នរណាខ្លះដឹងថា លេខ១១របស់វិសាខា ជាតារាឆ្នើមមកពីក្រៅប្រទេស?

2017-05-13 07:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាបាល់ទះឆ្នើមលេខ១១ ដែលលេងបានល្អនិងលេចធ្លោជាងគេនៅក្រុមវិសាខា ការពិតទៅជាជើងខ្លាំងមកពីក្រុមបាល់ទះទ័ពអាកាសរបស់ប្រទេសថៃ ហើយកីឡាកររូបនេះលេងបាល់ទះរយៈពេល ១៥ ឆ្នាំមកហើយ ឥលូវនេះប្រាថ្នាលើកពានស្រាបៀ លីអូ ជាមួយវិសាខា។

កីឡាករ Jirayu Raksakaew

លោក Jirayu Raksakaew បានឲ្យដឹងកាលពីម្សិលមិញនេះថា គេពេញចិត្តណាស់ដែលបានចូលរួមជាមួយក្រុមកម្ពុជាមួយនេះ(វិសាខា) ហើយគេនឹងខិតខំជួយក្រុមមួយនេះឲ្យឈ្នះពានរង្វាន់ស្របៀ លីអូ នេះ។ ការរៀបចំកម្មវិធីប្រកួតនេះក៏មានលក្ខណៈល្អប្រសើរទាំងទីលានប្រកួតនិងការរៀបចំផ្សេងទៀតពិតជាល្អ។

កីឡាករកម្ពស់ ១,៩៤ សង់ទីម៉ែត្រ ម្នាក់នេះបន្តឲ្យដឹងទៀតថា បើនិយាយពីការប្រកួតតាំងពីវគ្គជម្រុះមកដល់ពាក់កណ្ដាលផ្ដាច់ព្រ័ត្រនេះ គេមើលឃើញថា ក្រុមបាល់ទះវិសាខាហាក់មានកំហុសឆ្គងមួយចំនួនដែរ គឺត្រង់ចាប់សេវារបស់ដៃគូតែម្ដងនិងបាំងក៏នៅធ្វើមិនទាន់បានល្អផងដែរ។ ហេតុផលដែលក្រុមរបស់លោកឈ្នះលើក្រុមវៀតណាមនោះគឺ ពួកក្រុមរបស់លោកព្យាយាមវាយសេវាទៅបុកអ្នកដែលសំខាន់ជាងគេរបស់ក្រុមវៀតណាម ហើយកីឡាករថៃរូបនេះឡើងទៅបាំងយកពិន្ទុ។

ក្រុមវិសាខា

កីឡាករថៃរូបនេះ ក៏ប្រាប់ពីចំណុចខ្វះខាតរបស់ក្រុមវៀតណាម Vinh Long ដែរថាពួកគេនៅពេលបាល់នៅឆ្ងាយពីពួកគេបន្តិចគឺលែងរត់ទៅយកហើយ និងមួយទៀតនោះឲ្យតែបាល់លេងយូរបន្តិចគឺពួកគេលែងសហការគ្នាជាក្រុមចំណុចទាំងនេះដែលធ្វើឲ្យក្រុមមួយនេះចាញ់វគ្គពាក់កណ្ដាលផ្ដាច់ព្រ័ត្រនេះ។ បើនិយាយពីការប្រកួតនៅវគ្គផ្ដាច់ព្រ័ត្រនៅល្ងាចនេះកីឡាករថៃរូបនេះនៅមិនទាន់ហ៊ានថាយ៉ាងណានៅឡើយទេ តែដឹងថានឹងខំប្រឹងឲ្យអស់ពីសមត្ថភាពដើម្បីជួយក្រុមវិសាខាឈ្នះពានរង្វាន់នេះ។

ក្រុមសាលាខេត្តកំពង់ចាមនិងកងពលធំអន្តរាគមន៍លេខ៣

Jirayu Raksakaew ជាកីឡាករជនជាតិថៃ បច្ចុប្បន្នកំពុងជួយក្រុមបាល់ទះវិសាខាប្រកួតប្រជែងពានរង្វាន់ស្របៀ លីអូ រដូវការទី៦ ហើយគេពាក់ស្លាកលេខ១១នៅក្នុងក្រុមនេះ កីឡាកររូបនេះមានវ័យ៣០ឆ្នាំហើយ និងមានកម្ពស់ ១,៩៤ សង់ទីម៉ែត្រ។ ល្ងាចនេះកីឡាករម្នាក់នេះនឹងត្រូវធ្វើការធ្ងន់បន្តទៀតដើម្បីជួយក្រុមនៅវគ្គផ្ដាច់ព្រ័ត្រ៕

អត្ថបទ៖ នួន ស៊ីណា