អបអរទិវាឪពុកមិនមែនមានន័យថាឈ្លក់វង្វេងនឹងវប្បធម៌បរទេសទេ

2017-06-20 08:53:46
ចំនួនមតិ 0 | ចំនួនចែករំលែក 0

ចន្លោះមិនឃើញ

យើងសង្កេតឃើញថាទិវាឪពុកនៅស្រុកយើងហាក់ដូចជាមិនរំជើបរំជួលខ្លាំងដូចទិវាក្ដីស្រលាញ់ និងទិវាអ្នកម្ដាយសោះ ។ ជាក់ស្ដែងនេះមិនមែនជាវប្បធម៌របស់ខ្មែរយើងទេ ម្យ៉ាងទៀតកូនៗភាគច្រើនស្និតស្នាលជាម្ដាយជាងឪពុក ព្រោះធម្មតាឪពុកតែងត្រូវរវល់ចេញក្រៅដើម្បីរកលុយផ្គត់ផ្គង់គ្រួសារ។

ទោះជាយ៉ាងនេះក្តីក៏មិនមែនមានន័យថាប្រជាជនខ្មែរយើងមិនចេះនឹកនាដល់គុណឪពុកនោះទេ តែខ្មែរយើងនិយមបង្ហាញភាពកតញ្ញូនេះក្នុងរដូវបុណ្យទានតាមរយៈការធ្វើបុណ្យជូនឪពុកម្តាយចាស់ៗ ដូចជា បួសសងគុណ ធ្វើពិធីស្រង់ព្រះ ងូតទឹកជូនឪពុកម្ដាយជាដើម។ ការចូលរួមអបអរទិវាឪពុករបស់វប្បធម៌បរទេសនេះ ក៏មិនមានន័យថាអាក្រក់នោះដែរ ហើយវានឹងផ្ដល់ឱកាសឲ្យយុវវ័យខ្មែរជំនាន់នេះកាន់តែងាយស្រួលក្នុងការបង្ហាញភាពកតញ្ញូចំពោះអ្នកមានគុណ ពិសេសគឺចំពោះលោកឪពុក។ នេះបើតាមការបញ្ជាក់ពីសាស្ត្រាចារ្យ សំបូរ មាណ្ណារ៉ា អ្នកប្រវត្តិសាស្ត្រខ្មែរ និងសាស្ត្រាចារ្យសាកលវិទ្យាល័យភូមិន្ទភ្នំពេញ និងសាកលវិទ្យាបញ្ញាសាស្ត្រ។

លោកបន្តថា៖«តាមពិតទៅខ្មែរយើងមានប្រពៃណីគោរពមេបាតាំងពីបរមបុរាណមកម្ល៉េះ ដែលយើងធ្លាប់មានដូចជា ពិធីបុណ្យមេបា បុណ្យព្រះកន្លោង ពិធីបុណ្យព្រះសេវៈ ជាដើម គ្រាន់តែយើងមិនបានហៅវាថាទិវាឪពុកដូចគេ។ នៅពេលដែលប្អូនៗសម័យឥលូវងាកមកយកចិត្តទុកដាក់នឹងការបង្ហាញក្ដីស្រលាញ់ចំពោះឪពុក ក្នុងថ្ងៃរំលឹកគុណឪពុកបែបនេះ គឺវាមិនខុសអីនោះទេ ។ វាមានន័យថាយើងចេះបំលែងទំនៀមទលាប់វប្បធម៌ចាស់ពីបុរាណរបស់យើងឲ្យវាទាន់សម័យទំនើបតែប៉ុណ្ណោះ»។

ជាក់ស្ដែងសម័យបច្ចុប្បន្នវាពិតជាពិបាកទប់ការហូរចូលនៃវប្បធម៌បរទេសខ្លាំងណាស់ដោយសារបច្ចេកវិទ្យាវិទ្យាទំនើប និង ការប្រើប្រាស់កម្មវិធីបណ្ដាញសង្គមក្នុងប្រព័ន្ធអ៊ីនធឺណែត។ តែក្នុងនាមជាយុវវ័យទំពាំងស្នងឫស្សីម្នាក់គួរចេះថ្លឹងថ្លែងស្វែងយល់ដោយខ្លួនឯងថាតើវប្បធម៌បរទេសមួយណាដែលល្អផូរផង់គួរប្រតិបត្តិតាម ឬ មួយណាមិនគួរ ។

អត្ថបទ៖ លីដា