តម្រូវការផ្ទះល្វែងហក់ឡើងខ្លាំងនៅតំបន់ភាគខាងជើងរាជធានីភ្នំពេញ

2017-12-03 07:51:58
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងអភិវឌ្ឍន៍ជាច្រើនបានរីកឡើងដូចផ្សិតតំបន់ភាគខាងជើងរាជធានីភ្នំពេញ ជាពិសេសនៅក្នុងខណ្ខសែនសុខ ដែលបានកំពុងក្លាយជាតំបន់មួយមានភាពទាក់ទាញកើនឡើង ទាំងសម្រាប់អ្នកអភិវឌ្ឍគម្រោងលំនៅដ្ឋាន ផ្សារទំនើប និងអគារពាណិជ្ជកម្មផ្សេងៗ និងទាំងប្រជាពលរដ្ឋដែលស្វែងរកកន្លែង រស់នៅ ។

ថ្មីៗនេះ ក្រុមហ៊ុនអភិវឌ្ឍក្នុងស្រុកមួយបានបន្ថែមទុន ៥លានដុល្លារ និងបានសម្ពោធការដ្ឋានសាងសង់លំនៅដ្ឋានផ្ទះល្វែងចំនួន ៣០០យូនីតនៅថ្ងៃទី ០២ ធ្នូ ដែលស្ថិតនៅក្នុងគម្រោងទីក្រុងរណបនៅភាគជើងនៃរាជធានីភ្នំពេញ ឈ្មោះថា Grand Phnom Penh ដែលគម្រោងនេះគ្រោងនឹងបញ្ចប់នៅចុងឆ្នាំ ២០១៨ខាងមុខ។

លោក Yeok K.Foo អ្នកគ្រប់គ្រងទីក្រុងរណបខាងលើនេះ ឲ្យដឹងថាៈ «ការបោះទុនបន្ថែមនេះ ដោយសារកំណើនប្រជាជននៅរាជធានីភ្នំពេញ ងាកមកតំបន់នេះកាន់តែច្រើនឡើងៗ ហើយភាគច្រើនពួកគាត់ត្រូវការផ្ទះស្នាក់ដែលអាចប្រកបអាជីវកម្មបាន... ហើយខ្ញុំគិតថាលំនៅដ្ឋានជាផ្ទះល្វែងគឺសាកសមសម្រាប់គាត់»។ អ្វីដែលសំខាន់ទៀតនោះអតិថិជនពិតជាត្រូវការ គុណភាពសំណង់ សុវត្ថិភាព ព្រមទាំងបរិយាកាសជំរុញដែលបង្កើតភាពស្រស់ស្អាត និងភាពសុខស្រួលក្នុងការរស់នៅ។ លោក Yeok បន្ថែម។

(លោក Yeok K.Foo អ្នកគ្រប់គ្រងទីក្រុងរណបGrand Phnom Penh)

ជាមួយគ្នានេះ លោក សន សៀប អគ្គនាយកក្រុមហ៊ុនអចលនទ្រព្យ KEY Real Estate ធ្លាប់ប្រាប់ Sabay ថា ប្រជាជនដែលមានចំណូលមធ្យមភាគច្រើន បានកំពុងរត់ទៅកាន់តំបន់ភាគជើងនៃរាជធានី ព្រោះថានៅតំបន់នោះ មានគម្រោងធំៗជាច្រើនបានកំពុងលេចរូបរាង ជាពិសេសគឺគម្រោងផ្សារអ៊ីអន២ជាដើម ដែលនេះវាជាហេតុផលមួយដែលអ្នកអភិវឌ្ឍត្រូវតែក្ដោបឱកាសនេះឲ្យជាប់។

( លោក សន សៀប អគ្គនាយកក្រុមហ៊ុនអចលនទ្រព្យ KEY Real Estate)

យ៉ាងណាមិញ លោកក៏បានបង្ហើបពីទីតាំងដែលមានសក្ដានុពលនៅតំបន់ទីប្រជុំជនដទៃទៀត ដូចជា នៅតំបន់ចំការដូង ក្រុងតាខ្មៅ ជ្រោយចង្វារ ជាដើម។ ទីតាំងទាំងនោះសុទ្ធតែល្អសម្រាប់ប្រជាជនមានចំណូលមធ្យមមានលទ្ធភាពទិញផ្ទះក្នុងតម្លៃប្រមាណជា ៥ម៉ឺនដុល្លារឡើង។ លោក សន សៀប បញ្ជាក់បន្ថែម។

អត្ថបទ៖ ស៊ិន សាវ៉េត