ពីពលករខុសច្បាប់ ក្លាយជាអ្នកផលិតគំនូរជីវចល មិនខ្វះក្រុមហ៊ុនចង់បាន

2017-09-01 03:29:46
ចំនួនមតិ 0 | ចំនួនចែករំលែក 0

ចន្លោះមិនឃើញ

មានកម្រិតវប្បធម៌ត្រឹមថ្នាក់ទី១១ លោក បូរ ហាក់ ធ្លាប់ជួបជីវិតកម្សត់តាំងពីតូច ដោយធ្លាប់ចំណាកស្រុកទៅប្រទេសថៃតាំងពីអាយុ១២ឆ្នាំ តែពេលនេះក្លាយជាអ្នកផលិតគំនូរជីវចលដែលមានក្រុមហ៊ុនជាច្រើនត្រូវការ។

កន្លងទៅនេះសិស្សដែលមកពីសមាគមហ្វារពន្លឺសិល្បៈរូបនេះ បានជាប់ជយលាភីលេខ១ ក្នុងកម្មវិធីគំនូរជីវិចល DigiCon6ឆ្នាំ២០១៧ លើស្នាដៃគំនូរជីវចលដែលមានចំណងជើងថា "សក់ស្មើសូន្យ” ហើយស្នាដៃនេះនឹងត្រូវតំណាងកម្ពុជាទៅប្រកួតក្នុងកម្មវិធីគំនូរជីវចល DigiCon6 Asia នៅទីក្រុង តូក្យូ ប្រទេសជប៉ុននៅពេលខាងមុខផងដែរ។

ផលិតករវ័យ២៧ឆ្នាំរូបនេះបានប្រាប់ Sabay ថាកាលពីតូចខ្លួនធ្លាប់ស្រមៃថាចង់រៀនដែរ តែវាត្រឹមតែជាក្ដីស្រមៃដែលគ្មានសង្ឃឹម ព្រោះតែគ្រួសារក្រីក្រ។ ជាក្មេងកំព្រាឪពុក មានតែម្ដាយក្រីក្រនៅមើលថែ ហាក់ ត្រូវបង្ខំចិត្តចំណាកស្រុកខុសច្បាប់ទៅប្រទេសថៃតាមមេខ្យល់ តាំងពីខ្លួននៅវ័យកុមារនៅឡើយ។ បន្ទាប់ពីធ្វើការស្រុកថៃមួយរយៈ និងបានផ្លាស់ប្ដូរកន្លែងការងារជាច្រើនរួចមក ថ្ងៃមួយតម្រួតថៃបានចាប់បញ្ជូនប្អូនមកប្រទេសខ្មែរវិញ។

នៅពេលមកដល់ព្រំដែនប៉ោយប៉ែត មានអង្គការមួយបានជ្រើសរើសកុមារតូចៗឱ្យបានចូលរៀន ក្នុងនោះក៏មានប្អូនដែរ។ កុមាររូបនេះបានរៀនក្នុងអង្គការ២រួចមកហើយ មុននឹងចូលសមាគមហ្វារពន្លឺសិល្បៈ។ ដោយមាននិស្ស័យខាងគូរគំនូរ ហាក់ បានចាប់ជំនាញគំនូរជីវចល និងបានសិក្សាវាដោយជោគជ័យនៅហ្វារពន្លឺសិល្បៈ។ បន្ទាប់ពីបញ្ចប់ការសិក្សាមកមានក្រុមហ៊ុនដែលធ្វើការលើផ្នែកនេះជាច្រើន បានមកទាក់ទងកក់យុវជនរូបនេះឱ្យទៅធ្វើការក្នុងក្រុមហ៊ុនរបស់ខ្លួន។

“មានក្រុមហ៊ុនពី២ ទៅ៤ក្រុមហ៊ុនដែលចង់ឱ្យខ្ញុំទៅធ្វើការ ទាំងនៅភ្នំពេញ និងនៅបាត់ដំបង។ ដោយសារនៅបាត់ដំបងខ្ញុំមានផ្ទះស្នាក់នៅ មិនបាច់ចំណាយច្រើនដូចនេះភ្នំពេញ ហើយពេលទំនេរដូចជាសៅរ៍អាទិត្យខ្ញុំអាចគូរគំនូរទំនើបផ្សេងៗ និងចម្លាក់លក់បានទៀត ដូច្នេះខ្ញុំជ្រើសរើសក្រុមហ៊ុននៅបាត់ដំបងទៅ"។

នាយកសាលាផ្នែកសិល្បៈសូន្យរូបលោក សម្បត្តិ រស្មី បានឱ្យដឹងថា សិស្សដែលរៀននៅហ្វារពន្លឺសិល្បៈ៩៩%ក្រោយពីបញ្ចប់ការសិក្សាមានការងារធ្វើ។

អត្ថបទៈ ប៉ូ សាគុន