ទួលស្លែងក្លាយជាជើងឯក Toyota Junior Cambodia Cup 2017

2017-12-13 07:12:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់សាលាបឋមសិក្សា ទួលស្លែង បានក្លាយជាជើងឯកពានរង្វាន់ Toyota Junior Cambodia Cup 2017 បន្ទាប់ពីយកឈ្នះក្រុមបាល់ទាត់ សុវណ្ណភូមិ ដោយការទាត់បាល់ប៉េណាល់ទី ៣-១ នៅពហុកីឡដ្ឋានជាតិមុននេះ។

ក្រុមបាល់ទាត់ ទួលស្លែង

ចំណែកក្រុមលេខ ៣ បានទៅលើក្រុម ព្រែកព្នៅ ដែលបានយកឈ្នះក្រុមបាល់ទាត់សាលាបឋមសិក្សា SIS ១-០។ ក្នុងពិធីបិទការប្រកួតនេះដែរលោក ហ៊ីរ៉ូគី អ៊ីតូស អគ្គនាយកក្រុមហ៊ុនតូយ៉ូតាខេមបូឌាបានឲ្យដឹងថា បើមើលទៅលើការរៀបចំកន្លងមកក្មេងៗ ដែលបានចូលរួមពិតជាមានការរីកចំរើនពីមួយឆ្នាំទៅមួយឆ្នាំ។ សម្រាប់ក្មេងៗដែលបានក្លាយជាជើងឯក ល្ងាចនេះពួកគេ នឹងអាចកាន់ដៃកីឡាករបាល់ទាត់ក្រុមបឹងកេតពេលដើរចូលទីលាន ក្នុងការប្រកួតជាមួយក្រុម Sanna Khánh Hòa BVN FC របស់វៀតណាមនៃពានរង្វាន់ Toyota Mekong Club Championship 2017។

លោក ហ៊ីរ៉ូគី អ៊ីតូស

ជាមួយគ្នានោះលោក គៀប ប៊ុនធី គ្រូបង្រៀននៅសាលាទួលស្លែង និងជាគ្រូដែលបានដឹកនាំក្រុមឈ្នះជើងឯកពានរង្វាន់នេះ បាននិយាយថា លោកពិតជាសប្បាយចិត្តក្នុងការទទួលបានឱកាសចូលរួមលេងពាននេះ។ វាជាឱកាសល្អសម្រាប់ក្មេងៗ ដើម្បីឲ្យពួកគេអាចលេងកីឡាក្នុងកំឡុងពេលកំពុងសិក្សា ជៀសផុតពីគ្រឿងញៀន និងអំពើអបាយមុខផ្សេងៗ។

លោក គៀប ប៊ុនធី

គ្រូបង្រៀនរូបនេះបន្ថែមថា ប្រសិនបើមានឱកាសចូលរួមលើកក្រោយៗទៀត សាលារបស់លោក នឹងប្រឹងប្រែងបន្ថែមទៀត ដើម្បីបានឈ្នះជើងឯក។ សាលាបឋមសិក្សាទូលស្លែងធ្លាប់ឈ្នះជើងឯកពានរង្វាន់នេះកាលពីឆ្នាំ២០១៥ ម្ដងរួចមកហើយ។ សម្រាប់ការប្រកួតដំណាក់កាលផ្ដាច់ព្រ័ត្រនេះមានក្រុមចំនួន ១២ ចូលរួម ដោយធ្វើការបែងចែកជាពីរពូល៕