ធានាថាប្លែកក្រុងពាលីរឿង "រថយន្តទៅសៀមរាប" តួក្នុងរឿងតម្រូវឲ្យស្លៀក...

2017-07-19 05:40:50
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះផលិតកម្មចក្រវាឡពេជ្រភាពយន្តបានធ្វើពិធីក្រុងពាលីភាពយន្តខ្នាតធំរឿង "រថយន្តទៅសៀមរាប" ។ ក្នុងពិធីក្រុងពាលីនេះដែរតួអង្គដែលចូលរួមតម្រូវឲ្យស្លៀកពាក់សទាំងអស់។

ស៊ឹម សុរ៉ាមភូមិ ជាអ្នកនិពន្ធ និងជាអ្នកដឹកនាំសម្ដែងក្នុងរឿងនេះបានលើកឡើងថា មូលហេតុដែលតម្រូវឲ្យតួអង្គសម្ដែងក្នុងរឿង "រថយន្តទៅសៀមរាប" ស្លៀកពាក់សព្រោះចង់ឲ្យប្លែកភ្នែកមិនចង់ធ្វើអ្វីដដែលៗ ម្យ៉ាងវិញទៀតវាស្របពេលជាមួយបុណ្យចូលព្រះវស្សាប្រពៃណីជាតិខ្មែរផងមិនមែនកាន់ទុក្ខអ្វីមួយឡើយ។

“សម្រាប់ការស្លៀកពាក់សនេះ ខ្ញុំចង់ឲ្យប្លែក ណាមួយយើងកំពុងផលិតរឿង ស្របពេលបុណ្យចូលព្រះវស្សា ដែលជាបុណ្យប្រពៃណីជាតិខ្មែរ ព្រោះប្រទេសយើងជាប្រទេសកាន់ព្រះពុទ្ធសាសនា ពេលថតរឿងយើងអត់ឲ្យគាត់ស្លៀកបែបហ្នឹងទេ ឲ្យស្លៀកតែមួយថ្ងៃមកក្រុងពាលីរឿងតែប៉ុណ្ណោះ"។ ស៊ឹម សុរ៉ាមភូមិ ថ្លែង។

ដោយឡែកលោក ហាក់ ធៀមុនី ដែលជាផលិតករនៅផលិតកម្មចក្រវាឡពេជ្រភាពយន្ត បានបន្ថែមថា នេះជារឿងលើកទី១ ដែលផលិតកម្មចក្រវាឡពេជ្រភាពយន្ត បានសហការគ្នាជាមួយ ស៊ឹម សុរ៉ាមភូមិ ថតរឿង "រថយន្តទៅសៀមរាប" ជាប្រភេទរឿងដែលបែបកំប្លែងសើច របស់តួអង្គក្នុងរឿង ដែលធ្វើដំណើរពីបេនឡានផ្សារថ្មីទៅដល់ខេត្តសៀមរាប។

“រឿងនេះជារឿងបែបកំប្លែងសើច ដែលបានសម្រិតសម្រាំងឡើងពីអ្នកគ្រូ តាន់ សុវណ្ណឌី និង លោក ស៊ឺម សុរ៉ាមភូមិ ដែលជាអ្នកនិពន្ធ និងមានការជួយជ្រោមជ្រែងយ៉ាងពេញទំហឹងពីអ្នកស្រី ថុង ស៊ីទៀង ម្ចាស់ផលិតកម្មចក្រវាឡពេជ្រភាពយន្តតែម្ដង"។ នេះបើតាមប្រសាសន៍ លោក ហាក់ ធៀមុនី។

រឿង "រថយន្តទៅសៀមរាប" នេះនេះ នឹងចេញថតនៅថ្ងៃទី២០ ស្អែកនេះ ចូលរួមសម្ដែងដោយកញ្ញា ញឺម ចាន់ថន អ៊ុន អាលីហ្សា ស៊ឹម សុរ៉ាមភូមិ ហាក់ ធៀមុនី ម៉ុង ប៊ុនណូរ៉ា ម៉ា នីតា និងតារាសម្ដែងស្រីប្រុសជាច្រើនរូបទៀត៕