បញ្ចេញរឿងថា ហេតុអី្វ អ៊ួង សូរិយា ស្ងាត់ឈឹង ក្រោយផ្ទុះបទ "នឹកអូនបានត្រឹមស្រមៃ"?

2018-04-19 02:34:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីផ្ទុះបទ "នឹកអូនបានត្រឹមស្រមៃ" និងបទបន្តបន្ទាប់កាលពីឆ្នាំ ២០១៧នោះ តារា Original Song អ៊ួង សូរិយា ស្ងាត់បាត់ឈឹងរហូតមក មុនពេលសាមីខ្លួនបញ្ចេញនាពេលនេះថា ដោយសារលោករវល់សម្ងំផលិតបទចម្រៀងមួយចំនួន។

លោក អ៊ួង សូរិយា ប្រាប់ថា រយៈពេលរយាលពីការចេញមុខលើទូរទស្សន៍ ឬឆាកតន្ត្រីនានានោះ គឺលោកកំពុងជាប់ដៃផលិតបទចម្រៀងឲ្យអង្គការ Unicef ជាប្រភេទបទសម្រាប់អប់រំក្មេងៗ ស្រដៀងនឹងបទ "លាងសំអាត" ផលិតដោយ Wateraid ជាមួយ Epicarts កាលពីដើមឆ្នាំ ២០១៧ ដែរ ដែលកាលណោះ លោកក៏ចូលរួមសម្ដែងជាមួយផង។

ក្រៅពីនេះ លោកក៏មិនចោលការផលិតបទចម្រៀងផ្ទាល់ខ្លួនដែរ។ លោកថា បច្ចុប្បន្នលោកកំពុងធ្វើបទថ្មីផ្ទាល់ខ្លួនមួយដែរ មានចំណងជើងថា "អារម្មណ៍ហាសិបហាសិប" ជាប្រភេទបទមនោសញ្ចេតនាស្នេហា បរិយាយពីអារម្មណ៍របស់បុរសម្នាក់ដែលកំពុងលង់ស្រលាញ់នារីម្នាក់ ទាំងខ្លួនឯងមិនទទួលបានអារម្មណ៍ប្រាកដប្រជាលើស្នេហាមួយនេះសោះ។

បទនេះ គឺលោកបាន និងកំពុងធ្វើជិតរួចរាល់ហើយ។ នៅមុនការបញ្ចេញពីវត្តមានបទថ្មីដែលកំពុងសម្ងំផលិតនេះ តារាចម្រៀង អ៊ួង សូរិយា ត្រូវបានគេឃើញប្រកាសសួរអ្នកគាំទ្រលើបណ្ដាញសង្គម អំពីថាតើ ប្រិយមិត្តចង់ស្ដាប់បទថ្មីរបស់លោកទៀតទេ កាលពីដើមឆ្នាំនេះ។ ក្រោយពីការស្ទង់មតិ លោកទទួលបានការឆ្លើយតបវិជ្ជមានជាច្រើនពីអ្នកគាំទ្រ។

មិនយូរប៉ុន្មាន លោកក៏ចាប់ផ្ដើមផលិតបទថ្មីនោះតែម្ដង។ "ខានចេញបទយូរដែរហើយ ប៉ុន្តែសប្បាយចិត្ត ដែលដឹងថាមានអ្នកគាំទ្រដែលកំពុងរង់ចាំស្ដាប់បទរបស់ខ្ញុំ" សូរិយា ថ្លែង។