្តិមេដឹកនាំរូបនេះ។

ខាងក្រោមនេះ គឺជាប្រវត្តិខ្លះៗមុនពេល លោក គីម ជុងអ៊ុន ក្លាយខ្លួនជាមេដឹកនាំកូរ៉េខាងជើង៖

#១ លោក គីម ជុងអ៊ុន បានកើតនៅថ្ងៃទី០៨ ខែមករា ឆ្នាំ១៩៨៤ (អាយុ៣៣៦ឆ្នាំ)

លោកស្រី Ko Young Hee និង លោក គីម ជុងអ៊ីល (Kim Jong Il)

លោកមានឪពុកឈ្មោះ គីម ជុងអ៊ីល (Kim Jong Il) និងម្តាយឈ្មោះ Ko Young Hee។ លោកមានបងប្អូនចំនួន៤នាក់ គឺ លោក Kim Jong Nam (ស្លាប់) លោក Kim Jong Chul (បងប្រុស) នាង Kim Sul Song (ប្អូនស្រី) និង នាង Kim Yo Jong (បងស្រី)។

#២ លោក គីម ជុងអ៊ុន រស់នៅជាមួយម្ដាយ

លោកស្រី Ko Young Hee និង លោក គីម ជុងអ៊ុន

នៅក្នុងអំឡុងពេលនោះ កូរ៉េខាងជើង ត្រូវបានគ្រប់គ្រងដោយមេដឹកនាំដ៏អស្ចារ្យ គីម អ៊ីលស៊ុង (Kim Il Sung) ដែលត្រូវជាជីតារបស់លោក។ នៅពេលនោះ លោក គីម ជុងអ៊ីល (ឪពុករបស់លោក) គឺជាទាយាទស្នងតំណែង ខណៈផ្លូវជីវិតរបស់លោក គីម ជុងអ៊ុន នៅស្រពិចស្រពិលនៅឡើយ។

#៣ លោក គីម ជុងអ៊ុន ចេញទៅសិក្សានៅក្រៅប្រទេស

អ្នកនៅទីនោះបានហៅលោកថា ប៉ាក់អ៊ុន (Pak Un)។ គេជឿជាក់ថា លោកបានសិក្សានៅសាលាអន្តរជាតិមួយ នៅទីក្រុង Gümligen ក្បែរទីក្រុង Bern ប្រទេសស្វីស។ លោកត្រូវបានអតីតមិត្តរួមថ្នាក់ចាត់ទុកថាជា «សិស្សស្ងប់ស្ងាត់ម្នាក់» ដែលចំណាយពេលច្រើននៅផ្ទះ ប៉ុន្តែលោកក៏ចូលចិត្តកំប្លុកកំប្លែងដែរ។

#៤ លោក គីម ជុងអ៊ុន ចូលចិត្តកីឡាបាល់បោះ និងជាអ្នកគាំទ្ររបស់កីឡាករ Michael Jordan

កីឡាករបាល់បោះ Michael Jordan

លោកមានផ្ទាំងរូបភាពរបស់កីឡាករបាល់បោះ Jordan បិទពេញជញ្ជាំង ក្នុងអំឡុងពេលទៅសិក្សានៅប្រទេសស្វីស។ បើទោះបីជា លោកលើសទម្ងន់ និងមិនសូវជាខ្ពស់ប៉ុន្មាន (១,៧០ម៉ែត្រ) តែលោកជាអ្នកលេងបាល់បោះពូកែសមរម្យម្នាក់។

#៥ ក្រោយបញ្ចប់ការសិក្សានៅប្រទេសស្វីស លោកបានវិលត្រឡប់មកសិក្សាផ្នែកយោធា នៅកូរ៉េខាងជើង

លោកបានចូលសិក្សាផ្នែកយោធានៅឯសកលវិទ្យាល័យ «Kim Il Sung Military University» ជាមួយបងប្រុស។ របាយការណ៍មួយចំនួន បានឲ្យដឹងថា ពួកគេបានចាប់ផ្ដើមចូលបម្រើការផ្នែកអធិការកិច្ច នៅអំឡុងឆ្នាំ២០០៧។

