សូ លីហ្សា ត្រៀមធ្វើតួឯករឿងហើយ!

2017-05-16 00:07:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង សូ លីហ្សា បានបង្ហើបឲ្យដឹងថា ឆាប់ៗខាងមុននេះ នាងនឹងគ្រងតំណែងតួឯកខ្សែភាពយន្តថ្មី១រឿងទៀត មានចំណងជើងថា "ម្ចាស់ព្រែក"។

ស្រីស្អាតរូបនេះ បញ្ជាក់ថា នាងបានចុះកុងត្រាជាមួយគ្នារួចរាល់ហើយ ហើយគ្រោងនឹងធ្វើពិធីក្រុងពាលីចេញថតក្នុងពេលឆាប់ៗនេះ។ រឿង "ម្ចាស់ព្រែក" ដែលស្រីស្អាត សូ លីហ្សា គ្រោងនឹងសម្ដែងនោះ ជាប្រភេទរឿងមនោសញ្ចេតនា សម័យលាយបូរាណ មានទាំងអស់ជាង៥០ភាគ សម្រាប់ចាក់បញ្ចាំងនៅលើ កញ្ចក់ទូរទស្សន៍ CTN។

"ថ្ងៃមុនខ្ញុំបានថត Cover ឲ្យគេអស់ហើយ គេក្រុងពាលីឆាប់ៗនេះ រឿងហ្នឹងមានតួឯក២គូបង"។ សូ លីហ្សា ថ្លែងបញ្ជាក់។

តួឯកប្រុសដែលត្រូវសម្ដែងជាមួយនាងនោះ មានឈ្មោះថា លោក អ៊ុំ ដាវីត ចំណែកតួឯក១គូទៀត ឈ្មោះ លោក ផប់ រចនា និង លោក ឃឹម រិទ្ធី ។ តារាស្រីរូបនេះបានរៀបរាប់អត្តចរិតតួដែលនាងត្រូវសម្ដែងឲ្យដឹង ក្នុងនោះនាងត្រូវសម្ដែងជាតួអង្គប្រុសផងស្រីផង ។ ពេលថ្ងៃតែងខ្លួនជាមនុស្សស្រីមាន អត្តចរិត ស្លូតបូត ចំណែកពេលយប់ ត្រូវតែងខ្លួនជាមនុស្សប្រុស មានភាពក្លាហាន ចេះក្បាច់។

ដោយសារតែខ្សែភាពយន្តមួយនេះ តួអង្គរបស់សូ លីហ្សា ត្រូវ មានឈុតវាយតប់ប្រើក្បាច់គុនផងនោះ ដូចនេះនាងត្រូវចេះក្បាច់គុនផងដែរ។ តារាស្រីរូបនេះលើឡើងថា ខ្លួនគ្រោងនឹងត្រូវទៅហាត់ក្បាច់គុន ដើម្បីឲ្យការសម្ដែងនោះ កាន់តែល្អ។

សូ លីហ្សា បានបោះជំហានចូលសិល្បៈនៅដើមឆ្នាំ២០១៥ តាមរយៈការម្ដាយរបស់ខ្លួន ជាមួយអាជីពជាតារាសម្ដែង។ រយៈពេលនេះនាង ក្រៅពីការថតខារ៉ាអូខេ និងស្ប៉តពាណិជ្ជកម្មមួយចំនួន ស្រីស្រស់វ័យ២១ឆ្នាំរូបនេះ ធ្លាប់បានសម្ដែងរឿងខ្ទង់១០រឿងមកហើយ ក្នុងនោះ នាងមានឱកាសក្ដាប់បានតំណែងតួឯកបានចំនួន៤រឿងផងដែរ បើគិតទាំងរឿងខាងលើ។

រឿងដែលនាងធ្លាប់ និងកំពុងតែសម្ដែងតួឯកមានដូចជា រឿង"អវសានស្នេហ៍" រឿង"បំណុលស្នេហ៍" កំពុងតែថតឲ្យស្ថានីយទូរទស្សន៍បាយ័នជិតចប់ និងរឿងមួយទៀតថតឲ្យ TV8HD មិនចាំចំណងជើង៕

អត្ថបទ៖ ទារិកា