តន្ត្រី"បង្សុកូល"កម្ពុជា មានតម្លៃជាសកល សម្ដែងក្នុងមហោស្រពលំដាប់ពិភពលោក

2017-10-03 08:47:12
ចំនួនមតិ 0 | ចំនួនចែករំលែក 0

ចន្លោះមិនឃើញ

តន្ត្រី "បង្សុកូល” ដែលជាស្នាដៃនិពន្ធរបស់ផលិតករកម្ពុជាដ៏ល្បី នឹងត្រូវយកទៅសម្ដែងនៅបណ្ដាប្រទេសប៉ែកអឺរ៉ុប និងអាស៊ី មួយចំនួន ពិសេសជាងនេះទៅទៀត នេះជាតន្ត្រីតែមួយគត់ពីកម្ពុជា ដែលមានកិត្តិយសទៅសម្ដែងក្នុងមហោស្រពដ៏ល្បីលំដាប់ពិភពលោកដ៏កម្រនៅច្រើនប្រទេស។

នាយកប្រតិបត្តិនៃអង្គការសិល្បៈខ្មែរអមត និងជាប្រធានផលិតករគម្រោងតន្ត្រី "បង្សុកូល" លោក ព្រីម ភ្លឿន បានប្រាប់ Sabay ថា ការបង្កើតស្នាដៃ "បង្សុកូល” នេះឡើង ក្នុងគោលបំណងរំឭកដល់ប្រជាជនកម្ពុជាដែលបានស្លាប់ទៅក្នុងសម័យខ្មែរក្រហម។ ម្យ៉ាងទៀតជាការផ្សះផ្សារផ្នែកអារម្មណ៍ចំពោះអ្នកដែលបានបាត់បង់សាច់ញាតិក្នុងសម័យនោះ។

លោកបញ្ជាក់ថា កម្មវិធីនេះរៀបចំឡើងដោយស្ថានទូតអូស្ត្រាលី ការសម្ដែងថ្ងៃនេះធ្វើឡើងទុកជាការបង្ហាញទស្សនីយភាពខ្លីមួយ មុនពេលយកទៅសម្ដែងនៅបណ្ដាប្រទេសធំៗលើពិភពលោក។ តន្ត្រីនេះនឹងយកទៅសម្ដែងនៅក្នុងមហោស្រពលំដាប់ពិភពលោកជាច្រើនប្រទេស ដូចជានៅអូស្ត្រាលីសម្ដែងនៅថ្ងៃទី ១៣ និង ១៤ ខែតុលានេះ។ ចំណែកនៅ អាមេរិក បារាំង ចិន ហុងកុង និងនៅបណ្ដាប្រទេស ប៉ែកអឺរ៉ុប និងអាស៊ីជាច្រើនប្រទេសទៀត នឹងមានការសម្ដែងនាពេលខាងមុខបន្តបន្ទាប់គ្នា។

លោក ព្រីម ភ្លឿន ប្រធានផលិតករគម្រោងតន្ត្រី "បង្សុកូល"

“សម្រាប់ប្រជាជនកម្ពុជា នេះជាស្នាដៃថ្មី ចំណែកអត្ថន័យវិញ វាជាការផ្សះផ្សារចំពោះអ្នកដែលបានរងគ្រោះក្នុងរបបខ្មែរក្រហម ហើយក្មេងៗវិញគាត់អាចរៀនសូត្រពីនេះ ដើម្បីបង្កើតស្នាដៃថ្មី និងទុកជាការអប់រំផងដែរ”។

អ្នកនិពន្ធបទភ្លេង និងជាអ្នកផ្ដួចផ្ដើមឱ្យមានស្នាដៃនេះ សាស្ត្រាចារ្យបណ្ឌិត ហ៊ឹម សុភី បានមានប្រសាសន៍ថា តន្ត្រី "បង្សុកូល"នេះ ជាស្នាដៃធំ ខ្នាតអន្តរជាតិទីពីរ បន្ទាប់ពីស្នាដៃ "ទីដំរីយំ” ដែលលោកបានធ្វើនៅឆ្នាំ២០០៨។ ស្នាដៃនេះទម្រាំបានចេញជារូបរាង ត្រូវចំណាយពេលស្រាវជ្រាវ និងគិតរហូតដល់ទៅជិត១០ឆ្នាំ ពោលគឺបន្ទាប់ពីស្នាដៃ "ទីដំរីយំ” បានបញ្ចប់ លោកក៏ចាប់ផ្ដើមគិតពីការបង្កើតស្នាដៃនេះតែម្ដង។ លោកបញ្ជាក់ ថា លោក ប៉ាន់ រិទ្ធី ដែលជាផលិតករដ៏ល្បីក្នុងប្រទេសកម្ពុជា ក៏ជាផលិតករក្នុងស្នាដៃលំដាប់ពិភពលោកនេះ។

