មានត្រឹម Highlander មួយគ្រឿង អាចរកបានមួយថ្ងៃ ៣០០ ដុល្លារ

2018-02-09 03:17:28
ចំនួនមតិ 0 | ចំនួនចែករំលែក 0

ចន្លោះមិនឃើញ

លំហូររថយន្តមួយទឹកពីអាមេរិក ជាពិសេសម៉ូដែល Highlander ដែលមានតម្លៃជាងមួយម៉ឺនដុល្លារ ហើយអាចទិញបង់រំលោះក្នុងមួយខែ ៣០០ ទៅ ៤០០ ដុល្លារ រួមផ្សំនឹងភាពរឹងមាំហើយស្រួលរងគ្រឿងបន្លាស់ បានធ្វើឲ្យរថយន្តនេះក្លាយជាជម្រើសទីមួយសម្រាប់អ្នកប្រកបរបរដឹងភ្ញៀវទៅមកភ្នំពេញកំពង់សោមសម្រាប់ពេលបច្ចុប្បន្ន។

រូបតំណាង

ក្នុងចំណោមអ្នកបើកបររថយន្តដឹកភ្ញៀវជាច្រើនដែលសំចតនៅបេនឡានកំពង់សោមភ្នំពេញ លោកពូមានវ័យប្រមាណជាង ៣០ឆ្នាំ សម្បុរខ្មៅ មាឌធំដែលជាម្ចាស់ Highlander ឆ្នាំ ២០០១ ពណ៌ទឹកប្រាក់លេងយ៉ាន់ Lexus Rx 330 បាននិយាយថា ក្នុងមួយថ្ងៃគាត់អាចរកចំណូលបានចន្លោះពី **៨០** ដល់ **១៥០ ដុល្លារ** ។

ចំណូលនេះ គឺបានមកពីការដឹកភ្ញៀវទៅមកភ្នំពេញកំពង់សោម ក្នុងមួយជើង ៤៥ ទៅ ៥០ ដុល្លារ សម្រាប់ការម៉ៅមួយឡាន ឬ ៤ ម៉ឺនរៀលក្នុងម្នាក់ (ជិះរួម) និងថ្លៃផ្ញើឥវ៉ាន់ ឬឯកសារខ្លះៗតម្លៃ ៥០ ដុល្លារ ។ លោកពូខាងលើក៏បញ្ជាក់ថា ឥឡូវកម្លាំងមិនសូវដូចមុនគាត់រត់បាន ២ ទៅ ៣ ជើងក្នុងមួយថ្ងៃហើយដាក់បានតែ ៥ នាក់ មិនដូចក្មេងៗសារក្រោយអាចបានដល់ ៤ ជើង ក្នុងមួយថ្ងៃទៅមកភ្នំពេញកំពង់សោម ហើយមួយជើង Highlander គេដាក់អ្នកជិះបាន ៧ នាក់ នឹងថ្លៃបញ្ញើឥវ៉ាន់អាចដល់ខ្ទង់ ៣០០ ដុល្លារក្នុងមួយថ្ងៃ។

រូបតំណាង

ដោយឡែកចំណូលទាំងនេះ គឺត្រូវកាត់វិញលើថ្លៃបង់ចំណតបេនឡាន ៥ ដុល្លារក្នុងមួយដង និងកាត់ថ្លៃហ្គាសប្រមាណ ២៥ ទៅ ៣០ ដុល្លារ សម្រាប់ការបើកបរទៅមកភ្នំពេញកំពង់សោមមួយជើង។ មើលទៅថាបានច្រើនមែន តែវាសម្រាប់តែខែត្រូវប៉ាន់ដូចជាឆ្លងឆ្នាំ បុណ្យទាននានាប៉ុណ្ណោះ ពេលខ្លះមួយថ្ងៃបានតែមួយជើងក៏មានដែរ។ នេះបើតាមអ្នកបើកបរវ័យជាង ៣០ ឆ្នាំរូបនេះបន្ថែម៕