U15 កម្ពុជាហាលអាវត្រឹមនេះ ពានរង្វាន់ AFF Championship 2017

2017-07-18 13:10:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ក្រោមអាយុ១៥ឆ្នាំរបស់កម្ពុជា បានបញ្ចប់ភារកិច្ចត្រឹមវគ្គក្នុងពូលនេះហើយ ក្រោយពីបរាជ័យក្រោមថ្វីជើង U15 របស់ម៉ាឡេស៊ីក្នុងលទ្ធផល ២-៤ មុននេះបន្តិច ក្នុងពានរង្វាន់ 2017 AFF U-15 Championship។

បើកឆាកដំបូងនៃពានរង្វាន់ 2017 AFF U-15 Championship កម្ពុជាធ្វើមិនបានល្អនោះទេ ដោយបរាជ័យក្រោមថ្វីជើងវៀតណាមក្នុងលទ្ធផល ២-១។ យ៉ាងណាមិញ ២ប្រកួតបន្ទាប់របស់ពួកគេហាក់ធ្វើបានល្អវិញ ដោយឈ្នះទាំងពីរប្រកួត មាន៦ពិន្ទុ។ ក្រោយមកទៀត ប្រកួតទី៤ បែរជាភ្លាត់បរាជ័យក្រោមថ្វីជើងក្រុមខ្សោយប្រ៊ុយណេ ២-០ ទៅវិញ ដែលធ្វើឱ្យឱកាសឡើងទៅវគ្គពាក់កណ្ដាលផ្ដាច់ព្រ័ត្រ ត្រូវចាំអ៊ុតជាមួយការប៉ះក្រុម U15 ម៉ាឡេស៊ី។

ជាចុងក្រោយនេះ ការប៉ះគ្នាជាមួយក្រុមម៉ាឡេស៊ី គឺក្រុម U15 កម្ពុជាព្យាយាមវាយសម្រុកខ្លាំងមែនទែន ដើម្បីស្វែងរកជ័យជម្នះ បានឡើងទៅវគ្គបន្ដ។ តែគួរឱ្យសោកស្ដាយ ការសម្រុកនោះមិនទទួលបានផលល្អនោះទេ ដោយបែរជាត្រូវគេនាំមុខក្នុងលទ្ធផល ២-០ ទៅវិញក្នុងតង់ទី១។ ដោយឡែកចូលដល់តង់ទី២វិញ ក្រុមកម្ពុជាតាមបាន២គ្រាប់វិញទៅហើយ តែម៉ាឡេស៊ីអាចថែមបាន២គ្រាប់វិញទៀត ធ្វើឱ្យលទ្ធផលបញ្ចប់ទៅដោយកម្ពុជា ចាញ់ ២-៤ មិនអាចឡើងវគ្គបន្ដបាន។

ដូច្នេះនេះមានន័យថាក្រុមកម្ពុជាត្រូវត្រលប់មកផ្ទះវិញ ខណៈដែលក្នុងពូលជាមួយគ្នានេះម៉ាឡេស៊ីត្រូវដឹកនាំក្រុមវៀតណាមឡើងទៅវគ្គពាក់កណ្ដាលផ្ដាច់ព្រ័ត្រ តតាំងជាមួយក្រុមម្ចាស់ផ្ទះថៃ និងអូស្ត្រាលី៕

អត្ថបទ៖ មុន្នីរម្យ