សាស្ត្រាចារ្យបណ្ឌិត ហ៊ឹម សុភី អ្នកនិពន្ធបទភ្លេង និងជាអ្នកផ្ដួចផ្ដើមឱ្យមានស្នាដៃនេះ

“ស្នាដៃនេះមិនមែនធ្វើឡើងសម្រាប់តែកម្ពុជាប៉ុណ្ណោះទេ តែសម្រាប់ពិភពលោកទាំងមូល វានិយាយអំពីសោកនាដកម្មនៃសង្គ្រាម អ៊ីចឹងបានជាថ្ងៃនេះ មានខាងស្ថានទូតជាច្រើនប្រទេសមកចូលរួម ហើយគេយល់ពីតម្លៃរបស់វា។ ប្រទេសជឿនលឿនគេជឿជាក់ថា តន្ត្រីគឺជាឱសថទិព្វ ជាការផ្សះផ្សារ វាមានឥទ្ធិពលខ្លាំងអាចកែប្រែសង្គម ប្រទេសជាច្រើនគេចង់ឱ្យតន្ត្រីនេះទៅសម្ដែងនៅប្រទេសគេ ហើយយើងចង់ទៅសម្ដែងច្រើនប្រទេសតាមតែអាចធ្វើទៅបាន”។

លោក ប៉ាន់ រិទ្ធី ផលិតករតន្ត្រី "បង្សុកូល”

តន្ត្រី "បង្សុកូល" មានតន្ត្រីករជិត៤០នាក់ចូលរួមសម្ដែង មានឧបករណ៍ភ្លេងបុរាណខ្មែរ និងឧបករណ៍ភ្លេងបស្ចិមប្រទេសសម្ដែងរួមគ្នា និងមានអ្នកស្មូតផងដែរ។ បើតាមការបញ្ជាក់ពីសាស្ត្រាចារ្យបណ្ឌិត ហ៊ឹម សុភី ស្នាដៃនេះប្រៀបបាននឹងការអានប្រលោមលោកអ៊ីចឹងដែរ។

ភ្ញៀវចូលរួមក្នុងកម្មវិធីបើកតន្រ្តី "បង្សុកូល” នៅស្ថានទូតអូស្ត្រាលីយប់មិញនេះ មានតាំងពីខ្សែរាជវង្ស ថ្នាក់ដឹកនាំក្រសួងវប្បធម៌ និងវិចិត្រសិល្បៈ និងមានឯកអគ្គរដ្ឋទូតពីបណ្តាប្រទេសជឿនលឿន និងប្រទេសមហាអំណាចជាច្រើន។ ស្នាដៃនេះនឹងសម្ដែងនៅក្នុងប្រទេសកម្ពុជានៅឆ្នាំ ២០១៩ ក្នុងឱកាសខួបអនុស្សាវរីយទី៤០ឆ្នាំ នៃការរំដោះកម្ពុជាចេញពីរបបប្រល័យពូជសាស្ត្រខ្មែរក្រហម។

ក្នុងស្នាដៃ "បង្សុកូល” ទាំងមូល មាន៩ផ្នែក ឬ៩ចំណងជើងផ្សេងៗគ្នា៖ ១ ព្រលឹងវិលវល់ / កណ្ដោចកណ្ដែង ២ អញ្ជើញត្រាប់ត្រង / កកើតសង្គ្រាម ៣ ឱពៅអើយរ៉ា / គេយកកូនទៅ ៤ ទុកមិនចំណេញ / ដកចេញមិនខាត ៥ គេយកទៅចោលក្នុងព្រៃជ្រៅ ៦ រងចាំទឹកទិព្វ / ដល់ព្រលឹងគ្រប់ ៧ សំពត់បង្សុកូលសត្រសុស / បកស្បែកនោះហើយទើបបានសុខ ៨ រូបំ ទុក្ខំ / សូន្យបាត់ទៅហោង ៩ ព្រលឹងវិលវល់ / រស់រវើកឡើងវិញ។

អត្ថបទ៖ ប៉ូ សាគុន