រឿងទាំង ១០ ដែលអាចដាក់សម្ពាធមនោសញ្ចេតនាប្រុសៗ ឲ្យទប់ទឹកភ្នែកមិនបាន

2017-05-11 06:41:28
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សភាគច្រើននិយាយថាប្រុសៗមិនងាយយំទេ។ មនុស្សស្រីទើបជាមនុស្សដែលមានអារម្មណ៍ទន់ជ្រាយ និងងាយយំយែក។ ប៉ុន្តែទោះបីជាយ៉ាងណាក៏ដោយ មនុស្សប្រុសរឹងមាំខ្លះក៏អាចស្រក់ទឹកភ្នែកបានដោយសារតែមើលរឿងដែរ។ បើមិនជឿទាល់តែសាកមើលខ្លួនឯងទើបដឹង៕ តោះ!អីចឹងមកដឹងពីរឿងទាំង១០នេះទាំងអស់គ្នា!

១. Hachi: A Dog's Tale (២០០៨)

គ្រូបង្រៀនភ្លេងម្នាក់បានជួបកូនឆ្កែមួយនៅតាមផ្លូវមកពីធ្វើការ។ បន្ទាប់មកលោកគ្រូនោះក៏យកឆ្កែនោះទៅផ្ទះ ដោយមិនបាននឹកគិតថាមនោសញ្ចេតនារបស់អ្នកទាំង២មានរហូតដល់រាប់សិបឆ្នាំ ដែលជាឧទាហណ៍មួយដែលបង្ហាញពីសេចក្ដីស្រលាញ់និងស្មោះត្រង់របស់ឆ្កែមកកាន់មនុស្ស។ វាត្រូវបានបញ្ជាក់ជាច្រើនសារហើយថា រឿងនេះគឺដកស្រង់ចេញពីហេតុការណ៍ជាក់ស្តែង ដែលជាហេតុធ្វើឲ្យមនុស្សជាច្រើនមិនអាចទប់ទឹកភ្នែកបាន។

២. Knokin' on Heaven's Door (១៩៩៧)

អ្នកជំងឺ២នាក់ស្នាក់នៅមន្ទីរពេទ្យជាមួយគ្នា សុទ្ធតែមានជំងឺមិនអាចព្យាបាលបាន ព្រមទាំងមានពេលមិនច្រើនទេសម្រាប់រស់នៅ។ បន្ទាប់មកពូកគេក៏សម្រេចចិត្តមិនចង់ចំណាយពេលចុងក្រោយនៃជីវិតដោយស្នាក់នៅបន្ទប់មន្ទីរពេទ្យ ហើយក៏រត់ចេញ លួចឡាន និងជិះទៅដើរលេងនៅសមុទ្រ។ នៅតាមផ្លូវ ពួកគេបានឆ្លងកាត់ស្ថានភាពគ្រោះថ្នាក់ ហើយពេលខ្លះក៏ជួបរឿងអស់សំណើចផងដែរ។ ជារឿងដ៏ល្អមួយដែលនិយាយអំពី ជីវិត សេចក្ដីស្លាប់ ការស្រមៃ និង ពេលវេលាក្រោយស្លាប់។

៣. The Green Mile (១៩៩៩)

បុរសស្បែកខ្មៅមាឌធំម្នាក់ត្រូវគេ ចោទថាសម្លាប់ក្មេងស្រី២នាក់ និងត្រូវគេដាក់ទោសចូលគុក ត្រៀមប្រហារជីវិត។ អ្នកទោសម្នាក់នេះមិនត្រឹមតែធ្វើឲ្យគេកត់សម្គាល់ដោយសាររូបរាងខាងក្រៅប៉ុណ្ណោះទេ លោកក៏មានទេពកោសល្យក្នុងការព្យាបាលយ៉ាងស័ក្ដិសិទ្ធិផងដែរ។ នៅក្នុងថ្នាក់ហ្វឹកហាត់នៅក្នុងគុកអំពីទំនាក់ទំនង អ្នកឆ្មាំគុកចាប់ផ្ដើមសង្ស័យថាលោកមិនមានកំហុសដោយសារតែចារឹកលក្ខណៈដ៏ល្អ របស់លោក។ រឿងនេះគឺជារឿងល្អបំផុតមួយដែលដកស្រង់ចេញពីរឿងប្រលោមលោករបស់លោក Stephen King ដែលនិយាយស៊ីជម្រៅពី ចិត្តសាស្ត្រ។

