ឯកឧត្តម មាស វិរិទ្ធ៖ លេងកីឡា E-Sports ដើម្បីបដិសេធគ្រឿងញៀន

2017-12-04 07:44:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានអំពាវឲ្យយុវជននាំគ្នាលេងកីឡាអេឡិចត្រូនិក ក៏ដូចជាកីឡាផ្សេងៗទៀតដើម្បីជៀសឲ្យឆ្ងាយពីគ្រឿងញៀន។

ឯកឧត្តម នាយឧត្តមសេនីយ៍ មាស វិរិទ្ធ

ក្នុងឱកាសចូលរួមជាអធិបតីក្នុងពិធីការប្រកួតកីឡាអេឡិចត្រូនិកជ្រើសរើសឯកជាតិឆ្នាំ២០១៧នៅសាលាបច្ចេកវិទ្យាកម្ពុជា (តិចណូ)កាលពីល្ងាចថ្ងៃអាទិត្យ ទី៣ ខែធ្នូកន្លងទៅនេះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា ការរៀបចំឲ្យមានការប្រកួតកីឡាអេឡិចត្រូនិកជានេះជាផ្នែកមួយជួយដល់សង្គម ជាពិសេសកៀរគរយុវជនឲ្យរួបរួមគ្នាលេងកីឡាអេឡិចត្រូនិក។ សកម្មភាពនេះឆ្លុះបញ្ចាំងឲ្យឃើញថា យុវជនចេះចងក្រគ្នាជាក្រុមដើម្បីប្រកួតស្វែងរកជ័យជម្នះ។

ឯកឧត្តមថា ដើម្បីឈានទៅដណ្តើមបានជ័យជម្នះ យុវជនទាំងអស់ត្រូវការស្រាវជ្រាវ សិក្សាស្វែងយល់ពីយុទ្ធសាស្ត្រដើម្បីប្រកួតថ្នាក់ជាតិ និងអន្តរជាតិ។ កីឡា E-Sports នេះកំពុងរីកចម្រើនទូទាំងពិភពលោក ដូច្នេះនេះជាឱកាសដែលយុវជនកម្ពុជាត្រូវចាប់យក និងទទួលបានការគាំទ្រសម្រាប់ចេញទៅប្រកួតនៅក្រៅប្រទេសដែលកំពុងនិយម។

«ពួកគេនឹងប្រើប្រាស់ពេលវេលាដែលនៅទំនេរមកលេងកីឡា E-Sports ដើម្បីបង្កើតចំណេះដឹង និងស្មារតីដើម្បីវិវត្តឲ្យទាន់សម័យកាលរីកចម្រើនផ្នែកបច្ចេកវិទ្យា។ ថ្វីត្បិតកីឡានេះមិនបានរីកចម្រើនផ្នែករាងកាយ ប៉ុន្តែធ្វើឲ្យរីកចម្រើនការគិតគូរ សតិអារម្មណ៍ និងប្រាជ្ញាស្មារតី។ ពួកគេនឹងប្រើប្រាស់ពេលវេលា និងលទ្ធផលនៃការប្រកួតប្រជែងដើម្បីបដិសេធទៅនឹងការប្រើប្រាស់គ្រឿងញៀនដែលជាបញ្ហាគំរាមកំហែងដល់យុវជន។ យើងឃើញថា យុវជនជាង១ម៉ឺននាក់ដែលលេងកីឡាតាមអនឡាញ ដូច្នេះមានន័យថា យុវជនជាង១ម៉ឺននាក់ហើយបានឃើញឆ្ងាយពីគ្រឿងញៀន»។

ឯកឧត្តម នាយឧត្តមសេនីយ៍ មាស វិរិទ្ធ ប្រគល់ពានរង្វាន់ដល់ជយលាភីលេខ១

ឯកឧត្តម មាស វិរិទ្ធ បញ្ជាក់ថា E-Sports ក៏មិនខុសពីកីឡាផ្សេងៗទៀតទេ។ ប្រសិនបើប្រាស់ខុសគឺវានាំអន្តរាយ ប៉ុន្តែប្រសិនបើប្រើប្រាស់ឲ្យចំទិសដៅ ដូចជាកីឡា E-Sports ជាដើមគឺវានឹងផ្តល់អត្ថប្រយោជន៍សម្រាប់កាយសម្បទា សុខភាព និងប្រាជ្ញាស្មារតី។ កីឡានេះកំពុងរីកចម្រើនទូទាំងពិភពលោក ដូច្នេះកម្ពុជាក៏មិនគួររំលងឱកាសនេះដើម្បីអភិវឌ្ឍដែរ៕