ខណៈពេលដែលលោក គីម ជុងអ៊ីល ប្រឈមមុខនឹងសេចក្ដីស្លាប់ លោក គីម ជុងអ៊ុន ត្រូវបានតែងតាំងឡើងយ៉ាងឆាប់រហ័ស ដើម្បីដឹកនាំនយោបាយ និងយោធា បើទោះបីជាមានបទពិសោធន៍តិចតួចក្តី។ កាលនោះ លោកត្រូវបានតែងតាំងជា អនុប្រធាននៃគណៈកម្មការយោធាកណ្ដាល នៃគណបក្ស Worker's Party និងជាសមាជិកគណៈកម្មាធិការកណ្ដាល (ពាក់ផ្កាយ៤) ផងដែរ។

#៦ លោក គីម ជុងអ៊ុន មានបទចម្រៀងមួយបទ មានចំណងជើងថា «Footsteps»

ចម្រៀងមួយបទនេះ ច្រៀងដើម្បីឲ្យប្រជាជនស្ដាប់ និងដើរតាមគន្លងរបស់លោក។

#៧ ជនជាតិកូរ៉េខាងជើង មើលឃើញលោក គីម ជុងអ៊ុន ជាកំណែយុវវ័យ (Youthful Version) នៃមេដឹកនាំដ៏អស្ចារ្យ គីម អ៊ីលស៊ុង

លោក គីម ជុងអ៊ុន និងជីតា គីម អ៊ីលស៊ុង

លោកមានលក្ខណៈដូចគ្នាច្រើនជាមួយជីតា គីម អ៊ីលស៊ុង ទាំង រូបរាង ម៉ូដសក់ និង ឫកពា ជាដើម។

#៨ បន្ទាប់ពីឪពុកស្លាប់ លោក គីម ជុងអ៊ុន ត្រូវបានតែងតាំងជា កំពូលមេដឹកនាំនៃកូរ៉េខាងជើង

លោក គីម ជុងអ៊ីល

នៅពេលដែលលោក គីម ជុងអ៊ីល បានស្លាប់ដោយសារជំងឺគាំងបេះដូង នៅថ្ងៃទី១៧ ខែធ្នូ ឆ្នាំ២០១១ លោក គីម ជុងអ៊ុន ដែលជាកូនប្រុសបង្កើត បានទទួលឥទ្ធិពលយោធាធំបំផុតលើពិភពលោកលំដាប់ទី៤ ឃ្លាំងអាវុធនុយក្លេអ៊ែរ និងគ្រប់គ្រងប្រទេសកូរ៉េខាងជើង។ លោក គីម ជុងអ៊ុន បានឡើងកាន់តំណែង កាត់មុខបងប្រុស Kim Jong Chol ដោយសារតែបងប្រុសរបស់ខ្លួនទន់ខ្សោយពេក។

#៩ លោក គីម ជុងអ៊ុន បានរៀបការ និងមានកូន២នាក់

លោក គីម ជុងអ៊ុន និង ភរិយា Ri Sol Ju

ប្រព័ន្ធផ្សព្វផ្សាយរបស់កូរ៉េខាងជើង បានបង្ហាញឲ្យដឹងថា លោក គីម ជុងអ៊ុន បានរៀបការជាមួយភរិយា ឈ្មោះ Ri Sol Ju ដែលជាអតីតតារាចម្រៀង និងជាអ្នករាំលើកទឹកចិត្ត (Cheerleader) ប៉ុន្តែគ្មាននរណាម្នាក់ដឹងច្បាស់ថា ពួកគេបានរៀបការនៅពេលណាឡើយ។

អ្នកស៊ើបការណ៍សម្ងាត់របស់កូរ៉េខាងត្បូង ជឿជាក់ថា ពួកគេទាំង២ ប្រហែលជាបានរៀបការនៅក្នុងឆ្នាំ២០០៩ និងមានកូនម្នាក់រួចទៅហើយ។ ជាមួយគ្នានេះដែរ ក៏មានពាក្យចចាមអារ៉ាមថា លោកស្រី Ri Sol Ju បានផ្ដល់កំណើតឲ្យកូន នៅក្នុងឆ្នាំ២០១២ ហើយជាកូនស្រី។ មិនតែប៉ុណ្ណោះ គេជឿជាក់ថា ប្ដីប្រពន្ធដ៏សម្ងាត់មួយគូនេះ មានកូនម្នាក់ទៀត នៅក្នុងឆ្នាំ២០១៥៕

ប្រភព៖ Businessinsider ប្រែសម្រួល៖ សេង ឡុង