៤. My Name is Khan (២០១០)

ភាពយន្តឥណ្ឌាភាគច្រើនគឺពោរពេញទៅដោយការច្រៀងរាំ ប៉ុន្តែរឿងនេះមិនមែនអីចឹងទេ។ វាគឺជារឿងមួយដែលពោរពេញទៅដោយមនោសញ្ចេតនានិយាយអំពីរឿងរ៉ាវរបស់លោក Rizwan Khan ដែលកំពុងតែមានការឈឺចាប់ពីជំងឺ មួយប្រភេទដែលគេហៅថា "Asperger's Syndrome”។ លោកបានធ្វើដំណើរទៅកាន់សហរដ្ឋអាមេរិកដើម្បីត្រលប់ទៅកាន់គូស្នេហ៍វិញ។ ប្រពន្ធលោកបានបោះបង់លោកចោលបន្ទាប់ពីហេតុការណ៍ភេរវកម្ម ថ្ងៃទី១១ខែកញ្ញាឆ្នាំ២០០១ ពេលដែលពិភពលោកចាប់ផ្ដើមផ្លាស់ប្ដូរផ្នត់គំនិតទៅកាន់អ្នកកាន់សាសនាអ៊ីស្លាម។ នៅក្នុងដំណើរផ្សងព្រេង លោកបានយកឈ្នះបេះដូងមនុស្សជាច្រើននាក់ ដោយសារទឹកចិត្តដ៏ល្អ ស្រលាញ់សន្តិភាព និងស្មោះត្រង់របស់លោក។

៥. Schindler's List (១៩៩៣)

គឺរឿងដែលនិយាយអំពីរឿងរ៉ាវរបស់លោក Oskar Schindler ជាអ្នកជំនួញជោគជ័យម្នាក់ហើយក៏ជាសមាជិករបស់គណបក្សឌីសផាស៊ី(Nazi) ដែលបានជួយជីវិតជនជាតិជ្វីសរាប់ពាន់អ្នក អំឡុងពេលសង្គ្រាមលោកលើកទី២។ រឿងនេះគឺថតឡើងក្នុងបំណងផ្ដល់កិត្តិយសជូនលោកចំពោះ អំពើដ៏គួរឲ្យស្ញប់ស្ញែងដែលលោកបានធ្វើ ព្រមទាំងជារឿងដ៏ល្អបំផុតមួយដែលធ្វើឲ្យអ្នកទប់ទឹកភ្នែកពុំបានចំពោះសាច់រឿង ដែលដកស្រង់ពីរឿងរ៉ាវដែលកើតឡើងពិតៗ។

៦. Rory O'Shea Was Here (២០០៤)

និយាយពីជីវិតរបស់លោកMichael ដែលមានជំងឺសាច់ដុំពីកំណើតមិនអាចដើរបាន ត្រូវផ្លាស់ប្ដូរទាំងស្រុង នៅពេលដែលលោកបានជួបអ្នកជំងឺម្នាក់ទៀតគឺ Rory។ លោក Rory គឺអាចបានតែអង្គុយលើរទេះរុញតែប៉ុណ្ណោះដោយសារតែ ជំងឺសាច់ដុំ។ បុរសវ័យក្មេងម្នាក់នេះមិនត្រឹមតែមិនត្អូញត្អែរពីជំងឺរបស់ខ្លួន និងភាពអយុត្តិធម៌របស់ជីវិតទេ ប៉ុន្តែបង្ហាញពីការរស់នៅដោយសប្បាយចិត្ត និងមិនខ្វល់ច្រើនពីស្ថានភាពខ្លួន។ ហើយក៏បានជះឥទ្ធិពលដល់ Michael ចំពោះអាកប្បកិរិយាដ៏វិជ្ជមានរបស់ Rory ដែល Rory បានបង្ហាញលោកពីឱកាសដែលលោកអាចមានសេចក្ដីរីករាយក្នុងជីវិត។ រឿងដ៏ល្អមួយនេះ ធ្វើឲ្យយើងរំលឹកខ្លួនឯងពីជីវិតនិងត្រូវទទួលយកនូវអ្វីដែលយើងមាន ដែលយើងមិនធ្លាប់គិតក្នុងជីវិតប្រចាំថ្ងៃ។

