ចង់ទស្សនាទេ? រឿង "Little Dragon" និយាយតាំងពីជីវិតយុវវ័យរបស់ លី ស៊ាវឡុង

2017-05-18 03:53:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តដែល បង្ហាញពីដំណើរផ្សងព្រេង និងក្បាច់គុនដ៏អស្ចារ្យរបស់ លីស៊ាវឡុង នឹងត្រូវយកមកថត និងត្រៀមដាក់បញ្ចាំងក្នុងពេលខាងមុខនេះហើយ។

អ្នកផលិតខ្សែភាពយន្តដ៏ល្បី ជនជាតិឥណ្ឌា លោក Shekhar Kapur បានចុះកុងត្រាលើការសហការនិពន្ធ ក៏ដូចជាដឹកនាំរឿង "Little Dragon” ដែលនិយាយពី ខ្សែជីវិតរបស់តារាក្បាច់គុនហុងកុង-អាមេរិក លោក Bruce Lee ហៅ លី ស៊ាវឡុង កាលពីក្នុងទសវត្សឆ្នាំ ១៩៥០។

លោក Bruce Lee និងគ្រូរបស់លោក

អ្នកដឹកនាំសម្ដែង អ្នកស្រី Mary Vernieu កំពុងតែមមាញឹកលើការងារស្វែងរកតារាប្រុសដែលស័ក្ដិសមដើរតួជា "លី ស៊ាវឡុង" ពីក្មេង។

ដោយឡែក សាច់រឿងវិញ នឹងត្រូវចូលរួមក្នុងការនិពន្ធ និងដឹកនាំ ដោយកូនស្រីរបស់លោក លី គឺអ្នកស្រី Shannon Lee ដែលជាអ្នកដំណើរការផលិតកម្ម "Bruce Lee Entertainment” ។ ផលិតកម្មនេះ ជាផ្នែកមួយរបស់ក្រុមហ៊ុន "Bruse Lee Family” ដែលជាក្រុមហ៊ុន លើកតម្កើង និងថែរក្សាមរតករបស់ Bruce Lee ។

លោក Bruce Lee ហៅ លី ស៊ាវឡុង ក្នុងទីក្រុងហុងកុង ទសវត្សឆ្នាំ ១៩៥០

រឿង “Little Dragon” នឹងដកស្រង់នូវ ជីវិតតស៊ូរបស់យុវជន Bruce Lee ស្ដែងចេញពីការខកចិត្តរបស់គ្រួសាររបស់លោក ស្នេហាក្នុងយុវភាព មិត្តភាពពិត ភាពមិនស្មោះត្រង់ ការប្រកាន់ពូជសាសន៍ ការជួបប្រទះស្ថានភាពលំបាក ពុះពារគ្រប់ឧបសគ្គ ដើម្បីសម្រេចគោលដៅរបស់ខ្លួន។ នេះបើតាមអ្នកដឹកនាំរឿងបានបកស្រាយ។

មួយវិញទៀត ខ្សែរឿងដ៏អស្ចារ្យនេះ កំពុងស្ថិតក្នុងដំណាក់កាល Pre-Production ដោយមានការសហការពីផលិតកម្មរបស់ អាមេរិក និងចិន ដោយចាប់ផ្ដើមដំណើរការថតនៅរដូវក្ដៅនេះ ក្នុងប្រទេសចិន និងម៉ាឡេស៊ី៕

ប្រភព៖ hollywoodreporter ប្រែសម្រួល៖ យី សុធារី