"ទេទឹកពុះ" ល្បីថា ជាតំបន់ធម្មជាតិនាំសំណាង និងអាចព្យាបាលជម្ងឺគ្រប់ប្រភេទ

2017-08-10 23:34:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទេទឹកពុះ ជាតំបន់ធម្មជាតិដ៏កម្រមួយនៅក្នុងប្រទេសកម្ពុជា ដែលជាតំបន់សក្ដិសិទ្ធ ការពារដោយពលរដ្ឋសហគមន៍តំបន់ការពារធម្មជាតិកោរដូនតី ស្ថិតក្នុងស្រុកឱរ៉ាល់ ចម្ងាយប្រមាណ ៦០គីឡូម៉ែត្រ ស្ថិតនៅទិសខាងលិចនៃទីរួមខេត្តកំពង់ស្ពឺ។

តាមប្រភពពីក្រសួងទេសចរណ៍បានឲ្យដឹងថា តំបន់ទេទឹកពុះនេះ ត្រូវបានប្រជាជនក្នុងតំបន់ ដែលជាជនជាតិសួយមានជំនឿថា ជាតំបន់សក្ដិសិទ្ធ អ្នកដែលមកលេងនៅទីនេះហើយ នឹងនាំសំណាងត្រឡប់ទៅវិញ ជាពិសេសអ្នកមានជម្ងឺគ្រប់ប្រភេទ អាចមកលុបលាងមុខដោយទឹកថ្លាឈ្វង់នៅទីនោះ នឹងអាចជាសះស្បើយពីជម្ងឺជាមិនខាន។

តំបន់ទេទឹកពុះ ជាតំបន់ដែលមានសីតុណ្ហភាពខ្ពស់រហូតដល់ ៧០អង្សារសេ ដែលមានទឹកចេញមកពីប្រភព៦ និងមានក្លិនដូចស្ពាន់ធ័រ និងថ្មកំបោរ។ ផ្ទៃទឹក ទំហំ ៨០ម៉ែត្រការ៉េ និងមានផ្ទៃដីសរុប ៥ហិកតា និងពោរពេញដោយស្មៅខ្ពស់ៗ កក់(ប្រភេទត្រែងម្យ៉ាង) និងថ្មក្រហម។

បន្ថែមពីលើនេះ ក្រសួងបរិស្ថាន បានដាក់តំបន់នេះ ជាតំបន់សហគមន៍ការពារធម្មជាតិទេទឹកពុះ ស្ថិតក្នុងភូមិសាស្ត្រស្រុកឱរ៉ាល់ ខេត្តកំពង់ស្ពឺ និងជួយសាងសង់ស្តូបតំណាងជនជាតិសួយ ដែលជាម្ចាស់ស្រុក ទីកន្លែងគោរពសក្ការៈ និងបង្កើតទីផ្សារបន្លែធម្មជាតិសម្រាប់ភ្ញៀវទេសចរ ដែលមកលេងកម្សាន្ត។ ការកម្សាន្តនេះ នឹងជួយឲ្យប្រជាពលរដ្ឋនៅសហគមន៍បានទទួលប្រាក់កម្រៃដែលជាចំណូលសម្រាប់អភិវឌ្ឍន៍គ្រួសារ។

ដោយឡែកសម្រាប់ប្រិយមិត្តអ្នកអាន ដែលមានបំណងចង់ទៅលេងតំបន់កម្សាន្តនាំសំណាងនោះ អាចដំណើរមកលេងដែលមានចម្ងាយពីក្រុងភ្នំពេញប្រមាណជាង ១០០ គីឡូម៉ែត្រ អាចចំណាយពេល ប្រហែល ៣ម៉ោងនឹងទៅដល់ ហើយអាចត្រឡប់មកវិញពេលល្ងាចបានផងដែរ៕