LG ចេញវីដេអូស្ប៉តពីរដូចចង់បំបាក់មុខ Galaxy Note 8 ដែលប្រកាសយប់នេះ

2017-08-23 02:03:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆាប់ៗខាងមុខនេះស្មាតហ្វូនជំនាន់ថ្មីរបស់ LG និង Samsung នឹងបង្ហាញវត្តមានជាផ្លូវការហើយគឺ LG V30 និង Galaxy Note 8។ ស្របពេលដែល Note 8 មានបំពាក់នូវប៊ិច S Pen ស្មាតហ្វូន LG ឯណោះវិញមិនមានប្រើប៊ិចឡើយ។ តែយ៉ាងណា LG ហាក់មិនចាប់អារម្មណ៍នឹងប៊ិច S Pen របស់ Galaxy Note 8 ឡើយ ដោយបានបង្ហាញតាមរយៈវីដេអូស្ប៉តចំនួនពីរនៃ LG V30។

វីដេអូដំបូងបង្ហាញពីការកាច់បំបាក់ខ្មៅដៃដើម្បីធ្វើជាអក្សរ V។ ចំណែកវីដេអូទីពីរវិញមានបង្ហាញពីប៊ិច ដោយគេយកប៊ិចនោះទៅសរសេរជាអក្សរកូរ៉េលើសៀវភៅ ដែលមានន័យថា "មានមូលហេតុដែលគួរតែបែកគ្នាជាមួយអ្នក”។ បន្ទាប់មកសន្លឹកដែលបានសរសេរនោះត្រូវបានហែកចោល ហើយសៀវភៅក៏ត្រូវបានគ្រវាត់ចោលដែរ។ តាមវីដេអូពីរនេះទំនងជា LG ចង់បង្ហាញថា V30 នឹងធ្វើឲ្យអតិថិជនចង់ប្រើវាជាជាង Note ស៊េរីថ្មី។

គួរបញ្ជាក់ថា LG V30 នឹងបង្ហាញខ្លួននៅថ្ងៃទី ៣១ ខែសីហា ចំណែកឯ Galaxy Note 8 នឹងបង្ហាញខ្លួនជាផ្លូវការនៅយប់ថ្ងៃទី ២៣ នេះហើយ។ យ៉ាងណាក្ដីស្មាតហ្វូនទាំងពីរអាចនឹងចេញលក់នៅក្នុងខែកញ្ញាដូចគ្នា៕

ប្រភព៖ PhoneArena ប្រែសម្រួល៖ សុខហេង