៧. Life Is Beautiful (១៩៩៧)

នៅអំឡុងពេលសង្គ្រាមលោកលើកទី២ Guido និងកូនប្រុសវ័យក្មេងរបស់លោក បានធ្លាក់ចូលទៅក្នុងជំរំរបស់ពួកណាស៊ីសសម្រាប់ជនជាតិជ្វីស។ លោកចង់ជួយជីវិតកូនខ្លួន ដោយប្រាប់ថាអ្វីដែលកើតឡើងគឺគ្រាន់តែជាល្បែងប៉ុណ្ណោះមិនមែនជាការពិតទេ ហើយអ្នកដែលលេងឈ្នះល្បែងនេះនឹងទទួលបានរថក្រោះជារង្វាន់។ ដើម្បីយកឈ្នះ អ្នកលេងមិនត្រូវឲ្យពួកអ្នកយាមចាប់ខ្លួនបានទេ។ ក្មេងប្រុសម្នាក់នោះ ជឿតាមឪពុកហើយក៏ចាប់ផ្ដើមគេចខ្លួននៅក្នុងបន្ទាយដើម្បីឲ្យមានជីវិត។ ជារឿងល្អមួយ ដែលផ្ដោតទៅលើសេចក្ដីស្រលាញ់ និងសប្បុរស ធ្វើឲ្យសើចនិងយំតាមសាច់រឿង។

៨. Seven Pounds (២០០៨)

លោក Ben Thomas មិនអាចបំភ្លេចបាននូវគ្រោះថ្នាក់ចរាចរណ៍រថយន្តដែលលោកបានសម្លាប់មនុស្ស៧នាក់ រាប់បញ្ចូលទាំងគូរដណ្ដឹងរបស់លោក ដោយសារការធ្វេសប្រហែស។ កំហុសមួយនេះបានលងបន្លាចលោកជាខ្លាំង ហើយក៏ខិតខំរកមធ្យោបាយដើម្បីកែតម្រូវនូវកំហុសដែលលោកបានធ្វើ។ លះបង់គ្រឿងក្នុងរបស់លោកទៅឲ្យមនុស្សដែលមានជំងឺធ្ងន់ លោកបានជួយពួកគេឲ្យមានជីវិតរស់នៅដើម្បីសងនឹងជីវិតដែលលោកបានធ្វើឲ្យបាត់បង់ក្នុងគ្រោះថ្នាក់នោះ។ ប៉ុន្តែអ្វីៗត្រូវផ្លាស់ប្ដូរទាំងស្រុង នៅពេលដែលលោកបានជួបនារីម្នាក់ដែលមានឈ្មោះថា Emily ហើយក៏បាក់ចិត្តស្រលាញ់នាង។ គ្មានអ្នកណាម្នាក់អាចទប់ទឹកភ្នែកបានទេ ពេលមើលរឿងនេះដែលបង្ហាញពីភាពក្ដុកក្ដួល នៃការដាក់ទន្តកម្មខ្លួនឯងរបស់តួឯកប្រុស។

៩. Million Dollar Baby (២០០៤)

Maggie ស្រមៃអាជីពជាអ្នកប្រដាល់។ លោក Frankie Dunn គឺជាគ្រូបង្វឹកម្នាក់ដែលមានបញ្ហាក្នុងជីវិតច្រើន មិនមានអារម្មណ៍ល្អក្នុងបង្ហាត់សិស្សស្រីថ្មីម្នាក់នេះទេ។ ប៉ុន្តែដោយសារតែឃើញពីភាពចចេស និងចង់ក្លាយជាអ្នកលើកពានរបស់នាង លោកក៏យល់ព្រមបង្ហាត់នាង។ រឿងនេះបង្ហាញពីការតស៊ូដែលស្ថិតនៅខាងក្នុងខ្លួន អារម្មណ៍ និងអំពីចំណង់ការចង់ឈ្នះដើម្បីបំពេញបំណងប្រាថ្នាដោយមិនគិតពីអ្វីទាំងអស់។

១០. Gladiator (២០០០)

អ្នកចម្បាំងដ៏ខ្លាំងពូកែលោក Maximus ដែលនឹងត្រូវក្លាយជាអ្នកឡើងគ្រងរាជ្យនៅអាណាចក្ររ៉ូម។ ក្រោយពេលដឹងដំណឹងនេះ កូនប្រុសរបស់ស្ដេច មានបំណងចង់សម្លាប់លោក។ ប៉ុន្តែក៏រួចពីការសម្លាប់នេះ ហើយបានក្លាយជាអ្នកប្រកួតប្រជែងក្នុងទីរេញ(Gladiator) ដ៏ខ្លាំងពូកែម្នាក់។ ការសម្ដែងរបស់ Russell Crowe បានឆក់យកបេះដូងអ្នកទស្សនា ដល់ថ្នាក់ស្រក់ទឹកភ្នែកនូវឈុតឆាកខ្លះៗទៀតផង៕

ប្រភព៖ Brightside ប្រែសម្រួល៖ ធារ៉ូ