យកសាច់គោ និងសាឡាត់ សុំមិត្តស្រីរៀបការ ភ្ញាក់ផ្អើលពេញហាង

2017-08-31 04:25:08
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ន ការសុំមិត្តស្រីរៀបការដោយមានការចូលរួមពីមិត្តភ័ក្ដិបងប្អូន កំពុងពេញនិយមនៅតាមប្រទេសផ្សេងៗក្រោមរូបភាពប្លែកៗគ្នាទៅតាមចំណង់ចំណូលចិត្តខាងប្រុស ចង់ធ្វើឲ្យមិត្តស្រីភ្ញាក់ផ្អើល។

ការស្នើសុំរៀបការ បន្ទាប់ពីមើលចិត្តគ្នាអស់រយៈពេលជាយូរនេះ ភាគច្រើនគេជ្រើសរើសបាច់ផ្កាកុលាបជូនមិត្តស្រី រួចបំពាក់ចិញ្ចៀន បើខាងស្រីយល់ព្រម។ ប៉ុន្តែសម្រាប់គូស្នេហ៍នេះវិញ បានធ្វើប្លែកគេ គឺយកចំណិតសាច់គោដាក់ជាមួយបាច់បន្លែសាឡាត់ ព្រោះមិត្តស្រីចូលចិត្តញ៉ាំសាច់គោ។

បុរសរូបនេះមានឈ្មោះ Mu Siyao រស់នៅទីក្រុង Changchun ប្រទេសចិន បានធ្វើឲ្យបណ្ដាញសារព័ត៌មានក្នុងស្រុកជាច្រើនចុះផ្សាយ។ ការសុំមិត្តស្រីរៀបការ គឺជាអនុស្សាវរីយមួយរបស់ពួកគេដែលកើតឡើងមុនមួយថ្ងៃនៃទិវា Qixi Festival ជាទិវានៃក្ដីស្រលាញ់របស់ជនជាតិចិន ឬហៅ Chinese Valentine's Day ដែលកន្លងទៅប៉ុន្មានថ្ងៃថ្មីៗនេះ។

តាមរយៈវីដេអូ គេឃើញលោក Mu Siyao បានលុតជង្គង់ចុះ ដៃកាន់បាច់សាឡាត់សាច់គោ ជាមួយចិញ្ចៀនមួយវង់ និងនិយាយទៅកាន់មិត្តស្រីថា "យើងបានជួបគ្នានៅក្នុងហាងនេះ។ រយៈពេល ២ឆ្នាំហើយ ម្ហូបដែលអូនចូលចិត្តជាងគេ គឺសាច់គោក្នុងហាងនេះ ដូច្នេះបងគិតថា បងនឹងឲ្យអូននូវអ្វីដែលអូនចូលចិត្ត។ តើអូនព្រមរៀបការនឹងបងទេ”? មិត្តស្រីរំភើបផង សើចផង រួចក៏ឆ្លើយយល់ព្រម។

អ្នកប្រើប្រាស់អ៊ីនធឺណិតចិនជាច្រើន បានអបអរសាទរគូស្នេហ៍ខាងលើ និងកោតសរសើរខាងប្រុសថា "ពិតជាមិត្តប្រុសដឹងចំណង់ចំណូលចិត្តមិត្តស្រីមែន។ ពួកគេផ្អែមល្ហែមខ្លាំងណាស់"៕