៥រឿង ស្នាដៃឯកឧត្តម ម៉ៅ អាយុទ្ធ កក្រើកវិស័យភាពយន្តខ្មែរ

2017-08-22 00:26:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម ម៉ៅ អាយុទ្ធ គឺជាផលិតករភាពយន្តដ៏ល្បីល្បាញមួយក្នុងចំណោមផលិតករជើងខ្លាំងដ៏ទៃទៀត។ ផលិតករល្បីល្បាញរូបនេះ មានស្នាដៃជាច្រើនក្នុងវិស័យសិល្បៈខ្មែរ ក្នុងនោះមានស្នាដៃផលិតខ្សែភាពយន្តខ្សែវីដេអូ ចម្រៀងកាយវិការ កំណាព្យ ប្រលោមលោកជាដើម។

ថ្ងៃនេះ Sabay សូមណែនាំនូវស្នាដៃនិពន្ធ និងដឹកនាំរឿងរបស់ឯកឧត្តម ម៉ៅ អាយុទ្ធ ចំនួន៥ រឿង ដែលធ្វើឲ្យកក្រើកវិស័យភាពយន្តខ្មែរតាំងពីសម័យមុន រហូតដល់បច្ចុប្បន្ន។

១. បិទភ្នែកហែកទ្រូង៖ រឿងនេះជាស្នាដៃផលិត និងដឹកនាំដំបូងរបស់ឯកឧត្តម នៅក្នុងសម័យសាធារណរដ្ឋខ្មែរ ឆ្នាំ១៩៧៣។ ស្នាដៃដំបូងរបស់ឯកឧត្តមនេះស្ថិតនៅក្នុងផលិតកម្ម បូព៌ាភាពយន្ត សម្តែងដោយលោក គង់ សំអឿន និងអ្នកស្រី គឹម ណូវ៉ា ហើយឯកឧត្តមក៏បានចូលរួមសម្តែងក្នុងរឿងនោះដែរ។

២. ចិត្តចងចាំ៖ ស្នាដៃដែលទទួលបានការគាំទ្រយ៉ាងខ្លាំង រហូតដល់ថ្នាក់បញ្ចាំងរយៈពេល១ខែពេញនេះ ផលិតឡើងនៅអំឡុងឆ្នាំ១៩៨៨-១៩៨៩។ «ចិត្តចងចាំ» គឺជាខ្សែភាពយន្តរបស់នាយកដ្ឋានភាពយន្ត សម្តែងដោយលោក ខៃ ប្រសិទ្ធ និង អ៊ុំ កណ្ណារី។

៣. ឆ្អឹងអណ្តែត៖ ផលិតនៅអំឡុងឆ្នាំ ១៩៩០-១៩៩១ របស់នាយកដ្ឋានភាពយន្ត រឿងនេះក៏ទទួលការគាំទ្រពីអ្នកទស្សនាជំនាន់នោះយ៉ាងខ្លាំង។ «ឆ្អឹងអណ្តែត» សម្តែងដោយតារាល្បីៗ ដូចជាលោក ទេព រិនដារ៉ូ អ៊ុំ កណ្ណារី អម្ពរ ទេវី ជា ណូបូ។

៤. នេសាទក្រពើ៖ រឿងរបស់ផលិតកម្ម ហង្សមាសនេះ ទទួលបានភាពល្បីល្បាញ អំឡុងឆ្នាំ២០០៣-២០០៤ ចូលរួមសម្តែងដោយតារាល្បីៗជាច្រើន ដូចជាលោកព្រាប សុវត្ថិ ស៊ឹម សូលីកា ញ៉ែម សុគន្ធ នាយព្រែក។ រឿងនេះមិនត្រឹមតែទទួលបានការគាំទ្រកាលពីជាង១០ឆ្នាំនោះទេ រៀងរាល់ឆ្នាំពេលដាក់បញ្ចាំងឡើងវិញម្តងៗ ក៏នៅតែមានអ្នកទៅទស្សនា។ ភាពយន្តនេះដែរទទួលបានពានមាស ជាប់ចំណាត់ថ្នាក់លេខ១ក្នុងមហោស្រពវីដេអូជាតិលើកទី២ ឆ្នាំ២០០៥។

៥. ហ្លួងព្រះស្តេចកន៖ ភាពយន្តបែបប្រវត្តិសាស្រ្តប្រចាំឆ្នាំ២០១៧នេះ ចំណាយពេលស្រាវជ្រាវ និងផលិតដល់ទៅ២ឆ្នាំ និងថវិកា១លានដុល្លារ ដោយទូរទស្សន៍ PNN ដែលចូលរួមសម្តែងដោយលោកទេព រិនដារ៉ូ ស៊ិន សក្កដា រស់ សោភ័ណ ឆុំ វត្តី ហេង ប៊ុនលាភ ឌី សាវ៉េត ទ្រង់ ស៊ីសុវត្ថិ សិរីវុឌ ។ ស្នាដៃបែបប្រវត្តិសាស្ត្រ និងជាការប៉ងដឹកនាំរបស់ឯកឧត្តមជាង ១០ឆ្នាំមកនេះ ថ្វីត្បិតតែទើបដាក់បញ្ចាំងបានប៉ុន្មានថ្ងៃ តែមានអ្នកទស្សនាភ្លូកទឹកភ្លូក៕