ភ្ញាក់ផ្អើលខ្លាំង! ប្រធានាធិបតីកូរ៉េខាងត្បូងថ្មី ចង់បង្កើនទំនាក់ទំនងជាមួយ គីម ជុងអ៊ុន

2017-05-11 02:56:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកូរ៉េខាងត្បូង ទើបតែជ្រើសរើសបានប្រធានាធិបតីសេរីថ្មី ដែលធានាថានឹងកសាងឡើងវិញ នូវទំនាក់ទំនងដាច់រហែកជាច្រើនឆ្នាំ ជាមួយប្រទេសជិតខាង កូរ៉េខាងជើង ដើម្បីលុបបំបាត់ភាពតានតឹង នៅលើឧបទ្វីបកូរ៉េ។

លោក ម៊ូន ជេអ៊ីន

នៅលើផ្លូវយុទ្ធនាការ លោក ម៊ូន ជេអ៊ីន ប្រធានាធិបតីកូរ៉េខាងត្បូងថ្មី បានសន្យាថា នឹងផ្ដល់នូវវិធីសាស្ត្រការទូតសកម្ម និងបើកចំហកាន់តែច្រើនបន្ថែមទៀត ទៅកាន់កូរ៉េខាងជើង។

ទោះជាយ៉ាងណា ប្រធានាធិបតីជាប់ឆ្នោតរូបនេះ មិនអនុញ្ញាតឲ្យប្រទេសកូរ៉េខាងជើង ជំរុញកម្មវិធីនុយក្លេអ៊ែររបស់ខ្លួនឡើយ ហើយបានរិះគន់រដ្ឋាភិបាលទាំង២ចុងក្រោយ ដែលបរាជ័យក្នុងការបញ្ឈប់វា ដោយបាននិយាយថា គោលនយោបាយ នៅ២ទសវត្សរ៍ចុងក្រោយនេះ មិនដំណើរការឡើយ។

លោក គីម ជុងអ៊ុន

ជាមួយគ្នានេះដែរ លោក ម៊ូន ក៏បានធ្វើយុទ្ធនាការ នៅលើគោលនយោបាយ National Interest First និងបានសរសេរនៅក្នុងសៀវភៅមួយ ដែលបានចេញផ្សាយ កាលពីខែមករា ថា កូរ៉េខាងត្បូង គួរតែរៀននិយាយថា «ទេចំពោះអាមេរិក»។

លោកស្រី Simone Chun មកពីបណ្ដាញសន្តិភាពកូរ៉េ «Korea Peace Network» បានប្រាប់ទៅកាន់សារព័ត៌មាន RT ថា «ប្រទេសកូរ៉េខាងត្បូង គួរតែមានឯករាជ្យ ពីសហរដ្ឋអាមេរិក ច្រើនជាងនេះ ដោយសារតែគោលនយោបាយទប់ស្កាត់របស់ខ្លួន នៅភាគឦសានតំបន់អាស៊ី ហើយសហរដ្ឋអាមេរិក គ្រាន់តែចង់ឲ្យកូរ៉េខាងត្បូង ធ្វើជារនាំងការពារប្រឆាំងនឹងរបបកុម្មុយនិស្តរបស់កូរ៉េខាងជើងប៉ុណ្ណោះ។ ខ្ញុំគិតថាទស្សនវិស័យនេះត្រូវតែផ្លាស់ប្ដូរ»។

លោកស្រីបានឲ្យដឹងទៀតថា «ឥឡូវនេះ ប្រជាជនទាមទារឲ្យមានការផ្លាស់ប្ដូរគោលនយោបាយថ្មីយ៉ាងខ្លាំង ដូច្នេះខ្ញុំគិតថា សហរដ្ឋអាមេរិក គួរតែទទួលយកទស្សនៈផ្សេងគ្នា ដែលមានន័យថា គោរពអធិបតេយ្យភាព និងផ្ដល់អំណាចបន្ថែមទៅកាន់ប្រធានាធិបតីកូរ៉េខាងត្បូងថ្មី ដើម្បីឲ្យលោកទទួលយកការផ្ដួចផ្ដើមនេះ»៕

លោកស្រី Chun ក៏បានបន្ថែមទៀតថា «កូរ៉េខាងត្បូង អាចទទួលយកគំនិតផ្ដួចផ្ដើម និងសកម្មភាពក្នុងការអនុវត្តគោលនយោបាយថ្មី ដែលអាចដឹកនាំប្រទេសឆ្ពោះទៅរកសន្តិភាព និងស្ថិរភាព នៅឧបទ្វីបកូរ៉េ»៕

ប្រភព៖ RT ប្រែសម្រួល៖ សេង ឡុង