មកដឹងកន្លែងកម្សាន្តថ្មី ក្នុងទឹកដីស្រុកត្រាំកក់ តាកែវមួយនេះ

2017-07-14 03:19:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្ពបត្របែកជាទីកន្លែងកម្សាន្តថ្មីមួយ ដែលទើបនឹងបង្កើតឡើង ស្ថិតនៅក្នុងភូមិស្ទឹង ឃុំអូរសារាយ ស្រុកត្រាំកក់ ខេត្តតាកែវ។ ជាកន្លែងកម្សាន្តតាមបែបធម្មជាតិ មានខ្យល់អាកាសបរិសុទ្ធ និងត្រជាក់ មានតូបអង្គុយ នៅតាមមាត់ទឹក និងមានពោងមុជទឹក គយគន់សម្រស់ជួរភ្នំដ៏វែងអន្លាយ។

បើបរិយាយពីចំណីចំណុក តំបន់ទេសចរណ៍នេះ មានលក់ម្ហូបអាហារ និងភេសជ្ជៈច្រើនមុខ និងមានតម្លៃធូរថ្លៃ។

ងាកចេញពីអាហារ ចូរមកដឹងពីតូបលើទឹកវិញម្ដង។ តូបអង្គុយលេង១ មានតម្លៃចាប់ពី១ម៉ឺនរៀល ទៅ២ម៉ឺនរៀល សម្រាប់ថ្ងៃធម្មតា និងថ្ងៃបុណ្យទាន ប៉ុន្តែប្រសិនបើទិញអាហារនៅទីនេះ អ្នកលក់មិនគិតប្រាក់ថ្លៃតូបឡើយ។

មិនសូវជាខុសនឹងកន្លែងកម្សាន្តផ្សេងប៉ុន្មានដែរ ទីនេះ មានពោងជួលមុជទឹក មានតម្លៃចាប់ពី ២ ៥០០រៀល ទៅ៣ ៥០០រៀលតាមតូចតាមធំ។ ថ្វីបើចំណុចខ្លះមិនសូវជាខុសកន្លែងផ្សេង ប៉ុន្តែអាចនិយាយថា ខ្ពបត្របែកទំនើបគួរសម ព្រោះមានភ្ញៀវអាចជិះទូកទា ឬទូកផ្សេងៗ មើលទេសភាព ដោយចំណាយខ្ទង់ពី ១ ម៉ឺនទៅ២ ម៉ឺនប៉ុណ្ណោះ។

អាជីវករអ្នកស្រី ញ៉ ធីតា បានប្រាប់ថា ខ្ពបត្របែកនេះ ជាអាងទំនប់ទឹកចាស់ជាយូរមកហើយ ប៉ុន្តែទើបជាងមួយឆ្នាំនេះទេ ដែលប្រជាពលរដ្ឋចាប់ផ្ដើមសង់ជាតូប ដើម្បីជួលឱ្យភ្ញៀវអង្គុយលេងមាត់ទឹក និងផ្ដើមលក់ម្ហូបអាហារនានា។

ប្រិយមិត្តដែលចង់ទៅកម្សាន្ត អាចធ្វើដំណើរតាមផ្លូវជាតិ៣ ទៅដល់ផ្លូវបំបែកអង្គតាសោម បត់ទៅលិចត្រង់តាមផ្លូវអ៊ុតកៅស៊ូ ចម្ងាយប្រហែលជាង ១៥ គីឡូម៉ែត្រ នឹងឃើញ ខ្ពបត្របែក នោះនៅជាប់នឹងផ្លូវតែម្ដង៕