ស្ពាន ៤កន្លែង នៅកម្ពុជារំលេចទេសភាពស្អាតបំផុត មិនចាញ់ស្រុកគេ

2017-06-21 10:03:52
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងប្រទេសកម្ពុជា មានស្ពានជាច្រើនកន្លែងសម្រាប់ជាមធ្យោបាយធ្វើដំណើរ និងជាពិសេសជំរុញឱ្យមានកំណើនសេដ្ឋកិច្ច តាមរយៈការដឹកជញ្ជូន។ ជាការកត់សម្គាល់ មានស្ពានមួយចំនួន មិនត្រឹមតែជាមធ្យោបាយធ្វើដំណើរប៉ុណ្ណោះទេ ថែមទាំងជាតំបន់ទេសចរណ៍ដ៏ទាក់ទាញទៀតផង។ ដូចនេះតើស្ពានណាខ្លះក្នុងប្រទេសកម្ពុជា មានទេសភាពស្អាតគួរឱ្យចង់ទៅលេងកម្សាន្ត? តោះទៅទស្សនាទាំងអស់គ្នា៖

១. ស្ពានសេកុង

ព្រះអាទិត្យរៀបអស្ដង្គតនៅស្ពានសេកុង ក្រុងស្ទឹងត្រែង បានចាំងផ្លាតនៅលើផ្ទៃទឹក ប្រៀបនឹងគ្រាប់ពេជ្រ រំលេចជាពណ៌មាស គួរឲ្យគយគន់មិនជិនណាយ ធ្វើឲ្យអារម្មណ៍ស្រស់ស្រាយ ស្បើយអស់ទុក្ខកង្វល់។

ស្ពានមិត្តភាពកម្ពុជា-ចិន - សេកុង សាងសង់នៅឆ្នាំ២០០៧ មានប្រវែង ១០៥៧ម៉ែត្រ ទទឹង១១ម៉ែត្រ ឆ្លងកាត់ទន្លេសេកុង ពីទីក្រុងស្ទឹងត្រែង ទៅត្រើយម្ខាងទៀត លើផ្លូវជាតិលេខ៧ ក្នុងគោលដៅទៅព្រំដែនឡាវ។ ក្រៅពីបម្រើដល់ការធ្វើដំណើររបស់ប្រជាពលរដ្ឋឲ្យមានភាពងាយស្រួល ស្ពាននេះ ក៏ជាទីកន្លែងដ៏ពេញនិយម សម្រាប់យុវវ័យទៅទស្សនាថ្ងៃលិច ពេលល្ងាចៗផងដែរ ដើម្បីរំសាយភាពតានតឹង និងមើលទេសភាពស្រូបយកខ្យល់អាកាសបរិសុទ្ធ ឲ្យមានអារម្មណ៍ស្រស់ស្រាយឡើងវិញ។

២. ស្ពានអ្នកលឿង

ទេសភាពដ៏ស្រទន់នាពេលសុរិយារៀបអស្ដង្គត បានបន្ថែមសម្រស់ស្ពានត្សឹបាសាឲ្យកាន់តែស្រស់ស្អាតមិនចាញ់នៅបរទេសឡើយ។ ស្ពានដែលវែងបំផុតនៅកម្ពុជានេះ មានប្រវែងសរុប ២២១៥ម៉ែត្រ និងដាក់សម្ពោធឲ្យប្រើប្រាស់កាលពីថ្ងៃទី០៦ ខែមេសា ឆ្នាំ២០១៥ កន្លងទៅ ដោយចំណាយអស់ទឹកប្រាក់សាងសង់អស់ប្រមាណ ១៣០លានដុល្លារ។

៣. ស្ពានកោះពស់

ស្ពាននេះស្ថិតក្នុងខេត្តព្រះសីហនុ បានរំលេចទេសភាពដ៏ស្រស់ស្អាតបំផុត នៅពេលទៅដល់ទីនោះហាក់លង់នឹងសម្រស់ផ្ទៃសមុទ្រដាច់កន្ទុយភ្នែក និងកម្ពស់ដ៏ខ្ពស់របស់ស្ពានហាក់កំពុងឈរលើទីតាំងមួយដ៏អស្ចារ្យបំផុត។ ស្ពានកោះពស់នេះ អនុញ្ញាតឱ្យភ្ញៀវទេសចរ ដើរលេងកម្សាន្តតែក្នុងថ្ងៃបុណ្យធំៗប៉ុណ្ណោះ ចំពោះថ្ងៃធម្មតាមិនបើកឱ្យឡើងនោះទេ។ ប្រសិនបើចង់ទទួលបានទស្សនីយភាពដ៏អស្ចារ្យគួរទៅលេងកម្សាន្ត នាពេលល្ងាច ព្រោះអាចឃើញព្រះអាទិត្យជះពន្លឺលើផ្ទៃសមុទ្រដ៏ខៀវស្រងាត់ និងអាចថតរូបបានស្អាតបំផុត។

៤. ស្ពានឫស្សីកោះប៉ែន

ស្ពាននេះមានប្រវែង៩០០ម៉ែត្រ និងមានទទឹង៣ម៉ែត្រ។ ស្ពានឫស្សីដែលត្រូវប្រើប្រាស់ឫស្សីអស់ចំនួន៤ម៉ឺនដើមអាចផ្ទុកទម្ងន់បានពី៣ទៅ៤តោន។ បន្ទាប់ពីស្ពានមួយនេះ បានធ្វើរួចរាល់ ភ្ញៀវចាប់ផ្ដើមធ្វើដំណើរឆ្លងកាត់ជាហូរហែក្នុងនោះមានទាំងអ្នកដើរ ជិះកង់ រទេះសេះ ម៉ូតូ និងរថយន្ត។ ជាពិសេសពេលល្ងាចចាប់ពីម៉ោង៤ទៅសំបូរយុវវ័យជិះម៉ូតូទៅលេងកោះប៉ែនណាស់ ខណៈឆ្នេរខ្សាច់កំពុងលេចចេញពណ៌មាសជាបណ្តើរៗ ហើយកន្លែងអង្គុយលំហែកាយលើខ្សាច់មាត់ទឹកក៏ត្រូវបានធ្វើច្រើនហើយដែរ។

ចំពោះតម្លៃវិញ អ្នកដើរត្រូវបង់៥០០រៀល អ្នកជិះកង់តម្លៃ៥០០រៀល ម៉ូតូតម្លៃ១០០០រៀល អ្នកជិះម៉ូតូជាជនបរទេសតម្លៃ៤០០០រៀល និងរថយន្តតម្លៃ១ម៉ឺនរៀល ប៉ុន្តែប្រភេទរថយន្តដឹកនាំទំនិញខ្នាតតូចជាដើមក៏គិតតម្លៃផ្សេងទៀត៕