ផលិតកម្ម២ចាប់ដៃគ្នាវាយលុកទីផ្សារអាមេរិកលើកដំបូង

2017-11-08 04:55:44
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហ៊ុយ យ៉ាឡេង ចាងហ្វាងផលិតកម្មមាតុចក្រ និងអ្នកស្រី ស កេសារ៉ា ម្ចាស់ផលិតកម្មកេសារ៉ា បានចាប់ដៃគ្នានាំយកភាពយន្តខ្មែរជាច្រើនរឿងទៅចាក់បញ្ចាំងនៅសហរដ្ឋអាមេរិកលើកដំបូង។

លោក ហ៊ុយ យ៉ាឡេង បានលើកឡើងថា ដោយសារតែការស្រលាញ់វិស័យសិល្បៈខ្មែរ ទើបលោក និង អ្នកស្រី ស កេសារ៉ា បានគិតគ្នាយករឿងខ្មែរមួយចំនួននៅក្នុងផលិតកម្មរបស់ខ្លួន និងរឿងមួយចំនួនមកពីផលិតកម្មផ្សេងទៀតទៅចាក់បញ្ចាំងនៅសហរដ្ឋអាមេរិក ដើម្បីឲ្យបងប្អូនខ្មែររស់នៅទីនោះបានទស្សនា។ ជាពិសេសបានជួយផ្សព្វផ្សាយកុនខ្មែរនៅប្រទេសមហាអំណាចមួយនេះផងដែរ។

ចាងហ្វាងផលិតកម្មមាតុចក្របាននិយាយថា៖“រឿងមុនដំបូងដែលយើងយកទៅបញ្ចាំងនៅអាមេរិកគឺជ្រើសរើសយករឿង ខ្ញុំ និងអ្នកមីង កេសារ៉ា មុនសិន។ រឿងខ្ញុំមាន "វិកលចរិត" និងរឿង "ធ្មប់" ចំពោះរឿងអ្នកមីងវិញមានរឿង "រ៉ូហ្សា៥" ក្រៅពីរឿងខ្ញុំជាមួយអ្នកមីងក៏មានកុនខ្មែរមួយចំនួនទៀតចាក់បញ្ចាំងនៅអាមេរិកដែរ"។

ទាក់ទងក្នុងការយករឿងខ្មែរទៅចាក់បញ្ចាំងនៅប្រទេសអាមេរិកនេះដែរ អ្នកស្រី ស កេសារ៉ា បានបន្ថែមថា រឿងដែលត្រូវចាក់បញ្ចាំងមុនដំបូងមានប្រហែល៤ ទៅ ៥ រឿងប៉ុណ្ណោះ ហើយរដ្ឋដែលត្រូវបញ្ចាំងមុនគេគឺ រដ្ឋកាលីហ្វញ៉ា ព្រោះនៅទីនោះមានបងប្អូនខ្មែររស់នៅច្រើន និងគាំទ្រភាពយន្តខ្មែរផងដែរ។

“ចាស រឿងទាំងអស់ហ្នឹងគឺខ្ញុំយកទៅចាក់បញ្ចាំងប្រហែល១០ រដ្ឋ សុទ្ធតែជារដ្ឋធំៗនៅអាមេរិក ហើយថ្ងៃចាក់បញ្ចាំង ចាំទទួលបាន VISA សិន ព្រោះយកតួទៅជាមួយ ហើយបងប្អូនខ្មែរនៅទីហ្នឹងគាត់ក៏ចង់ឃើញតួសម្ដែងក្នុងរឿងមុននឹងចាក់បញ្ចាំង"។ អ្នកស្រី ស កេសារ៉ា ថ្លែង។

ទោះបីនេះជាលើកដំបូងក្នុងការយករឿងខ្មែរទៅបញ្ចាំងនៅអាមេរិកក្ដី តែផលិតករទាំងពីរជឿជាក់ថានឹងទទួលបានជោគជ័យ ច្រើនជាងនៅបណ្ដាប្រទេសមួយចំនួនដែលធ្លាប់បញ្ចាំងកន្លងមក ព្រោះនៅអាមេរិកមានប្រជាជនខ្មែរនៅច្រើន ម្យ៉ាងទៀតបងប្អូនដែលរស់នៅទីនោះ ខានបានទស្សនារឿងខ្មែរយូរដែរហើយ៕