ភាពយន្តរកលុយបានច្រើន ឆ្នាំ ២០១៤ នឹងត្រូវយកមកចាក់បញ្ចាំងម្ដងទៀត ឆាប់ៗនេះ

2017-07-10 02:35:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ទើបតែថ្មីៗនេះប៉ុណ្ណោះ មានព័ត៌មានធ្លាយចេញមកថា ភាពយន្តខ្មែររឿង "ស្បែកគង់" ដែលជាភាពយន្តយកចំណូលបានច្រើនជាងគេកាលពីឆ្នាំ ២០១៤ ត្រៀមនឹងបង្ហាញវត្តមានបញ្ចាំងជូនប្រិយមិត្តទស្សនាជាថ្មីម្ដងទៀត។

តាមប្រភពដែលសុំមិនបញ្ចេញឈ្មោះមួយ គឺថា រឿង "ស្បែកគង់" ផលិតដោយផលិតកម្មអង្គរភិចឈ័រនោះ នឹងត្រូវចាក់បញ្ចំងជូនបងប្អូនបានទស្សនាជាថ្មីម្ដងទៀតហើយ នៅក្នុងរង្វង់ចុងសប្ដាហ៍ខែកក្កដានេះ។ កាន់តែពិសេសជាងនេះទៀត គឺភាពយន្តដែលមានឈុតអាក្រាតរបស់កញ្ញា ឌុច លីដា នេះ នឹងត្រូវបញ្ចាំងដោយមិនលក់សំបុត្រថែមទៀតផង។

ឈុតមួយក្នុងរឿង «ស្បែកគង់»

“នេះខ្ញុំលឺ ពីខាងអ្នកផលិតកម្មមកវិញទេណា គឺគេអត់បញ្ចាំងលក់សំបុត្រដូចមុនទេ ដោយយកទៅចាក់បញ្ចាំងលើកកញ្ចក់ទូរទស្សន៍ឲ្យមើល Free តែម្ដង គឺកញ្ចក់ទូរទស្សន៍ថោន គឺប្រហែលជាអាចថ្ងៃ ២៤-២៥ អីហ្នឹង"។ ប្រភពបញ្ជាក់។

តាមប្រភពដដែល ការដែលភាពយន្តខ្នាចធំមួយនេះរបស់ខ្មែរ នឹងត្រូវចាក់បញ្ចាំងលើកញ្ចក់ទូរទស្សន៍ ដើម្បីឲ្យប្រិយមិត្តបានទស្សនាដោយឥតគិតថ្លៃនេះ គឺដើម្បីអបអរការចាប់ដំណើរការផ្សាយផ្លូវការរបស់ទូរទស្សន៍ថោនផង ដែលជាទូរទស្សន៍កូនពៅគេគិតត្រឹមថ្ងៃនេះ។ "បើតាមតែដឹងនោះ គឺមិនមែនតែរឿង "ស្បែកគង់" នេះទេ គឺដូចជាមានរឿង "ចន្ទ្រា" មួយទៀត ក៏ត្រូវយកមកបញ្ចាំងដែរ តែខ្ញុំមិនច្បាស់១០០%ទេ"។

ជុំវិញបញ្ហានេះ លោក ប៉ុល វិបូ ហៅនីត ដែលជាផលិតកររឿង "ស្បែកគង់" បានប្រាប់ក្រុមការងារយើងតាមទូរសព្ទឲ្យដឹងថា ព័ត៌មានដែលលេចឮខាងលើ គឺជាការពិត ដោយលោកបញ្ជាក់ថា ប្រិយមិត្តអាចរង់ចាំតាមដានទាំងអស់គ្នានៅថ្ងៃទី ២៤ ខែកក្កដានេះ។ លោកថា ទាំងរឿង "ស្បែកគង់" និងរឿង "ចន្ទ្រា" របស់លោក គឺនឹងត្រូវដាក់បញ្ចាំងបន្តបន្ទាប់នៅវេលាម៉ោង ៧:០០ ដល់ម៉ោង ៩:០០យប់។

ក្រៅពីនេះ លោក នីត ដែលបច្ចុប្បន្នក៏កំពុងកាន់តំណែងជានាយកចាត់ការទូទៅក្នុងស្ថានីយទូរទស្សន៍ថោន ក៏បានបញ្ជាក់ដែរជុំវិញព័ត៌មានថា ភាពយន្តទាំងពីររឿងលើ ចាក់បញ្ចាំងគឺអបអរនៃការចាប់ដំណើរការចាក់ផ្សាយកម្មវិធីរបស់ខ្លួនជាផ្លូវការពិតមែន។ ប៉ុន្តែកាលបរិច្ឆេទសម្ពោធផ្លូវការ មិនទាន់កំណត់បាននោះទេ។

"ស្បែកគង់" គឺជារឿងខ្មែរដ៏ល្បីមួយកាលពីឆ្នាំ២០១៤ ដោយក្នុងនោះតាមផលិតករ លោក ប៉ុល វិបូ ហៅ នីត ធ្លាប់បានប្រាប់សារព័ត៌មានថា កាលណោះនោះភាពយន្តនេះរកចំណូលសរុបបាន ៣០ម៉ឺនដុល្លារអាមេរិកឯណោះ។ តួលេខនេះ លោក ប្រាប់ថា មិនបានបូកបញ្ចូលចំណូលពីការចាក់បញ្ចាំងនៅក្រៅស្រុកដូចជា កូរ៉េ និងអាមេរិកផង៕

អត្ថបទៈ ស៊ុនហួត