កីឡាគុនដាវកម្ពុជា នឹងទៅប្រកួតជើងឯកកីឡាគុនដាវទាហានជើងទឹកនៅថៃ

2017-06-05 08:31:56
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាគុនដាវកម្ពុជា បានសម្រេចបញ្ជូនកីឡាករ-កីឡាការិនីរបស់ខ្លួនចូលរួមការប្រកួតជ្រើសរើសជើងឯកកីឡាគុនដាវទាហានជើងទឹកឆ្នាំ២០១៧ ដែលប្រព្រឹត្តិទៅចាប់ពីថ្ងៃទី ២ ដល់ថ្ងៃទី៥ ខែមិថុនា ឆ្នាំ២០១៧ នៅទីក្រុងបាងកក ប្រទេសថៃ។

លោក សុខ អាង អគ្គលេខាធិការនៃសហព័ន្ធកីឡាគុនដាវកម្ពុជា បានឱ្យដឹងថា ការចូលរួមនេះ សហព័ន្ធបានបញ្ជូនកីឡាករចំនួន ៣រូប និងកីឡាការិនីចំនួន ១រូបទៅចូលរួម។ ក្នុងនោះមានកីឡាករ១រូប និងកីឡាការិនី១រូប ជាកូនខ្មែរកាត់អាមេរិក ហើយសព្វថ្ងៃពួកគេរស់នៅទីក្រុងបាងកកស្រាប់។ សមាសភាពនៃការចូលរួមដូចខាងក្រោម៖

លោក សៀន សុភក្រ្ដ ជាគ្រូបង្វឹកនិងជាប្រតិភូដឹកនាំ
លោក ឃីម សាមាន កីឡាករប្រកួតវិញ្ញាសាបុរសឯកត្តជនដាវធំ
លោក ឈុន លីម៉េង កីឡាករ ប្រកួតវិញ្ញាសាបុរសឯកត្តជនដាវកាប់
លោក មេត្តា ជ័ដ កីឡាករប្រកួតវិញ្ញាសាបុរសឯកត្តជនដាវតូច
កញ្ញា រ៉ូប៊ី ជ័ដ កីឡាការិនីប្រកួតវិញ្ញាសានារីឯកត្តជនដាវកាប់

លោកអគ្គលេខាធិការខាងលើបានប្រាប់ថាការសម្រេចឱ្យកីឡាករ-កីឡាការិនីខាងលើចូលរួមការប្រកួតដោយមូលហេតុចម្បង២ គឺ៖

តេស្ដកម្រិតគុណផល (Performance) របស់ពួកគាត់ក្នុងកម្រិតអន្ដរជាតិ៖ កីឡាករ-កីឡាការិនីចំនួន៣រូបសុទ្ធតែជាកីឡាករ-កីឡាការិនីថ្នាល ប៉ុន្តែពួកគេពុំសូវមានឱកាសក្នុងការចូលរួមប្រកួតដើម្បីធ្វើតេស្ដ និងទទួលបទពិសោធក្នុងពីការប្រកួតឡើយ ជាពិសេសការប្រកួតជាលក្ខណៈអន្ដរជាតិ។
ស្វែងរកចំណាត់ថ្នាក់ (Ranking) ជូនពួកគេដើម្បីត្រៀមការប្រកួតផ្លូវការរបស់សហព័ន្ធកីឡាគុនដាវអន្ដរជាតិ៖ ការចូលរួមនេះ គឺផ្ដល់ឱកាសឱ្យពួកគាត់ទទួលបានចំណាត់ថ្នាក់មួយក្នុងការប្រកួតអន្ដរជាតិ ដើម្បីធ្វើការសន្សំពិន្ទុ និងត្រៀមចូលរួមការប្រកួតអន្ដរជាតិនានាដែលស្ថិតក្រោមអភិបាលរបស់សហព័ន្ធអាស៊ី និងសហព័ន្ធកីឡាគុនដាវអន្ដរជាតិ ។

សូមបញ្ជាក់ថា ការប្រកួតនេះធ្វើឡើងជារៀងរាល់ឆ្នាំ ដែលរៀបចំដោយសហព័ន្ធកីឡាគុនដាវថៃ និងក្លឹបគុនដាវទាហានជើងទឹក ហើយការចូលរួមត្រូវបានបើកទូលាយសម្រាប់បណ្ដាលប្រទេសនានាលើពិភពលោកមកចូលរួម ។ ក្នុងនោះមានប្រទេសមានចំនួន១៤ទូទាំងពិភពលោកបានចូលរួម ដូចជា ប្រទេសអូស្រ្ដាលី កម្ពុជា ចិន ហុងកុង ឥណ្ឌា អ៊ីរ៉ុង អ៊ីតាលី ម៉ាឡេស៊ី ញូហ្សេឡេន ហ្វីលីពីន សឹង្ហបូរី ថៃ អង់គ្លេស និងអាមេរិក ។

លោក សុខ អាងបានបន្ដថាការចូលរួមខាងលើត្រូវបានអនុញ្ញាតដោយក្រសួងអប់រំ យុវជន និងកីឡា ។ ចំពោះការស្នាក់នៅ ហូបចុក និងការធ្វើដំណើរ សហព័ន្ធជាអ្នកទទួលខុសត្រូវ៕

អត្ថបទ៖ មុន្នីរម្យ