ចំណាយលុយរាប់ម៉ឺនដុល្លារ ចិញ្ចឹមពីងពាងពិស ១៥០០ក្បាល មិនខ្លាចញញើតសូម្បីបន្តិច

2017-05-04 06:13:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជនជាតិឥណ្ឌូនេស៊ី វ័យ២៨ឆ្នាំម្នាក់ មានឈ្មោះថា Ming Cu បានប្រមូលសត្វពីងពាងពិស Tarantula ចាប់តាំងពីឆ្នាំ២០១០ សរុបប្រមាណជា ១ ៥០០ក្បាល និងរស់នៅជាមួយពួកវា ក្រោមដំបូលផ្ទះតែមួយទៀតផង ដោយមិនខ្លាចញញើតសូម្បីតែបន្តិច។

ជាមួយគ្នានេះដែរ នាង Cu បានទទួលរហស្សនាមថា «Queen Tarantula» បន្ទាប់ពីស្ត្រីក្លាហានរូបនេះ ចាត់ទុកពីងពាងពិសទាំងនោះ ជាសត្វចិញ្ចឹម។ មិនតែប៉ុណ្ណោះ ស្ត្រីដែលជាអ្នកស្រុក Bandung រូបនេះ ថែមទាំងបានបង្កើតគេហទំព័រមួយ ឈ្មោះថា «Spider Lover Pet Shop» ដែលនាងបានដាក់លក់សត្វចិញ្ចឹមដ៏ចម្លែកនេះ តាមអនឡាញទៀតផង។

នាង Cu ដែលជាអ្នកបង្កាត់ពូជសត្វម្នាក់ បានសារភាពថា ធ្លាប់ត្រូវសត្វពីងពាងពិសនោះខាំប៉ុន្មានដងដែរ ប៉ុន្តែវាមិនអាចបញ្ឈប់សេចក្ដីស្រលាញ់នាង ចំពោះពួកវាបានឡើយ ហើយបើទោះបីជាដៃគូ និងមិត្តភ័ក្ដិដែលចាប់ផ្ដើមជាមួយគ្នា បានបោះបង់អាជីពនេះចោលក៏ដោយ។

«បញ្ហាប្រឈមក្នុងការចិញ្ចឹម និងរក្សាសត្វពីងពាងពិសរាប់ពាន់ក្បាលនេះ គឺ ខ្ញុំធ្វើវាតែម្នាក់ឯង ហើយវាត្រូវការពេលវេលាច្រើន»។ នេះបើតាមសម្ដី នាង Cu។

បើយោងតាមប្រភពព័ត៌មាន បានឲ្យដឹងថា នាង Cu បានជាប់ចិត្តស្រលាញ់សត្វពីងពាង តាំងពី៧ឆ្នាំមុន នៅពេលដែលនាងបានថតរូប សត្វពីងពាង នៅខាងក្រោយផ្ទះ។ បន្ទាប់មកនាងបានដើរស្វែងរកទិញសត្វពីងពាងតែម្ដង។ នាង Cu បានឲ្យដឹងថា នាងចំណាយប្រាក់ប្រហែល ៥៥ ០០០ដុល្លារហើយ សម្រាប់សត្វពីងពាងជាង ១ ៥០០ក្បាលនោះ៕