ក្រមរថយន្តផ្សងព្រេងចាប់ផ្តើមចេញដំណើរ ចាកចេញពីទីក្រុងតាំងពីព្រលឹមស្រាងៗ

2017-12-07 01:20:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្បួនរថយន្តជាង ១០០ គ្រឿងដែលមានក្រុមអ្នកចូលរួមជាង ៥០០ នាក់ បានចាប់ផ្តើមដំណើរផ្សងព្រេងរយៈពេល ៤ ថ្ងៃ ទៅប្រទេសថៃនៅព្រឹកមិញនេះ។ ក្បួនរថយន្តបានចេញដំណើរព្រមគ្នាតាំងពីម៉ោងជាង ៥ ព្រលឹមស្រាងៗ។

តាមកម្មវិធី ក្បួនរថយន្តនឹងត្រូវធ្វើដំណើរតាមផ្លូវជាតិលេខ ៥ កាត់ខេត្តកំពង់ឆ្នាំង ពោធិសាត់ បាត់ដំបង និងបន្តឆ្ពោះទៅខេត្តប៉ៃលិន។

ទៅដល់ខេត្តប៉ៃលិនអាចទៅដល់ម៉ោងជាង ៣ រសៀល ក៏នឹងមានកម្មវិធីចែកអំណោយដល់ជនក្រីក្រមួួយចំនួន រួចអ្នកដំណើរត្រូវទៅសម្រាកទៅទីតាំងបោះជំរំមួយយប់ មុនបន្តឆ្លងចូលចូលទៅលេងប្រទេសថៃនៅថ្ងៃទីពីរ។ នៅពេលរាត្រី មានរៀបចំកម្មវិធីកម្សាន្តរាំច្រៀង រួមទាំងការទទួលទានអាហារជុំគ្នាផងដែរ។

នៅថ្ងៃទីពីរ បន្ទាប់ពីទទួលទានអាហារពេលព្រឹករួច ក្បួនរថយន្តនឹងចាប់បន្តចេញដំណើរឆ្លងចូលប្រទេសថៃ។ ក្នុងដំណើរទេសចរណ៍ប្រទេសថៃ ដែលមានរយៈពេលពីរថ្ងៃ មានការទៅលេងតំបន់កម្សាន្តមួយចំនួនដូចជារមណីយដ្ឋានសួន Nong Nooch រមណីយដ្ឋានភ្នំព្រះ Khao Chi Chan ក៏ដូចជាទៅលម្ហែនៅទីក្រុងប៉ាតាយ៉ា ជាទីក្រុងមាត់ឆ្នេរដ៏ល្បីរបស់ប្រទេសថៃ។

ក្រៅពីនេះ ក៏មានការដើរទិញទំនិញធូរថ្លៃ នៅហាងលក់ទំនិញបោះដុំដ៏ធំនៅខេត្តរ៉ាក់យ៉ងប្រទេសថៃ មុនវិលត្រឡប់មកប្រទេសកម្ពុជា។

Ford Adventure បានរៀបចំ ១១ លើកគិតទាំងឆ្នាំនេះ។ កាលឆ្នាំ ២០០៧ បានទៅលេងខេត្តមណ្ឌលគិរី, ឆ្នាំ ២០០៨ ទៅកាន់ខេត្តរតនគិរី, ឆ្នាំ ២០០៩ ទៅកាន់ខេត្តបៃលិន, ឆ្នាំ ២០១០ និង ២០១១ ទៅខេត្តចម្ប៉ាសាក់ប្រទេសឡាវ, ឆ្នាំ ២០១២ ទៅកាន់ខេត្តមណ្ឌលគិរី, ២០១៣ ទៅកាន់ខេត្តចម្ប៉ាសាក់ប្រទេសឡាវ, ឆ្នាំ ២០១៤ ទៅកាន់ខេត្តត្រាតប្រទេសថៃ, ឆ្នាំ ២០១៥ ទៅកាន់ខេត្តចន្ថាបុរី ប្រទេសថៃ, លើកទី ១០ ទៅខេត្តបុរីរាមប្រទេសថៃ និងលើកទី ១១ នឹងធ្វើដំណើរទៅកាន់ទីក្រុង ប៉ាតាយ៉ា ប្រទេសថៃ។