នំស្លឹកចាកខេត្តកំពត ល្បីថាឆ្ញាញ់លក់ដាច់ស្ទើរវេចមិនទាន់

2017-10-09 03:33:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកទៅលេងខេត្តកំពតប្រហែលជាធ្លាប់ឃើញ ឬក៏ធ្លាប់បានទិញនំស្លឹកចាកទទួលទានផងដែរ។ នំ នេះធ្វើឡើងពីអង្ករដំណើបដែលត្រាំហើយកិនជាម្សៅរួចលាយជាមួយស្ករត្នោត ល្ងរ និងដូង ហើយវេចខ្ចប់ដោយស្លឹកចាកមុននឹងយកទៅអាំង។ អ្នកដែលធ្លាប់បរិភោគនំប្រភេទនេះសរសើរថាឆ្ញាញ់ និងមានក្លិនឈ្ញុយ។

(នំស្លឹកចាកដែលអាំងឆ្អិន)

អ្នកស្រី ចាន់ ហួន ដែលកំពុងរស់នៅក្នុងក្រុងកំពតចំងាយប្រហែល៣០០ម៉ែត្រពីស្ពាឥន្ធនូ និងបានប្រកបរបរនេះជិត២០ឆ្នាំមកហើយនោះប្រាប់ Sabay ថាស្លឹកចាកជាផ្នែកមួយជួយធ្វើឲ្យនំនេះមានក្លិនឈ្ងុយ។ អ្នកស្រីបន្តថាអ្នកស្រីអាចលក់នំស្លឹកចាកនេះបានច្រើនគួរសមក្នុងមួយថ្ងៃដោយ ថាអ្នកស្រីផលិតនំនេះដោយប្រើអង្ករដំណើបចន្លោះពីប្រាំទៅប្រាំពីរគីឡូក្រាមក្នុងមួយថ្ងៃ។

(ស្លឹកចាកត្រៀមសម្រាប់វេចនំ ដែលសំបូរដុះនៅតំបន់ទឹកឈូ)

អ្នកស្រីបញ្ជាក់ៈ « ពីមុនធ្វើអង្ករតែពីរគីឡូលក់មិនចង់អស់ផង តែបួនប្រាំឆ្នាំនេះលក់បានច្រើនជាងមុនធ្វើអង្ករដល់ប្រាំគីឡូជួនប្រាំពីរគីឡូតាមគេបញ្ជាទិញច្រើនតិច...ជួនកាលអ្នកមកពីក្រៅប្រទេស គាត់មកលេង គាត់ចង់ញ៉ាំនំយើង មកដល់អត់មាននំឲ្យទេ ទាល់តែប្រាប់មុន សូម្បីតែអ្នកដែលនៅក្បែរផ្ទះ ក៏គាត់ប្រាប់មុនដែរ»។ ដែម្ខាងកំពុងកាន់ស្លឹកចាក និងដៃម្ខាងទៀតកំពុងលូកចាប់ម្សៅ អ្នកស្រីបន្តថា ក្រោយទូទាត់ថ្លៃដើមអ្នកស្រីអាចចំណេញបានប្រហែលជា១០ម៉ឺនរៀលក្នុងមួយថ្ងៃ។

(អ្នកស្រី ចាន់ ហួន កំពុងអង្គុយវេចនំស្លឹកចាក)

យូរៗម្តងយកដៃជូនថ្ងាង អ្នកស្រីបន្តថាថ្វីត្បិតមានការចំណេញបែបនេះក្តីតែអ្នកស្រីថាក្រុមគ្រួសារអ្នកស្រីត្រូវក្រោកពីដំណេកប្រហែលជាម៉ោងបីទាបភ្លឺដោយថាដើម្បីរៀបចំម្សៅ និងស្លឹកជាដើម និងម្យ៉ាងដើម្បីធ្វើឲ្យទាន់ការបញ្ជាទិញ។ អ្នកស្រីឲ្យដឹងថាកូនស្រីត្រូវអង្គុយអាំងនំនេះតាំងពីព្រឹករហូតដល់ថ្ងៃត្រង់និងពីពេលរសៀលដល់ល្ងាចទៀតបើមានការបញ្ជាទិញច្រើន។

(កូនអ្នកស្រី ចាន់ ហួន កំពុងអង្គុយអាំងនំស្លឹកចាក)

បើតាមអ្នកស្រី ចាន់ ហួន នំមួយអ្នកស្រីលក់ក្នុងតម្លៃប្រាំពីររយរៀលដែលមានទំហំប្រហែលបីធ្នាប់ដៃ។ នំទាំងនេះអ្នកស្រីថាមានគេបញ្ជាទិញពីតាមបណ្តតាខេត្ត និងក្នុងខេត្ត ដោយអ្នកស្រីមិនបានយកទៅលក់ឯផ្សារដោយខ្លួនឯងនោះទេ។ សម្រាប់អ្នកបញ្ជាទិញតាមបណ្តាខេត្តអ្នកស្រីអាចផ្ញើតាមរថយន្តទៅឲ្យបានបើអ្នកទាំងនោះមិនអាចមកយកដោយខ្លួនឯងបាន។

អ្នកស្រីឲ្យដឹងថាអ្នកស្រីចេះពីរបៀបធ្វើនំនេះពីម្តាយរបស់អ្នកស្រី និងថាពេលនេះកូនស្រីម្នាក់របស់អ្នកស្រីបានបន្តវេនពីអ្នកស្រី៕

អត្ថបទដោយ៖ គីមសាយ