Gianluigi Buffon បាន​ចាត់​ទុក​ការ​ឈ្នះ​ UEFA Champions League មាន​តម្លៃ​ធំធេង​សម្រាប់​រូប​គេ​ដូច​ជា​ការ​ឈ្នះ​ World Cup ជាមួយ​ក្រុម​ជម្រើស​ជាតិ​អ៊ីតាលី​កាល​ពី​ឆ្នាំ​២០០៦​ដូច្នោះ​ដែរ។

ការ​លើកឡើង​បែប​នេះ​ដោយ​សារ​តែ​អ្នក​ចាំទី​ដៃ​ស្អិត​វ័យ​ ៣៩​ឆ្នាំ​ មិន​ដែល​ស្គាល់​ជាតិ​ឈ្នះ​ពាន Champions League នោះ​ទេ​នៅ​ក្នុង​អាជីព​បាល់ទាត់​ពោល​គឺ​បាន​ត្រឹម​រង​ជើង​ឯក​២​ដង​ប៉ុណ្ណោះ​កាល​ពី​ឆ្នាំ​ ២០០៣ និង​២០១៥។

"ពាន​ Champions League មាន​ន័យ​ធំធេង​បំផុត​សម្រាប់​ខ្ញុំ​ គឺ​ដូចគ្នា​ទៅ​នឹង World Cup ឆ្នាំ​២០០៦​ដែរ។ នៅ​ក្រោយ​ពេល​យក​ឈ្នះ Barcelona ខ្ញុំ​ពិត​ជា​រីករាយ​ តែ​ខ្ញុំ​មិន​ហ៊ាន​អបអរ​ខ្លាំង​ពេក​ទេ ដោយសារ​តែ​ធ្លាប់​រង​ការ​ខកចិត្ត​ជា​ច្រើន​ដង​មក​ហើយ"។ Buffon និយាយ​ដូច្នេះ។

កីឡាករ​ដែល​មាន​ស្រុក​កំណើត​នៅ​តំបន់​ Tuscany ប្រទេស​អ៊ីតាលី​ ធ្វើ​បាន​ Clean sheet ៩​លើក​ហើយ​នៅ​Champions League រដូវ​កាល​នេះ​។ ប្រកួត​ចុងក្រោយ​ដែល​ Buffon របូត​គ្រាប់​បាល់​គឺ​កាល​​ឈ្នះ​ Sevilla ៣-១ កាល​ពី​ខែ​វិច្ឆិកា​ ឆ្នាំ​២០១៦។ គួរ​រម្លឹក​ថា Juventus នឹង​បើក​ទ្វារ​កីឡដ្ឋាន​របស់​ខ្លួន​ស្វាគមន៍ Monaco នៅ​យប់​នេះ​វេលា​ម៉ោង ១:៤៥នាទី​រំលង​អាធ្រាត្រ ខណៈ​ជើង​ទី​មួយ​ពួក​គេ​ឈ្នះ ២-០ នៅ​ទឹកដី​បារាំង​៕

ប្រភព៖ Dailymail   ប្រែ​សម្រួល៖ វីរ័ត្ន