បុរសម្នាក់នេះដើរ ១០ ប្រទេសបូកទាំងកម្ពុជា ចាយអស់តែ ៥ ពាន់ដុល្លារ

2017-09-27 07:07:35
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រងដោយខោសាច់កំណាត់ អាវយឺតដៃខ្លី មានវែនតាជាប់នឹងកអាវ អង្គុយផ្អែកជញ្ជាំងរថយន្ត Pick Up បុរសជនជាតិអាមេរិក បានប្រាប់ភ្នាក់ងារ ៣០ដេលី លោក លន ហ្សាឌីណា ទាំងទឹកមុខញញឹមថា រយៈពេល៨ខែមកនេះ លោកបានធ្វើដំណើរផ្សងព្រេង បានចំនួន ១០ ប្រទេសហើយ រាប់បញ្ចូលទាំងកម្ពុជាផងដែរ ដោយចំណាយប្រាក់អស់ត្រឹមតែ ៥ ពាន់ដុល្លារប៉ុណ្ណោះ។

ការចំណាយខ្ទង់ប៉ុណ្ណេះ អាចនិយាយបានថា ជាការចំណាយតិចតួចស្ដួចស្ដើងមួយ ព្រោះប្រទេសដែលលោកទៅលេងភាគច្រើន ត្រូវការចំណាយខ្ពស់។ ប្រទេសដែលបុរសពុកមាត់នេះទៅ មាន ព័រទុយហ្គាល់ ដាណឺម៉ាក ប៉ូឡូញ អេស្ប៉ាញ ពិភពអារ៉ាប ឥណ្ឌា ឡាវ ម៉ាឡេស៊ី ថៃ និងចុងក្រោយ គឺ កម្ពុជា។

លោកសង្កត់ធ្ងន់ថា លោកប្រើប្រាស់មធ្យោបាយធ្វើដំណើរច្រើន រួមមានទាំង រថភ្លើង ម៉ូតូ និង ដើរជាដើម ចំណែកកន្លែងស្នាក់វិញ លោករកតែតម្លៃធូរថ្លៃខ្ទង់ ៥ ទៅ ១០ដុល្លារប៉ុណ្ណោះ។ បើមិនដូច្នេះទេ លោកសុំផ្ទះប្រជាពលរដ្ឋស្នាក់នៅ។ ចំពោះរយៈពេលធ្វើដំណើរវិញ លោកបានប្រាប់ថា អាស្រ័យលើប្រទេស បើប្រទេសនៅតំបន់អឺរ៉ុប ត្រូវចំណាយពេល ១ ខែកន្លះ ១ ឬ ២ សប្ដាហ៍ជាដើម។

"នៅតំបន់អឺរ៉ុប ខ្ញុំចំណាយ ១ ខែកន្លះ ឌូបៃ ១ សប្ដាហ៍ ឥណ្ឌា ១ខែកន្លះ ម៉ាឡេស៊ី ២សប្ដាហ៍ ថៃ១ សប្ដាហ៍ ឡាវ ៣សប្ដាហ៍ កម្ពុជា ៣ សប្ដាហ៍"។ លោកបញ្ជាក់បន្ថែម។

ក្នុងការធ្វើដំណើររយៈពេល ៨ ខែលើ១០ប្រទេសនេះ លោកទទួលបានរូបភាព និងបទពិសោធន៍ជាច្រើន ដូចជាទេសភាពស្អាតៗ ជីវិតរស់នៅប្រចាំថ្ងៃ ភាសា ម្ហូបអាហារ និងរឿងប្លែកៗជាច្រើន ដែលលោកមិនធ្លាប់ឃើញ។ ពេលសួរថាតើលោកជួបការលំបាកអ្វីខ្លះ អំឡុងពេលធ្វើដំណើរ? ទេសចររូបនេះ ពន្យល់ថា សំលៀកបំពាក់ និងរបស់ប្រើប្រាស់ជាច្រើនទៀតរបស់លោក ត្រូវបានគេលួច។

"អូ...! ពួកគេលួចទូរសព្ទរបស់ខ្ញុំ នៅឡាវ ... ខ្ញុំរកពួកគេ ខ្ញុំប្រាប់ប៉ូលិស ឱ្យអន្តរាគមន៍ សំណាងល្អ ខ្ញុំបានទូរសព្ទខ្ញុំមកវិញ ខ្ញុំចំណាយពេល២ ថ្ងៃ ទើបបានមកវិញ .... ខ្ញុំបាត់ខោអាវ ខ្ញុំបាត់ច្រើន តែវាមិនសូវសំខាន់ណាស់ណាសម្រាប់ខ្ញុំ ខ្ញុំត្រូវការតែកាបូបលុយ លិខិតឆ្លងដែន និងទូរសព្ទរបស់ខ្ញុំប៉ុណ្ណោះ"។

បុរសអាមេរិករូបនេះ បានឱ្យដឹងថា លោកមាគម្រោង២ឆ្នាំ ដើម្បីដើរលេងនៅប្រទេសនានាលើពិភពលោក ជាពិសេសប្រទេសនៅតំបន់អាស៊ីអាគ្នេយ៍។

គួរបញ្ជាក់ថា បន្ទាប់ពីមកលងនៅកម្ពុជា លោកគ្រោងទៅលេងប្រទេសវៀតណាម និងឆ្ពោះទៅប្រទេសប្រទេសផ្សេងទៀត មុនត្រឡប់ទៅស្រុកកំណើតវិញ ដើម្បីមើលថែក្រុមគ្រួសារ និងកូនប្រុសរបស់លោក៕

រូបភាព៖ លន់ ហ្សាឌីណា

អត្ថបទ៖ អ៊ុំ សុភក្តិ