ភូមិត្រីឆ្អើរព្រែកក្មេង ស្រុកល្វាឯម ជួបវិបត្តិខ្សត់ត្រីធ្វើ ៤ឆ្នាំជាប់គ្នា

2018-02-05 08:13:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ភូមិផលិតត្រីឆ្អើរតកូនតចៅធំមួយ នៅស្រុកល្វាឯម ខេត្តកណ្ដាល កំពុងជួបបញ្ហាអត់ត្រីសម្រាប់ឆ្អើរ៤ឆ្នាំជាប់គ្នា។

៦សន្លឹក បង្ហាញពីមុខរបរ និងជីវិតប្រចាំថ្ងៃកូនខ្មែរ

អ្នកភូមិម្នាក់ដែលប្រកបរបរឆ្អើរត្រីតតាំងពីដូនតា និងជាអ្នកឆ្អើរត្រីធំប្រចាំភូមិ អ្នកស្រី ណន បានប្រាប់ឲ្យដឹងថា រយៈពេល៣ ទៅ ៤ឆ្នាំនេះផលត្រី ដែលរកមកសម្រាប់ឆ្អើរនេះធ្លាក់ចុះសឹងតែរកមិនបានឆ្អើរផង ឆ្នាំនេះខ្សត់ត្រីជាងឆ្នាំទៅទៀត ឆ្នាំនេះបានតែសឹងមិនបាន ៥ពាន់ចង្កាក់ផង កាលមុនវិញមិនក្រោម ៣ទៅ ៥ម៉ឺនចង្កាក់ទេក្នុងមួយឆ្នាំៗនោះ។

អ្នកភូមិម្នាក់ទៀតអ្នកស្រី ឈៀង នី បានលើកឡើងថា ឆ្នាំនេះរកសឹងមិនបាន១០០ចង្កាក់ផង ខ្សត់រកមិនបាន៣-៤ឆ្នាំហើយ។

ផលត្រីធ្លាក់ចុះនេះមានមូលហេតុធំ២ ដែលអ្នកភូមិធ្វើត្រីឆ្អើរតកូនតចៅមួយនេះលើកឡើង ១គឺការនេសាទដាក់ស្បៃមុងខុសច្បាប់មានកាន់តែច្រើន និង២ ត្រីពុលមកពីការបាញ់ថ្នាំឈូក និងស្រែរបស់អ្នកភូមិ។

គួរបញ្ជាក់ថា ឆ្នាំនេះត្រីឆ្អើរដែលអ្នកភូមិព្រែកក្មេងនេះលក់ចេញមានតម្លៃ ៦រយរៀលក្នុងមួយចង្កាក់។ នៅភូមិព្រែកក្មេងនេះមានប្រជាជនប្រមាណ៨០ភាគរយ ប្រកបរបរនេសាទ និងឆ្អើរត្រី និង២០ភាគរយ ជាកសិករធ្វើស្រែប្រាំង ដាំកក់ និងឈូក៕