ឡានក្រុង Toyota ជំនាន់ថ្មី ដើរដោយបច្ចេកវិទ្យា Fuel Cell

2017-10-25 02:48:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកម្មវិធីតាំងបង្ហាញរថយន្ត Tokyo Motor Show ឆ្នាំ ២០១៧ ក្រុមហ៊ុន Toyota បានដាក់បង្ហាញនូវរថយន្តស៊េរីថ្មីៗជាច្រើន រួមមានរថយន្តក្រុងដែលជាប្រភេទរថយន្ត Concept ផងដែរ។

វាមានឈ្មោះថា Sora (តំណាងឲ្យពាក្យ Sky, Ocean, River និង Air) ជារថយន្តក្រុងដើរដោយបច្ចេកវិទ្យា Fuel Cell ដូចគ្នាទៅនឹង Toyota Mirai ដែរ ដែលបច្ចេកវិទ្យានេះបង្កើតថាមពលបានដោយប្រើសារធាតុអ៊ីដ្រូសែន និងអុកស៊ីសែន។ រថយន្តក្រុងនេះអាចផ្ទុកមនុស្សបានដល់ ៧៩ នាក់ (កៅអីអង្គុយ ២២, អាចឈរបាន ៥៦ នាក់ រួមទាំងតៃកុងម្នាក់)។

ការបំពាក់ចង្កៀង LED ទាំងមុខ ក្រោយ ធ្វើឲ្យរថយន្តនេះលេចធ្លោបំផុត ប៉ុន្តែចំណុចដែលធ្វើឲ្យរថយន្តនេះលេចធ្លោជាងរថយន្តក្រុងដទៃទៀតគឺផ្នែកខាងក្នុង។ Sora ក៏ជារថយន្តក្រុងដំបូងក្នុងប្រទេសជប៉ុនដែលមានបំពាក់កាមេរ៉ា HD ចំនួន ៨ គ្រាប់ មានទាំងក្នុងនិងក្រៅ ដែលអាចត្រួតពិនិត្យស្ថានការណ៍ជុំវិញ និងនៅក្នុងរថយន្តបាន។ មិនតែប៉ុណ្ណោះក៏មានប្រព័ន្ធឲ្យសញ្ញានៅពេលមានកង់ ឬអ្នកដំណើរស្ថិតនៅពីមុខរថយន្តផងដែរ។

Toyota មានគម្រោងថានឹងផលិតវាចេញជារថយន្តដោយផ្អែកតាម Concept នេះនៅឆ្នាំ ២០១៨ ឲ្យបាន ១០០ គ្រឿងសម្រាប់ដាក់ប្រើនៅទីក្រុង Tokyo មុនព្រឹត្តិការណ៍អូឡាំពិកឆ្នាំ ២០២០ នៅជប៉ុន ចូលមកដល់៕

អត្ថបទ៖ សុខហេង