«សណ្ឋាគារតម្លៃមធ្យម» នឹងបង្ហាញវត្តមាននៅកម្ពុជា លើទីតាំងសំខាន់ៗចំនួន៣

2017-11-27 09:05:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនសណ្ឋាគារដ៏ល្បីល្បាញរបស់បារាំង AccorHotels ដែលបច្ចុប្បន្ននេះមានសណ្ឋាគារជាង ៤០០០នៅក្នុងប្រទេស៩៥ នៅជុំវិញពិភពលោក នឹងបើកសណ្ឋាគារតម្លៃមធ្យមសម្រាប់ភ្ញៀវលំដាប់កណ្ដាលនៅកម្ពុជាដើម្បីបំពេញតម្រូវការទីផ្សារបន្ថែម។ នេះបើតាមការប្រកាសរបស់តំណាងក្រុមហ៊ុននៅក្នុងសន្និសីទសារព័ត៌មានរបស់ AccorHotels នាព្រឹកនេះ។

លោក Patrick Basset ប្រធាននាយកប្រតិបត្តិនៃក្រុមហ៊ុន AccorHotels ប្រចាំនៅអាស៊ីអាគ្នេយ៍ អាស៊ីឦសាន និងម៉ាល់ឌីវ បានថ្លែងថា ការបង្កើតឲ្យមានសណ្ឋាគារតម្លៃមធ្យមសម្រាប់ភ្ញៀវលំដាប់កណ្ដាលនេះជាការវិនិយោគរួមគ្នាជាមួយវិនិយោគិនក្នុងស្រុក ដោយបានសម្លឹងឃើញពីមានកំណើនសេដ្ឋកិច្ចកម្ពុជាមានភាពល្អប្រសើរ និងមានភ្ញៀវទេសចរគ្រប់លំដាប់ថ្នាក់ដែលត្រូវបំពេញបន្ថែមតម្រូវការទីផ្សារ។

(លោក Patrick Basset ប្រធាននាយកប្រតិបត្តិនៃក្រុមហ៊ុនAccorHotels )

លោកឲ្យដឹងថា AccorHotels បានជ្រើសទីតាំងនៅតំបន់សំខាន់ៗចំនួនបី ដើម្បីសាងសង់សណ្ខាគារលំដាប់ផ្កាយ៤ សម្រាប់ភ្ញៀវធនកណ្ដាល ទីតាំងទីមួយនៅរាជធានីភ្នំពេញ និងទីពីរនៅក្រុងព្រះសីហនុ ដែលមានឈ្មោះថា Novotel សណ្ឋាគារនេះមាននៅលើពិភពលោកចំនួន ៤៨៥ ក្នុង ៥៨ប្រទេស។ ទីតាំងទីបីគឺស្ថិតនៅខេត្តសៀមរាបមានឈ្មោះថា iBIS Stlye ដែលមានជាង ៣៨៩ នៅក្នុង៣៧ប្រទេសជុំវិញពិភពលោក។ រាល់ទីតាំងនីមួយៗ នឹងផ្ដល់ការងារថ្មី ៦០០កន្លែង។

(សណ្ឋាគារ Novotel នៅប្រទេសវៀតណាម)

(សណ្ឋាគារ iBIS Stlye នៅប្រទេសថៃ)

លោក Patrick បានបញ្ជាក់ថា៖ «បើនិយាយពីតម្លៃនៃបន្ទប់ស្នាក់នៅនៃសណ្ឋាគារវិញគឺចែកជាបីលំដាប់ ដោយលំដាប់មធ្យមគឺមានតម្លៃទាបជាងលំដាប់ខ្ពស់ និងខ្ពស់ជាងលំដាប់ទាបប្រមាណ ២០ភាគរយ»។ លោកបន្តថា ការចាប់ផ្ដើមសណ្ឋាគារសម្រាប់ភ្ញៀវធនកណ្ដាលជាការផ្លាស់ប្ដូរទីផ្សារសណ្ឋាគារថ្មីមួយសម្រាប់កម្ពុជា ខណៈប្រទេសក្នុងតំបន់អាស៊ានបានដើរទៅមុខរួចហើយ។ «យើងចង់ក្លាយជាអ្នកនាំនូវភាពផ្លាស់ប្ដូរដើម្បីឈានទៅរកបដិសណ្ឋារកិច្ចនូវភាពវិជ្ជមានសម្រាប់កន្លែងណាដែលយើងអាចរកស៊ីបាន»។ លោក Patrick បន្ថែម។

មកទល់បច្ចុប្បន្នក្រុមហ៊ុនដ៏ល្បីនេះបានមកកាន់កម្ពុជារយៈពេលជាង២០ឆ្នាំហើយ ដោយមានសណ្ឋាគារលំដាប់ផ្កាយ៥ ជាបុត្រសម្ព័ន្ធចំនួនពីររួមមាន សណ្ឋាគារ Raffle និង Sofitel ។ សណ្ឋាគារតម្លៃមធ្យមចំនួនបីគ្រោងនឹងបញ្ចប់ការសាងសង់នៅចុងឆ្នាំ ២០១៨ ដោយឡែកចំពោះទុនវិនិយោគវិញក្រុមហ៊ុនសូមមិនបញ្ជាក់ឡើយ៕

អត្ថបទ៖ ស៊ិន សាវ៉េត